O'tgan shanba kuni poytaxtimizdagi muhtasham O'zbekiston sport majmuasida oliy liga hakamlari, O'zbekiston Oliy sudi xodimlari va sport jurnalistlari o'rtasida mini-turnir bo'lib o'tdi. Sog'lom turmush tarzini targ'ib qilish maqsadida o'tkazilgan bu tadbirda to'rt jamoa g'oliblik uchun kurash olib bordi.
Avvaliga jurnalistlar jamoasi Mudofaa vazirligi kubogi-2015 sohibi bo'lgan Oliy sud jamoasining asosiy tarkibiga imkoniyatni boy berdi. Ikkinchi juftlikda Ravshan Ermatov sardorligidagi oliy ligada faoliyat olib borayotgan hakamlar guruhi Oliy sudning ikkinchi tarkibiga qarshi bahs olib borib g'alaba qozondi. Yarim finalda mag'lubiyatga uchragan jamoalar o'zaro uchinchi o'rin uchun kechgan o'yinda maydonga tushishdi va unda sport jurnalistlari jamoasi raqiblarini engishni uddalashdi.
Oliy sud raisi o'rinbosari Rahimjon Obidov sardorligida maydonga tushgan Oliy sud xodimlari va oliy liga hakamlari o'rtasida kechgan hal qiluvchi final uchrashuvining asosiy vaqti jangovar durang bilan yakunlandi. Hattoki, penaltilar seriyasida ham kuchlar teng keldi. Bu holatda ikki tomon o'zaro kelishgan holda penaltilar seriyasini davom ettirmaslikni lozim topishdi. Ya'ni, uchrashuvda do'stlik g'alaba qozondi. Shu kuni majmuaga kelgan turli soha vakillari sport maydonchasidagi bahsdan ko'z uzishmadi. Barcha jamoalar vakillari juda yaxshi jismoniy tayyorgarlikka ega ekanliklari yaqqol ko'rindi.
Sog'lom turmush tarzi tarafdorlari safi mana shunday uchrashuvlar bois kengayib borishi shubhasiz. Darvoqe, shu kuni bolalar o'rtasida tashkil etilgan bayram ishtirokchilari Ravshan Ermatov bilan birgalikda esdalik uchun suratga tushishdi. Do'stona turnir barchada yorqin taassurot qoldirdi. Bunday uchrashuvlarni an'anaviy tarzda o'tkazishga kelishib olindi. Biz mini-turnir yakunida Ravshan Ermatov va Abduhamidullo Rasulovning fikrlari bilan qiziqdik.
- Bugungi turnirda ishtirok etganimizdan xursandmiz, - dedi R.Ermatov. - Taklif qilishgan paytda bajonidil rozi bo'ldik. Chunki bu bilan sog'lom turmush tarzi targ'ibotiga oz bo'lsada xissa qo'shamiz. Qolaversa, o'zimiz uchun ham foydali. Futbolchilik faoliyatim yodimga tushdi. Darvozani ishg'ol qilish esimdan chiqmabdi (kuladi). To'g'ri, turnirda rasman g'olib aniqlanmadi. Lekin bunga juda yaqin edik. So'nggi daqiqada gol o'tkazib yuborib, asosiy vaqtda g'alaba qozonish imkoniyatini yo'qqa chiqardik. Lekin bundan aslo xafa emasmiz. Turnirda qatnashgan barcha jamoalarning saviyalari deyarli teng ekan. O'ylaymanki, bu musobaqa an'anaviyligini saqlab qoladi va ishtirokchilar safi yanada kengayadi. Menga eng ma'qul kelgan yana bir holat - yosh futbolchilar bilan o'tkazilgan fotosessiya bo'ldi. Ular bilan bajonidil suratga tushdik.
- Kelgusida rejalar qanday?
- 18 noyabr kuni brigadamiz bilan birga Xitoyga jo'nab ketamiz. U erda OChL-2015ning final uchrashuvini boshqaramiz. 21 noyabr kuni Guanchjou shahrida o'tkaziladigan o'yinda Xitoyning "Guanchjou Evergrand" hamda BAAning "Al-Ahli" jamoalari o'zaro to'qnash kelishadi. Menga qanotlarda Abdulhamidullo Rasulov va Jahongir Saidov yordam berishadi. To'rtinchi hakam ham o'zimizdan - Valentin Kovalenko. Shundan so'ng to'g'ri Hindistonga yo'l olamiz. Ushbu mamlakat futbol federatsiyasi tomonidan super-liga o'yinlarini boshqarish bo'yicha taklif olganmiz. Keyin esa har yili an'anaviy tarzda o'tkazib kelinayotgan hakamlar seminarida ishtirok etamiz. Ko'rib turganingizdek, yangi yilgacha dam olish yo'q.
Shundan so'ng Abduhamidullo Rasulov ham o'z fikrlari bilan o'rtoqlashdi:
Davomi InterFUTBOL gazetasi blogida.
— deya xabar beradi uff.uz nashri.