Ozarbayjon poytaxtida davom etayotgan IV “Islom birdamlik o'yinlari”ning oltinchi kunida hamyurtlarimiz sportning bir necha turlarida kurash olib borishdi va kun yakunida 1 ta oltin, 3 ta kumush va 7 ta bronza medallarini qo'lga kiritishdi.
Delegatsiyamiz hisobiga sakkizchi oltin medalni og'ir atletikachimiz Rustam Jangabaev keltirdi. +105 kg vazn toifasida chiqish qilgan polvonimiz dast ko'tarishda 193 kg, siltab ko'tarishda 238 kg, jami 431 kg tosh ko'tarib oltin medalga sazovor bo'ldi va musobaqa rekordini o'rnatdi.
U asosiy raqibi Teymuri Humoyunni naqd 17 kilogrammga ortda qoldirdi. Sportning ushbu turi bo'yicha bellashuvlar yakunlangach Rustam Jangabaev shuningdek IV “Islom birdamlik o'yinlari”ning eng yaxshi og'ir atletikachisi deb topildi va maxsus sovrin bilan taqdirlandi.
Kechadan sport kurashlari bo'yicha bellashuvlar ham boshlab yuborildi. Dastlab yunon-rum kurashi bo'yicha terma jamoamiz a'zolari gilamga chiqishdi. -59 kg vazn toifasida kurash olib borgan Islomjon Bahromov saralash bosqichidan muvvafaqiyatli o'tib finalga yo'llanma olgandi. Afsuski, hamyurtimiz hal qiluvchi bahsda qirg'izistonlik Kaniybek Jolchibekovga imkoniyatni boy berib kumush bilan kifoyalandi.
Taekvondo bo'yicha bellashuvlarda +87 kg. vazn toifasida Dmitriy Shokin finalga qadar barcha raqiblarini mag'lubiyatga uchratib, hal qiluvchi bahsda anchagina tajribali raqibga ro'baro kelib qoldi. Ushbu vazn toifasida oltin medal taqdiri jahon va Evropa chempioni, Rio-2016 Olimpiya o'yinlari oltin medali sohibi, ozarbayjonlik Radik Isaev va jahon chempioni, o'zbekistonlik Dmitriy Shokin o'rtasidagi jangda hal bo'ladigan bo'ldi.
Rio-2016 Olimpiya o'yinlarida Ozarbayjon delegatsiyasining yagona oltin medali egasi Radik Isaev jangni o'z foydasiga hal qildi va o'z shaxsiy kollektsiyasiga IV “Islom birdamlik o'yinlari”ning oltin medalini ham qo'shib qo'ydi. Shokin esa kumush medali bilan taqdirlandi.
Yana bir kumush medalni delegatsiyamizga para-atletikachimiz Mansur Abdurashidov keltirdi. U 100 metr masofaga yugurish bo'yicha bahslarda marraga ikkinchi bo'lib etib keldi va kumush medaliga sazovor bo'ldi.
Shuningdek, boks bo'yicha bahslarda yarim finalga yo'llanma olgan beshta vakilimizdan ikkitasi – Mironshoh Ibragimov (-49 kg.) va Abrorjon Qodirov (-52 kg.)lar bronza medali bilan cheklanishgan bo'lishsa, uch nafar bokschimiz, ya'ni Abdulhay Shoraxmatov (-56 kg.), Alyor Noraliev (-64 kg.) va Bobo-Usmon Baturov (-69 kg) finalga yo'llanma olishdi. Ular bugun oltin medal uchun ringga ko'tarilishadi.
Taekvondo bo'yicha bahslarda Nigora Tursunqulova (-67 kg.), Svetlana Osipova (+73 kg.) va Maksim Rafalovich (-80 kg.)lar yarim finalda raqiblariga imkoniyatni boy berib bronza medallari bilan cheklanishdi. E'tiborlisi, Maksim Rafalovich musobaqaning bronza medalini shaxsan Ozarbayjon Respublikasi Prezidenti Ilxom Alievdan qabul qilib oldi.
Shuningdek, kechagi bahslar yakuniga ko'ra og'ir atletikachimiz Ivan Efremov (-105 kg.) va yunon-rum kurashchimiz Rustam Assakalov (-98 kg.)lar delegatsiyamiz hisobiga navbatdagi bronza medallarini qo'shib qo'yishdi.
Bugun, aytib o'tganimizdek uch nafar bokschimiz final janglarini o'tkazishadi. Shuningdek, taekvondo bo'yicha bahslarda Umida Abdullaeva (-62 kg.) va Nikita Rafalovich (-74 kg.)lar dayanga chiqishadi. Engil atletikada Nadiya Dusanova va Suhrob Xo'jaevlar o'z ishtiroklarini boshlashsa, Nigina Sharipova 200 metr masofaga yugurish bo'yicha final bahsida ishtirok etadi.
Tennis bo'yicha Sergey Fomin, Kamola Umarova va Sultonbekov/Saidkarimov juftligi navbatdagi uchrashuvlarni o'tkazishadi. Yunon-rum kurashida esa Mirzobek Rahmatov (-66 kg.) va Mo'minjon Abdullaev (130 kg.)lar gilamga chiqishadi. Aleksandr Svechnikov para-atletlar o'rtasida nayza uloqtirish bo'yicha o'z omadini sinab ko'radi. Biz sportchilarimizga bugungi bellashuvlarda ham muvaffaqiyatli ishtirok va qo'sha-qo'sha medallar tilab qolamiz.
Demak ayni vaqtga qadar quyidagi sportchilarimiz IV “Islom birdamlik o'yinlarida medallarga sazovor bo'lishdi:
Sadriddin Saymatov – (karate, -60 kg.) - oltin
Gulnoza Matniyozova – (dyuzdo, -70 kg.) - oltin
Anastasiya Serdyukova (badiiy gimnastika) - oltin
Shuhrat Boboev (para-dzyudo, -90 kg.) - oltin
Shirin Sharipov (para-dzyudo, +100 kg.) - oltin
Oksana Chusovitina (sport gimnastikasi) - oltin
Niyoz Po'latov (taekvondo, - 58 kg.) - oltin
Rustam Jangabaev (og'ir atletika, +105 kg.) - oltin
Badiiy gimnastika (terma jamoa) - kumush
Anastasiya Serdyukova (badiiy gimnastika) - kumush (2 ta)
Feruz Sayidov (para-dzyudo, -73 kg.) - kumush
Tennis (ayollar terma jamoasi) - kumush
Kumush Fayzullaeva (og'ir atletika, -63 kg.) - kumush
Ulug'bek Alimov (og'ir atletika, -85 kg.) - kumush
Farxodbek Sobirov (og'ir atletika, -94 kg.) - kumush
Sabina Sharipova (engil atletika, 100 m) - kumush
Islomjon Baxromov (yunon-rum kurashi, 59 kg.)- kumush
Dmitriy Shokin (taekvondo, +87 kg.) - kumush
Mansur Abdurashidov (para-atletika, 100 m) - kumush
Saidxon Sayfuddinov (o'q otish) - bronza
Sakina Mamedova (o'q otish) - bronza
Diyorbek O'rozboev (dzyudo, -60 kg.) - bronza
Gulruh Rahimova (para-dzyudo, -70 kg.) - bronza
Dostonbek Otabolaev (karate, 75 kg.) - bronza
Barno Mirzaeva (karate, -61 kg.) - bronza
Abdulaziz Atabaev (karate, -84 kg.) - bronza
Sabina Tashkenbaeva (badiiy gimnastika) - bronza (2 ta)
Muattar Nabieva (og'ir atletika, -58 kg.) - bronza
Davlatbek Bobonov (dzyudo, -81 kg.) - bronza
Bekmurod Oltiboev (dzyudo, +100 kg.) - bronza
Dzyudo (erkaklar terma jamoasi) - bronza
Dzyudo (ayollar terma jamoasi) - bronza
Tennis (erkaklar terma jamoasi) - bronza
Doston Yoqubov (og'ir atletika, 69 kg.) - bronza
Manzura Mamasolieva (og'ir atletika, 69 kg.)- bronza
Omadoy Otaqo'zieva (og'ir atletika, 75 kg.) - bronza
Mironshoh Ibragimov (boks, -49 kg.) - bronza
Abrorjon Qodirov (boks, -52 kg.) - bronza
Ivan Efremov (og'ir atletika, -105 kg.) - bronza
Rustam Assakalov (yunon-rum kurashi, 98 kg.) - bronza
Nigora Tursunkulova (taekvondo, - 67 kg.) - bronza
Maksim Rafalovich (taekvondo, - 80 kg.) - bronza
Svetlana Osipova (taekvondo, +73 kg) - bronza
O'zbekiston Milliy olimpiya qo'mitasi
matbuot xizmati
— deya xabar beradi uff.uz nashri.