Mamlakatimiz badiiy gimnastikachilarining xalqaro musobaqalarda qo'lga kiritayotgan muvaffaqiyatlari salmog'i yildan-yilga yuksalib, iqtidorli sportchilarimiz safi kengayib bormoqda.
Kuni-kecha Moskva shahri (Rossiya)da bo'lib o'tgan an'anaviy xalqaro turnirda ham yosh gimnastikachilarimiz ko'plab sovrinli o'rinlarni qo'lga kiritib, O'zbekiston badiiy gimnastika maktabi qay darajada rivojlanib borayotganligini yana bir bora isbotladilar.
Ayniqsa, samarqandlik yosh gimnastikachimiz Taxmina Ikromovani bir yo'la to'rtta oltin medalni qo'lga kiritib, mutloq g'oliblikni qo'lga kiritgani har qancha taxsinga loyiq.
Endigina 11 yoshni qarshilagan Taxmina halqa (14.600 ball), to'p (15.600 ball) va arg'amcha (16.500 ball) bilan bajariladigan mashqlarda eng yuqori (46.700) ballga sazovor bo'lib, umumiy hisobda birinchi o'rinni band etdi.
Ushbu xalqaro turnirda, shuningdek, hamyurtlarimizdan Nurinisso Usmanova 1 ta oltin va 3 ta kumush, Shahrizoda Qayumova 1 tadan oltin, kumush va bronza, yana bir sportchimiz Farzona Usmanova esa 2 ta bronza medaliga sazovor bo'ldi.
Ma'lumot uchun. Bu yilgi xalqaro turnirda Rossiya, O'zbekiston, Misr, Avstraliya, Kipr, Ozarbayjon, Armaniston, Qozog'iston, Ukraina hamda Latviyadan sportchilar ishtirok etdilar. Shavkat Jalilov O'zbekiston Milliy Olimpiya qo'mitasi
matbuot xizmati
— deya xabar beradi uff.uz nashri.