Futbol shunday o'yinki, uning jozibasidan muxlislar cheksiz bahra olishadi. G'alaba sarmast­ligini uncha-muncha yoqimli tuyg'u bilan qiyoslab bo'lmasligi ham ayni haqiqat. Biroq sevimli jamoalari kutilmagan mag'lubiyatga uchrasa, bundan chinakamiga jazava tushadigan, nazoratni mutlaqo qo'ldan chiqarib, kuchli alam ta'sirida nojo'ya xatti-harakatlarni amalga oshiradigan ehtirosli fanatlar ham bor, albatta. Quyidagi maqola xuddi shunga o'xshash 10ta g'ayrioddiy voqea xususida... Fanatlar Pele bashoratiga qarshi - Biz Pelening uyi oldida kechasi bilan namoyish uyushtirib, unga uyqu bermaymiz,-dedi avvalgi oy halovati buzilgan kolumbiyalik ashaddiy muxlislardan biri. Bunday asabiy bayonotning sababi oddiy: braziliyalik futbol afsonasi yaqinda yana «bashorat qilish qobiliyati»ni ishga solib, Kolumbiya terma jamoasini navbatdagi mundial bosh sovriniga asosiy da'vogarlardan biri sifatida tilga oldi. Xo'sh, shunga nima, axir kimsan Pelening e'tirofi yoqimli emasmi? Biroq gap shundaki, allaqachon «anti-Nostradamus» laqabini orttirgan janob Pelening avvalgi aksariyat bashoratlari to'g'ri chiqmagan, aksincha, amalda hammasi g'irt teskari ko'rinish olgan. «1994 yilgi JChni bir eslang... O'shanda ham Pele terma jamoamizning mutlaq kuchliligini aytib, AQShda g'alaba qozonishini taxmin qilgandi,-deydi o'sha jig'ibiyron muxlis. - Ming afsuski, milliy termamiz amalda hattoki, guruhdan ham chiqolmagandi. Boz ustiga, o'z darvozamizga gol urib qo'ygan himoyachi Andres Eskobar alamzada muxlislar tomonidan otib o'ldirildi. Shunday ekan, yaxshisi, Pelening bashoratlaridan uzoqroq yuraylik. Bizga ortiqcha «drama» kerak emas». Parker uchun raqs sabog'i 1990 yil Yamaykaning «Kings of Daymondz» havaskorlar klubi hujumchisi Uesli Parker uchun o'ta noqulay keldi. Chunonchi, avvaliga uning maydonda ishlari sira yurishmadi. Buning oqibatida bechora futbolchi muxlislarning g'azabiga duchor bo'lib, bir necha dahshatli tahdidga ham uchradi. Eng yomoni, bir gal alamzada ishqibozlar uni o'g'irlab ketishdi hamda shahar chetidagi qarovsiz bir binoga qamab qo'yishdi. Mahalliy politsiyaning tergov-surishtiruvlaridan so'ng aniqlanishicha, niqobli kimsalar futbolchini naq 2 soat davomida «limbo» atalmish g'oyat serharakat raqsga tushishga majbur qilishgan ekan. Bundan ko'zlangan maqsad ham «ajoyib» - hujumchining chaqqonligini oshirib, uni vaziyatlardan samarali foydalanishga o'rgatish! Xullas, bechora Parker 120 daqiqa «berilib» raqsga tushgach, maydonda faolroq bo'lish sharti bilan ozod qilingan... Daraxt ustida ochlik... Tasavvur qiling, qaysidir jamoaning sust o'yini, noto'g'ri taktikasi va qoniqarsiz sport formasidan bezigan ashaddiy muxlissiz. Aytingchi, vaziyatni o'nglash uchun nima qilasiz? Ana, «Bilmadim» qabilida bosh qimirlatishdan nariga o'tmadingiz. «Korintians» klubining Roberto ismli ishqibozi esa uzoq o'ylanib o'tirmay, stadion yaqinidagi daraxt ustiga chiqib olgancha shunchaki, ochlik e'lon qildi-qo'ydi. Aniqroq aytsak, u 2003 yili bir qop bananni olib, daraxtga chiqdi-da, o'zini arqon bilan baquvvat shoxga bog'ladi. O'jar Roberto qachonki, jamoa o'yiniga mazmun kirsagina pastga tushishi haqida ogohlantirishni ham unutmadi. Xullas, Roberto shu ko'yi daraxt ustida naq 7 kun (!) o'tirdi. Bu orada sabr kosalari to'lgan futbolchilar uni chirigan mevalar bilan «toshbo'ron» qilgancha pastga tushishga undashdi. Biroq qaysar muxlis ularga javob tariqasida banan po'choqlarini uloqtirib, joyida o'tiraverdi. Muhabbat va nafrat chegarasi 2003 yili Svazilend milliy jamoasi Kabo-Verde termasi bilan kuch sinashib, durangga imzo chekdi-yu, muxlislar «qo'shini» balosiga uchradi. Ha, durang - futbolda uchrab turadigan natija. Lekin svazilendlik muxlislar Kabo-Verde jamoasidek kamtar raqibni engolmaslikni sharmandalik sifatida baholashdi. Xullas, ba'zi qiziqqon ishqibozlar qo'llariga beysbol tayoqlarini olib, futbolchilar o'tirgan avtobusni o'rab olishdi. Eng qizig'i, o'yinchilar ham bo'sh kelmay, avtobusdagi qo'lga ilinadigan buyumlar bilan «qurollanib», tashqariga chiqishdi... Xayriyatki, hammasi ommaviy mushtlashuvga aylanishi oldi olindi. Ya'ni voqea joyiga vaqtida etib kelgan politsiyachilar risoladagidek ishlab, muqarrar to'polonni o'z o'rnida bosdi-bosdi qilishdi.  Velosiped vositasida kalaka 2001|2002 yillar mavsumi. «Port Veyl» klubining ishlari mutlaqo chappasiga ketdi. Muxlislar uzluksiz omadsizliklarga uzoq vaqt sabr qilishdiyu, ammo yakunda toqatlari toq bo'ldi, baribir. Xullas, epchil ishqibozlardan biri velosipedini haydab, jamoa shug'ullanayotgan joyga bordi va futbolchilarni birin-ketin «shirin» haqoratlar bilan «siylay» boshladi. Klub vakillari o'z navbatida, uning ovozini o'chirish uchun bechorani to'p bilan nishonga olishga urinishdi. Biroq velosipedni mohirona haydagan fanat ancha chaqqonligini isbotlab, barcha zarbalarga chap bergancha futbolchilar asabini battar buzdi. Qolaversa, «Hattoki, Robbi Uilyams ham to'p bilan meni bemalol ag'dara olardi, sizlar esa...»,-deya jamoa a'zolarini rosa mazax qildi. Sevgi uchun kurash DAVOMI InterFutbol.uz ning Telegram dagi sahifasiga ulaning – eng so'nggi yangiliklar, qiziqarli bloglar va tahliliy materiallar endi bir to'plamda.
— deya xabar beradi uff.uz nashri.