Portugaliyaning “Benfika” klubi darvozabon Edersonning “Manchester Siti” futbolchisiga aylanganini rasman tasdiqladi. Ma'lum bo'lishicha, “shaharliklar” futbolchi transferi uchun “Benfika”ga 40 mln evro to'lagan. Bu esa “Manchester Siti” futbol tarixidagi eng qimmat darvozabonni sotib olib, dunyo rekordini yangilaganidan darak beradi. Eslatib o'tamiz, 2001 yil Turinning “Yuventus” klubi Janluijji Buffonni “Parma”dan 32,6 mln funt evaziga sotib olib, futbol tarixida rekord o'rnatgandi. Endilikda ushbu rekord “Manchester Siti”ga tegishli bo'lib turibdi. Norasmiy ma'lumotlarga ko'ra, 23 yoshli braziliyalik darvozabon yangi jamoasi bilan 5 yillik shartnoma imzolagan.
— deya xabar beradi uff.uz nashri.