«Bunyodkor» klubi «Darvozabon – yarim jamoa!» shiori ostida ochiq mashg'ulot o'tkazdi.
Unda asosiy jamoa darvozabonlari murabbiyi Abdusattor Rahimovdan tortib to akademiyada tarbiya topayotgan eng yosh posbongacha jami 35ta darvozabon qatnashdi. Tadbir “Bunyodkor”ning asosiy stadionida qariyb ikki soatga yaqin davom etdi. Unda darvozabonlar bu amplua vakillarining mashg'ulotlar jarayonidagi harakatlari naqadar mashaqqatli ekanligini amalda namoyish etib berishdi.
Ochiq mashg'ulotni kuzatib borgan “Bunyodkor” FK Bosh direktori Baxtiyor Boboev va futbol maktabi direktori Sergey Lushchanning tadbir haqidagi fikrlari bilan qiziqdik.
Baxtiyor BOBOEV (“Bunyodkor” FK bosh direktori):
- Bugungi tadbirni tashkil etishdan asosiy maqsad ushbu ampluaga bo'lgan qiziqishni yanada kuchaytirishdir. Mana ko'rib turganingizdek, futbol maktabimizda tarbiya topayotgan yosh posbonlar Pavel Bugalo, Murodjon Zuhurov, Akbar To'raev singari darvozabonlar bilan birga shug'ullanishib, o'z tajriba zaxiralarini boyitib borishmoqda. O'ylaymanki, bugungi tadbir yosh darvozabonlarimiz uchun foydali bo'ldi.
Sergey LUShChAN (“Bunyodkor” futbol maktabi direktori):
- Bilasizmi, keyingi mavsumdan boshlab O'zbekistonda xorijlik darvozabonlar limiti olib tashlanadi. Shunday ekan, darvozabon ampluasiga bo'lgan qiziqishni yanada oshirishimiz, hozirda darvozabon sifatida shug'ullanayotganlarga o'z e'tiborimizni kuchaytirishimiz kerak. Bugungi ochiq mashg'ulotni tashkil etib, “Bunyodkor” futbol maktabida shug'ullanayotgan yosh darvozabonlarga xursandchilik ulashdik, deb o'ylayman. Chunki Bugalo, Zuhurov va To'raev singari darvozabonlar bilan bir safda hamma ham mashg'ulot o'tkazishni istaydi.
— deya xabar beradi uff.uz nashri.