Shu kunlarda «Nitstsa» ofisi «Barselona», «Arsenal» va «PSJ» kabi grandlar tomonidan jo'natilgan kazo-kazolar bilan gavjum. Boisi, jamoaning Kot-d`ivuarlik yarim himoyachisi Jan-Mikael Seri yakunlangan mavsum shu qadar effektli va samarali o'ynadiki, ko'pchilik beixtiyor unga alohida nazar solmoqda. Transfer tarixi «Nitstsa» 2 yilcha oldin ham mavsumni o'ta omadsiz yakunlagandi. O'sha vaqt bosh murabbiy vazifasini bajargan Klod Pyuel qo'lidan kelganicha  vaziyatni o'nglashga urindi, tirishdi. Biroq moliyaviy imkoniyatlar cheklangani bois, u tarkibni o'zi istagandek, kuchaytirolmasdi. Deylik, murabbiy tanglik holatidan chiqib ketish ilinjida o'z o'g'lini ham majburan maydonga tushirgan va bu klub muxlislariga aslo yoqmagandi. Qisqasi, Pyuel o'sha mavsum «burgutchalar» yordamida bir amallab, jamoani elitada olib qolishga erishdi. Yozda esa hamma Hatem Ben Arfaning qaytishini intiqlik bilan kutib turgan bir payt jamoaning 2015 yil davomidagi asosiy transferi amalga oshirildi. Gap Kot-d`Ivuar milliy jamoasining asosiy o'yinchilaridan biriga aylangan Jan-Mikael Seri haqida ketmoqda. O'shanda ixcham jussali yigitcha hech kimda ortiqcha taassurot qoldirmagan, «Pasush de Ferreyra» (Portugaliya) klubi atigi 500 ming evro tufayli undan osongina voz kechib qo'ya qolgandi. Portugaliya klubi saviyasi mutaxassilarga ham, ko'plab muxlislarga ham yaxshi ma'lum. Serining taqdimot marosimida ishtirok etgan klub vakillari turli e'tirozlarga munosib javob berishdi: «Xo'sh, deylik, bu yigitdan voz kechdik ham, 500 ming evroga yana kimni xarid qilishimiz mumkin?» Qarangki, matbuot va muxlislar tomonidan xushlamaygina qabul qilingan Jan-Mikael hech narsaga parvo qilmay, «Nitstsa»dagi dastlabki o'yinlardanoq bor e'tiborni o'ziga qaratdi. Umuman, jamoa o'yini hayratlanarli tarzda o'zgardi, debyutant dadillik bilan etakchilikni o'z zimmasiga oldi. Natijada ko'pni ko'rgan tajribali muxlislar Serini o'yin uslubi bo'yicha tan olingan  Xavi va Andres Inestaga qiyoslay boshlashdi. Mana, vaqt o'tishi bilan bu o'xshatish nechog'li o'rinli ekanligi isbotlandi - «notanish» yarim himoyachi 2016|2017 yillar  mavsumi yakuni bo'yicha Frantsiya elit ligasining eng yaxshi futbolchisi maqomiga da'vogar nomzodlar ro'yxatidan joy oldi. To'g'ri, yakunda sovrin Edinson Kavaniga nasib etdi. Shunga qaramay, afrikalik legionerga munosib baho berish shart. Axir u frantsuzlar chempionatiga Kavani kabi nomdor «Napoli»dan emas, balki kamtaringina «Pasush de Ferreyra» klubidan o'tgandi. Umumiy ma'lumot, hozirgi holat Hozir Serini «ovlash» mavsumi ochiq. Qit'aning eng etakchi chempionatlari nihoyasiga etgach, «Marsel», «Monako», «PSJ», «Arsenal» va «Barselona» kabi jamoalar skautlari munosib yarim himoyachi topish ishlarini boshlab yuborishdi. Ular xususan, Seriga befarq qarashmayapti. «Nitstsa» o'z navbatida, «ovchilar»ga qarshilik ko'rsatish niyatida emas, chunki klub rahbariyati ivuarlik iqtidor sohibini tarkibda olib qolish oson emasligini yaxshi tushunib turibdi. Aslini olganda, «Nitstsa» prezidenti Jan-Per River vaziyatni birozgina bo'rttirib ko'rsatayotgandek. Chunonchi, «burgutchalar» so'nggi vaqtlar ishonchli parvoz qilishni ancha o'zlashtirib olishdi. Shunga muvofiq, klubning moliyaviy imkoniyatlari nisbatan yaxshilandi. Qo'shimchasiga, jamoa ChLga yo'l ochdiki, endi xalqaro turnirdagi ishtirok uchun oladigan mukofot puli vositasida o'z etakchisini bemalol tarkibda saqlab qolishi mumkin. Ammo bunday kamtarin jamoalarning bitta transfer orqali kamida 25 mln. evro ishlash imkoniyatidan voz kechishi ham juda-juda qiyin. Boz ustiga, «Nitstsa» Seriga o'xshagan xilma-xil taqdir sohiblari uchun tramplin vazifasini o'taydigan klub sifatida tanilgan. Mana, birgina Serining o'zi jamoa g'aznasini 2015 yili sarflangan xarajatdan 50 baravar (!) ko'proq mablag' bilan to'ldirishi mumkin. 2 yil davomida futbolchiga berilgan kamtarona ish haqi va bosh-qa sarflarni ayirib tashlash bilan tushumning salmog'i kamayib qolmaydi. Xo'p, «Nitstsa» ko'zlayotgan foyda miqdoriku oz emas, ammo futbolchining mahorati shunga yarashami? Maydonda qanday yumushlarni bajaradi? DAVOMI InterFutbol.uz ning Telegram dagi sahifasiga ulaning – eng so'nggi yangiliklar, qiziqarli bloglar va tahliliy materiallar endi bir to'plamda.
— deya xabar beradi uff.uz nashri.