Nukusda 1 iyun – Xalqaro bolalarni himoya qilish kuni munosabati bilan “Sport barcha uchun va har birimiz uchun” shiori ostida minifutbol bo'yicha musobaqa bo'lib o'tdi.
Tadbirga yordamchi maktab-internatlarida hamda uy sharoitida ta'lim olayotgan imkoniyati cheklangan bolalar taklif etildi. Bolalarga quvonch ulashish maqsadida tashkil etilgan teatrlashtirilgan o'ziga xos madaniy sport bayramida Qoraqalpog'iston Respublikasi davlat qo'g'irchoq teatri aktyorlari ijrosida turli ertak qahramonlari ham ishtirok etdi.
– Sevimli ertak qahramonlari bilan futbol o'ynab, raqib darvozasiga gol kiritish bolalar uchun g'oyat maroqli bo'ldi, – deydi nukuslik Suluvxon Omonova. – Bolalarimiz qalbiga olam-olam quvonch bag'ishlagan bunday tadbir tashkilotchilariga minnatdorlik bildiramiz.
Tadbir so'ngida bayram dasturxoni yozilib, bolalarga sovg'alar ulashildi. San'atkorlar ijrosida yangragan kuy-qo'shiqlar bayramga yanada zavq bag'ishladi.
Manba: UzA, olamsport.com
— deya xabar beradi uff.uz nashri.