Bugungi kunda 9 may, tom ma'noda yurtimizning gullab-yashnashiga o'z xissasini qo'shgan insonlar xotirasi yodga olinadigan, faxriylarga izzat – ikrom, mehr oqibat odatdagidanda ko'proq ko'rsatiladigan muborak sanaga aylangan. Shu munosabat bilan Namangan viloyatining Kosonsoy tumanida «9-may - Xotira va qadrlash kuni» hamda tuman faxri bo'lmish rahmatli Samaraxon Karimovning 85-yilligiga bag'ishlangan mini-futbol bo'yicha “Xotira” turniri o'tkazildi. Qur'a natijasiga ko'ra, 20 ta jamoa, 4-guruhga bo'lingan holda bahslarga kirishadigan bo'lishdi. Jamoalar o'rtasidagi musobaqa juda qiziqarli va teng kuchlar ostida o'tdi. Qiziqarlisi, musobaqa finaliga “Davr 1987” hamda “Borussiya Dortmund” jamoalari etib kelishdi. Murosasiz va teng kurashlar ostida o'tgan bahsda “Davr 1987” jamoasi raqibilarini 4:3 hisobida mag'lub etib, bosh sovringa sazovor bo'lishdi. 2-o'ringa “Borussiya Dortmund” loyiq ko'rilgan bo'lsa, 3-o'rin esa “Kosonsoy A-Seriya” hamda “Guliston” jamoalariga nasib etdi. Shuningdek, turnirda “Eng yaxshi futbolchi” (Akmalxon Abdullaev, “Borussiya Dortmund”), “Eng yaxshi darvozabon” (Abdusami Rahimboev “Davr 1987”), “Eng yaxshi to'purar” (Baxodirxon Inomov, “A-Seriya”), “Eng yaxshi yoshi katta futbolchi” (Ibrohimjon Karimov, “Qorasuv”), “Eng yaxshi yosh futbolchi” (Azimjon Muhammadazimov, “Zakovat”), “Eng namunali futbolchi” (Nosirxon Boboev, “A-Seriya”), “Eng chiroyli gol muallifi” (Jamolxon Hamidov, “Kosonsoychi”), “Eng xavfli hujumchi” (Islomxon Zokirov, “Davr 1987”), “Eng mexnatsevar futbolchi” (Farxod Ataxanov, “Guliston”) nominatsiyalari bo'yicha qimatbaho sovg'alar topshirildi. Tadbir so'nggida Samaraxon Karimovning farzandlari Muyassarxon Karimova so'zga chiqib, turnir g'oliblarini samimiy qutlab, tadbirni tashkil etgan Jahongirxon Hojixonovga otalari ruhini shod etganlari uchun chin dildan samimiy minnatdorchiligini bildirdi. Bundan tashqari, musobaqani tomosha qilish uchun muxlislar qatorida Samaraxon Karimovning farzandlari, nabiralari ham tashrif buyurishdi. O'tkazilgan xotira turniri barchaning ko'nglida iliq taasurot qoldirish bilan birga tumanda futbolni rivojlantirish ishlari kundan-kunga olg'a borayotganidan ham darak bermoqda. Rustamxon Temirov MUSOBAQA FOTOSURATLARINI KOMP'YuTER ORQALI KO'RISh UChUN BU ERGA BOSING MUSOBAQA FOTOSURATLARINI TELEFON ORQALI KO'RISh UChUN ESA BU ERGA BOSING
— deya xabar beradi uff.uz nashri.