Krishtianu Ronaldu va Messidan so'ng eng kuchli futbolchilardan biri sifatida e'tirof etiladigan, yosh bo'lishiga qaramasdan ko'plab yutuqlarga erishgan va allaqachon Braziliya terma jamoasining etakchisiga aylangan futbolchi. «Barselona»da Messining yo'qligini bilintirmay jamoani o'z ortidan ergashtira oldi va shubhasiz «Blaugrana» ning ayni paytdagi eng yaxshi o'yinchisi. Ushbu fikrlar to'liq ismi Neymar da Silva Santos Junior haqidaligi barchamizga ayon. Lekin yana shunday jihatlar borki bu haqida ko'pchilik eshitmagan bo'lsa kerak. Biz quyida Neymarga oid shunday faktlar borasida to'xtalib o'tamiz.   
   
14 yoshida deyarli «Real»ga o'tgan edi
San-Paulu chempionatining yoshlar ligasidagi porlagan yosh iqtidor egasi tez orada  skautlar hayolini o'g'irladi va uning uchun kuchli klublar orasida kurash boshlandi. 2006-yil «Real Madrid» jamoasi birinchilardan bo'lib  futbolchini o'z akademiyasiga taklif qildi. Madridga borib barcha testlardan o'tgach, uning o'zi ham u erda qolishni xohladi. Lekin agenti va otasi tomonidan hujumchi uchun talab qilingan mablag' «Qirollik klubi» uchun qimmatlik qildi. Braziliyaning Santos jamoasi esa bu orada kerakli mablag'ni to'ladi va shu tarzda Neymar Braziliyaga qaytib faoliyatini davom ettirdi.
Ilk bor « Vest Xem » dan Evropaga jiddiy chorlov
2010-yil Neymar «Santos» tarkibida San-Paulu shtati kubogini qo'lga kiritish orqali o'zining kattalar futbolidagi  dastlabki sovringa ega bo'ldi va shu bilan birga ushbu turnirning eng yaxshi o'yinchisi nomiga sazovor bo'ldi. Yana shu yili Braziliya kubogi doirasida «Guaran»ga qarshi bahsda raqib darvozasini 5 bor ishg'ol etib yakunda mamlakat kubogida g'olib bo'ldi. Hujumchi esa 11 gol bilan turnir to'purarligini o'ziniki qildi. Ushbu natijalardan so'ng Angliyaning «Vest Xem» jamoasi Neymarni o'z safiga chorladi va u uchun 15 million evro taklif qildi. Lekin «Santos» buni rad etdi. Keyinroq «Chelsi» ham futbolchi uchun 20 million evro to'lashga tayyorligini bildirdi, biroq bu safar ham taklif qabul qilinmadi va Neymar jamoasi bilan shartnomasini uzaytirdi.
19 yoshda ota bo'lgan
Messi ota bo'lganida butun dunyo gapirdi. Lekin Neymarning farzandli bo'lganini deyarli hech kim bilmadi. 2011-yil 17 yoshli dugonasi Karolina unga o'g'il tug'ib berdi va chaqoloqqa David Lukka deb deb ism qo'yildi. Buni hujumchi ancha vaqt ommadan sir tutdi. Yosh ota bo'lish borasida Neymar Messidan ancha oldinda.
Tug'ilgan kunida 100-golini urgan    
2012-yil 5-fevral kuni Palmeyras darvozasiga ikki to'p kiritgan hujumchi bu bilan  professional faoliyatidagi o'zining 100-golini urdi. Aynan shu kuni uning tug'ilgan kuni edi. O'sha kuni Neymar 20 yoshini va 100-golini nishonladi. 20 yoshda 100 gol darhaqiqat supernatijadir.  
Davomi Zohid Akramov blogida.
— deya xabar beradi uff.uz nashri.