Ayni kunlarda Tailand poytaxti Bangkok shahrida Xalqaro og'ir atletika federatsiyasining hisobot-saylov Konferentsiyasi bo'lib o'tmoqda. 25 may kuni boshlangan mazkur Konferentsiyada yangi Olimpiya tsikli, ya'ni 2017-2020 yillarga federatsiya rahbariyatining yangi tarkibi saylandi. Uning yakunlariga ko'ra O'zbekiston og'ir atletika federatsiyasi raisining birinchi o'rinbosari Shahrillo Maxmudov Xalqaro og'ir atletika federatsiyasi Ijroiya Qo'mitasi a'zoligiga saylandi. Shu paytgacha Shahrillo Sharipovichning Xalqaro federatsiyadagi lavozimi Texnik Qo'mita a'zoligi edi.
Shuningdek, Xalqaro og'ir atletika federatsiyasi Prezidenti etib, 12 yildan buyon shu lavozimda ishlab kelayotgan vengriyalik Tomash Ayan qayta saylandi. Xalqaro og'ir atletika federatsiyasi Bosh kotibligi ayni paytga qadar Osiyo og'ir atletika federatsiyasi Bosh kotibi lavozimida ishlab kelgan iroqlik Muhammad Hasan Jaludga ishonib topshirildi. Saylov natijalariga ko'ra, Birinchi vitse prezident lavozimiga tailandlik Intarat Yodbangtoy nomzodi ma'qullandi.
Ovoz berish yo'li bilan ruminiyalik Niku Vlad, perulik Xose Karlos, qozorg'istonlik Janat Tussupbekov va chexiyalik Petr Krol Xalqaro federatsiya vitse-prezidentligiga saylanishdi. Navbatdagi saylov bu Osiyo og'ir atletika federatsiyasi saylovi bo'lib, u joriy yilning 20-30 iyul kunlari Nepalda o'tkaziladigan yoshlar va o'smirlar o'rtasidagi Osiyo chempionati davomida, mamlakat poytaxti Katmanduda o'tkazilishi rejalashtirilgan.  
O'zbekiston Milliy olimpiya qo'mitasi mamlakatimizda og'ir atletika sport turining rivojlanishiga salmoqli hissa qo'shib kelayotgan mutaxassis, O'zbekiston og'ir atletika federatsiyasi raisining birinchi o'rinbosari, Xalqaro og'ir atletika federatsiyasi va O'zbekiston Milliy olimpiya qo'mitasi Ijroiya Qo'mitalarining a'zosi Shahrillo Mahmudovga kelgusi faoliyatida ham omad va zafarlar tilab qoladi.
O'zbekiston Milliy olimpiya qo'mitasi
matbuot xizmati
— deya xabar beradi uff.uz nashri.