Butun dunyo italiyalik hujumchi Franchesko Tottini futbol bilan xayrlashganini muhokama qilayotgan bir paytda Osiyo futbolida muhim xabarlar chiqishi boshlandi. Bu tabiiydir... Yaxshi bilasiz, yana sanoqli kunlardan keyin qit'amizda JCh-2018 saralash bosqichidagi eng dolzarb o'yinlar boshlanadi.
O'zbekiston milliy terma jamoasi Tehron shahrida Osiyo etakchisi bo'lgan Eronga qarshi 3-saralashning 8-turida maydonga tushadi. O'yinning qiymati va ahamiyatini ortiqcha izohlab o'tirmaymiz. O'rtada Rossiyadagi mundial chiptasi turibdi.
Bugun horij matbuotida Eron terma jamoasi bosh murabbiyi Karlos Keyrushning fikrlari bayon etildi. Darvoqe, forslar O'zbekistonga qarshi tayyorgarlik ko'rishni 27 may kuniyoq boshlab yuborishgan. Ayni paytda terma jamoa Avstriya davlatida tashkil qilingan 10 kunlik yig'inga ketgan.
"Endi har qachongidan ko'proq ter to'kishimizga to'g'ri keladi. Oldimizdagi barcha o'yinlarda 100% natijani ko'rsatishimiz kerak. O'zbekistonga qarshi o'yin esa, "match-point"ni anglatadi.
Ya'ni, bu bahsda O'zbekistonni engishimiz shart. Shunday imkoniyatni qo'ldan boy bersak yaxshi bo'lmas. Axir g'alaba bizga JCh-2018 yo'llanmasini taqdim etadi", - dedi Keyrush.
Ko'rib turganingizdek, Eron allaqachon bizga qarshi tayyorgarlikni boshlab yubordi. Ma'lum bo'lishicha, eronliklar ikki bosqichlik mashg'ulotlarga urg'u berishadi.
Samvel Babayam ham vaqtni boy bermasdan O'zbekiston termasining mashg'ulotlarini boshlashi kerak, deb hisoblaymiz. Zero, buyog'iga vaqt oz qolmoqda. Agar "Ozodi"dan mag'lubiyatga uchrasak guruhda 2-o'rinni olish imkonidan deyarli mahrum bo'lamiz.
— deya xabar beradi uff.uz nashri.