Bugun vakillarimiz O'zbekiston Kubogi 1/8 final birinchi uchrashuvi doirasida Bekobodning “Metallurg” jamoasini qabul qiladi. Mazkur uchrashuvga doir qiziqarli ma'lumotlarni taqdim etamiz.
Kubokdagi birinchi to'qnashuv
Mazkur jamoalar bugun birinchi marta O'zbekiston kubogi doirasida maydonga tushishadi. Bu kunga qadar kubok o'yinlarida bekobodliklarga qarshi maydonga tushmaganmiz.
Kubokdagi so'nggi besh mavsum
Qo'qonliklar 1992 yildan beri o'tkazib kelinayotgan O'zbekiston Kubogi bahslarida 15 marta ishtirok etishgan. (Oldin “Temiryo'lchi” nomi ostida qatnashgan). Jamoamizning so'nggi beshta mavsumdagi ishtiroki bilan tanishing.
2002/2003 yili  guruh bosqichida birinchi o'riini olgan 1/8 finalda “Buxoro”ga yutqazgan. O'sha yili jamoa “Qo'qon-1912” nomi ostida ishtirok etgan.
Bir necha yil jamoamiz musobaqada qatnashmagan.
2013 yil. Birinchi bosqich texnik g'alaba, ikkinchi bosqichda “So'g'diyona” mag'lub etilgan. 1/8 finalda “Lokomotiv”ga yutqazilgan.
2014 yil. Birinchi bosqichda “O'z Dong Ju” ikkinchi bosqichda “Neftchi” penaltilar seriyasida mag'lub etilgan. 1/8 finalda “Paxtakor”ga mag'lub bo'lgan.
O'sha “Neftchi” bilan bo'lgan uchrashuvni hamon qo'qonlik futbol muxlislari maroq bilan esga olishadi.
2015 yil. Ikkinchi bosqichda “Xotira-79” mag'lub etilgan. 1/8 finalda “So'g'diyona”ga yutqazib quyilgan.
2016 yil. Ikkinchi bosqichda “NBU Osiyo” dog'da qoldirildi. 1/8 finalda ikki o'yin natijasiga ko'ra, “Navbahor”  mag'lub etildi. Chorak finalda “Buxoro” vakillari ikki o'yin natijasi buyicha vakillarimizdan ustun kelishgan.
Bu jamoalarning oxirgi o'yini
Bugun maydonga tushadigan bu jamoalar roppa-rosa bir oy oldin, ya'ni 22 aprel kuni O'zbekiston chempionati doirasida Qo'qondagi “Markaziy” o'yingohida to'qnash kelishgandi. O'sha uchrashuvni ko'tarinki ruhda o'tkazgan No''mon Hasanov shogirdlari raqibni yirik 3:0 hisobida mag'lubiyatga uchratishgandi. O'sha o'yinda Suhrob Berdiev bekobodliklar posbonini uch marta xafa qilgandi. Bugun ham vakillarimizdan ana shunday mazmunli o'yin kutib qolami.
Hakamlar
Bugun Qo'qondagi “Markaziy” o'yingohida bo'lib o'tadigan O'zbekiston kubogi 1/8 final birinchi uchrashuvi Akmal Rahimov boshchiligidagi hakamlarga topshirildi.
O'zbekiston Kubogi
1/8 final
Birinchi uchrashuv
«Qo'qon-1912» (Qo'qon) – «Metallurg» (Bekobod)
Hakamlar: A. Rahimov (Andijon), A. Sidorov (Toshkent), D. Saylalov (Toshkent), Sh. Nasibullaev (Namangan)
Nazoratchi: D. Roman (Toshkent).
Boshlanish vaqtlari
Bugun uchrashuv soat 17:30da boshlanadi. Barcha futbol muxlislarimizni stadionga chorlab qolamiz.
— deya xabar beradi uff.uz nashri.