O'tgan mavsumni APLning eng yaxshi futbolchisi maqomida yakunlaganEden Azar 5 oylik davr oralig'ida avvalgi samaradorligini butunlayboy berdi. Uni ochiqdan-ochiq tanqid qilgan Joze Mourino «Liverpul»­ga qarshi kechgan muhim uchrashuvda o'rniga boshqa futbolchini maydonga tushirdi. Belgiyalik futbolchi faoliyatidagi pasayish xorijlik kasbdoshimiz nazarida.
Ko'pchilik mutaxassislar (jumladan, Mourinoning) fikriga ko'ra, Eden Azar himoyalanish chog'ida ko'plab xatoliklarga yo'l qo'yayotgan ekan. Shu bois, «Chelsi» joriy mavsumda anchagina jabr ko'rdi. Azarning xatolarini 3 toifaga ajratish mumkin:
1. Jamoa to'pni yo'qotgan payt Azar nazariy jihatdan egallashi lozim bo'lgan pozitsiyadan tashqarida qolmoqda. Bunga Aleks Oksleyd-Chemberlenning Angliya superkubogi bahsidagi golini misol tariqasida keltirish mumkin. Bu vaziyatda Aspilikuetani qo'llab-quvvatlashi lozim bo'lgan Matich Ektor Belerinning reydini bartaraf etish bilan ovora edi. Oqibatda Oksleyd-Chemberlen Aspilikueta bilan yakkama-yakka holatda qoldi. Azar esa voqea joyidan ancha olisda bo'lib, «Chelsi»ning qarshi hujumiga umid qilgan holda qulay vaziyatni kutish bilan band edi. Ba'zan Eden pressing­ga berilib ketib, o'z pozitsiyasini unutib qo'yadi. «Nyukasl» bilan kechgan o'yinda bir necha marta shunday holat yuz berdi. Ligada eng topqir o'ng qanot himoyachilardan biriga aylangan Daril Yanmat ko'p marta bo'shliqqa ega bo'lib, emin-erkin to'p surdi.
2. Azar pozitsiya tanlashda yanglishmaydi, lekin kutilmaganda jang maydonidan chetda qoladi. Bunga yaqqol misol tariqasida Joel Uord­ning golini ko'rsatish mumkin;
3. Hamjihatlikka e'tibor bermasligi oqibatida Eden o'z pozitsiya­sini nazoratsiz qoldiradi, jamoadoshlari uning hududini «yopish»ga urinadilar. Oqibatda, boshqa nuqtalarda bo'shliqlar yuzaga keladi. «Suonsi» bilan bo'lgan bahs fikrimiz dalili.
Qizig'i shundaki, Azarning himoya borasidagi noshudligini kimdir dangasalikka yo'ysa, boshqa birov Mou­rino uning oldiga qo'ygan talablar bilan izohlaydi. «Azarga muayyan hududlarda harakatlanish uchun qo'shimcha erkinlik beriladi. Jamoa bundan xabardor va uning erkinligini o'z mehnati bilan to'ldiradi», degan edi Mourino bahor oylarida. O'sha paytdayoq murabbiy bu taktik uslub uchun jamoa gollar bilan jazolanishi mumkinligini his etgandi. «U o'yin taqdirini bir o'zi hal qila oladigan futbolchilar sirasiga kiradi. Ammo bunday o'yinchini jamoaga moslash uchun o'ziga xos taktikani ishlab chiqish talab etiladi. Ya'ni, futbolchining erkinligi ayrim mag'lubiyatlarga sabab bo'lib qolmasligini ta'minlay oladigan uslub lozim. Faoliyatim davomida suyukli shogirdlarimga erkinlik berish oqibatida bir qator mag'lubiyatlarni ham tan olganman. Ha, bu futbolchilar menga ko'plab zafarlarni tuhfa etishdi. Lekin shu bilan birga, bir nechta bellashuvlar ular tufayli boy berildi».
«Benazir»ning jizzaki tabiatini inobatga olganda, uning Azarga bergan ta'riflaridan futbolchining xatolariga aniq baho berish mushkul. Uni ayblash uchun esa variantlar etarli: «Azardagi erkinlik endi dangasalikka aylandi, jamoadoshlari uning o'rnini to'ldirishni uddalay olmayaptilar»dan tortib, «Mourino bilan kelisholmayotgani tufayli Azar avvalgidek o'ynamay qoldi»gacha. Shu bois, bir masala bizni o'ylantirib qo'ydi.
Mourinoning tanqidi nechog'li ahamiyatli?
Yaqinda e'lon qilingan intervyu­da Alvaro Arbeloa portugaliyalik mutaxassisning o'z shogirdlariga munosabatidagi qiziqarli jihatga urg'u berib o'tdi: «Agar sen jon-jahding bilan harakatlansang-u, o'yining baribir, muvaffaqiyatsiz chiqsa, Mou seni hech qachon koyimaydi. Lekin seni himoya qila turib, hech narsa o'zgarmayotganini sezib qolsa, «balki uni boshqacha uslub bilan «uyg'otish» kerakdir», deb o'ylab qoladi». Mana shu aqidani murabbiyning asosiy omadsizligiga nisbatan qo'llaydigan bo'lsak, Mourino-Azar o'rtasidagi munosabatda aynan shunday o'zgarish yuz bergandek ko'rinadi.
Davomi InterFUTBOL gazetasi blogida.
— deya xabar beradi uff.uz nashri.