20 noyabr kuni “Interfutbol” gazetasining rasmiy sayti “www.interfutbol.uz”da jurnalist Zafar Qosimovning “Vaqt ixtiyoriga havola masala yoki yana “Loko” haqida” maqolasi chop etildi. (Maqolani ushbu havolada o'qishingiz mumkin: http://interfutbol.uz/uz/story/26085/vaqt-ihtijoriga-xavola-masala-joki-jana-loko-xaqida)
Maqolada muallif “Lokomotiv” futbol klubi haqida fikr bildirgan hamda klub olib borayotgan futbol siyosatiga to'xtalgan. Lekin shuni aytib o'tish joizki, maqolani yozishdan oldin jurnalist vaziyatni obdon o'rganmay, shosha-pisha bir nimalarni qoralagan. Bu xuddi tez nimadir yozib bering, gazetani bosmaga berishimiz kerak, bo'sh sahifa qolyapti degan gapga o'xshaydi.
Ma'lumki, “www.interfutbol.uz” saytida asosan gazetada chop etilgan materiallar berib boriladi. Ammo gap bunda emas, gap shundaki, maqolani o'qir ekansiz, muallifning konkret nima demoqchi ekanligini yaxshi tushunmaysiz. Qolaversa, Zafar Qosimov “Lokomotiv” ishtirokidagi o'yinlarni ko'rmay turib fikr bildirgan.
Ehtimol, Z.Qosimov “Loko” ishtirokidagi o'yinlarni “Sport” telekanali orqali ko'rgan bo'lishi mumkin, lekin bu ham uning ko'p narsadan xabardor ekanini bildirmaydi. Zafar Qosimov klub ichidagi muhitni, klub strukturasini hamda klubning ish yuritishi tizimini o'rganmay, klub rahbariyati, futbolchilar yoki murabbiylar bilan gaplashmay turib shunchaki xayoliga nima kelsa shuni yozib tashlagan. Natijada material ancha xom hamda bir yoqlama bo'lib qolgan.
Maqola shunday boshlanadi: «Lokomotiv» – o'zbek futbolida tashkil etilgan megaloyihalar ichida eng omadsizi, desak mubolag'a bo'lmas”. Va mana shu birinchi gapning o'zidayoq muallif xato fikrlayotgani ko'rinib qolgan. Avvalo megaloyiha nima va bu ta'rif nima uchun “Lokomotiv”ga nisbatan ishlatilmoqda degan savol kelib chiqadi. To'g'ri, “Lokomotiv” o'z oldiga yuqori maqsadlarni qo'ygan jamoalardan biri hisoblanadi, lekin megaloyihalar ichida eng omadsizi nima degani? Buni muallif qanday tushuntirib bera oladi?
Maqolaning davomini o'qir ekansiz, jurnalistning nima demoqchiligini haminqadar anglagandek bo'lasiz. “Klub o'z oldiga ulkan maqsadlar qo'ydi, tarkibga kuchli futbolchilarni jamladi, ammo na natija va na jamoa imijini yaxshilash borasida biror yutuqqa erisha oldi”. Mana shu erda to'xtang! Klub o'z oldiga yuqori maqsadlarni qo'ydi, bunga qo'shilamiz, tarkibga kuchli futbolchilarni jamladi, bungayam qo'shilamiz, ammo na natija va na jamoa imijini yaxshilash borasida biror yutuqqa erisha oldi, mana shu joyiga kelganda “Lokomotiv”ning avvalgi yillari erishgan yutuqlari havoga uchib ketyaptimi? Axir jamoa imiji oldinga yillarga nisbatan kuchayib, natijalar ham ijobiy ko'rinish oldi-ku.
To'g'ri, klub o'tgan besh yil ichida Kubok va Superkubokni qo'lga kiritish bilan cheklandi, ammo O'zbekiston chempionatidagi uchinchi va ikkinchi o'rinlar, o'rin emasmi? Bunda hech kimning xizmati yo'qmi, yoki hammasi o'z-o'zidan sodir bo'lib qoldimi? Muallif o'z maqolasida “Loko” o'yinlari paytida stadion to'lmayotganini haqiqiy fojiaga tenglashtirgan. Kechirasiz-u, fojia urushda bo'ladi, futbolda emas. Agar jurnalist mana poytaxtning boshqa ikki klubi “Paxtakor” va “Bunyodkor” o'yinlarida stadion to'lyapti, nimaga “Loko” shu ishni amalga oshira olmayapti deganda-ku boshqa gap edi.
Shu o'rinda Z.Qosimovga bir savolimiz bor: siz jurnalist bo'la turib bu yil hisobdan “Lokomotiv”ning qaysi o'yinlariga keldingiz? Hech bo'lmasa beshta o'yinni sanab bera olasizmi? Yoki bo'lmasa stadion nima uchun to'lmayotgani bilan hech qiziqib ko'rdingizmi? Nafaqat “Lokomotiv”, balki boshqa joylarda ham stadionlar to'lmayotgani bor gap-ku. To'g'ri, klub uchun sarflangan pulni natija va muxlislar soniga tenglashtirib, foydalilik koeffitsientiga ajratsak kamtarona raqamlarga ko'zimiz tushadi. Lekin poytaxtning mana shu jamoasi bu borada foydaga kirdi deb kimnidir ko'rsata olasizmi?
Balki siz hamma o'z klubiga javob bersin, boshqalarni misol keltirmasin deyishingiz mumkin, lekin shuni unutmangki, futbol – bu sport va bunda raqobat bor. 16ta jamoa yil bo'yi kimo'zarga raqobatlashadi, shunday ekan raqobat va kurash bor joyda albatta o'zaro solishtiruv bo'ladi. Oliy ligani kuchaytirish uchun faqat bitta yoki ikkita klubning kuchayishi kamlik qiladi. Buning uchun hamma birdek harakat qilishi shart. Endi “Lokomotiv”ning shuncha futbolchini yig'ib ham chempion bo'la olmayotgani boshqa masala, chunki futbolda eng zo'r tarkibni yig'ish chempionlik cho'ntakda degan xulosani bermaydi. Buni o'zingiz ham yaxshi bilasiz.
Muallif o'z maqolasida hozirgi “Lokomotiv”ni oliy ligaga endi chiqqan paytlardagi “Bunyodkor”ga qiyoslagan. “Bunyodkor” Osiyo darajasida hamon juda yaxshi tanish degan. Buni aniqlash uchun boshqa davlatlarga borib “Bunyodkor” haqida nimalarni bilasiz deb so'rash kerak bo'ladi. Shundagina aniq gap aytish mumkin. “Lokomotiv”dan farqli o'laroq “Bunyodkor”ning oz bo'lsa-da fidoyi fanatlari bor deydi muallif. Shu o'rinda sizga yana bir savol: “Lokomotiv”ning jonkuyar muxlislari bor-yo'qligini siz qaerdan bilasiz? Qaysi muxlisini taniysiz? Yoki kimdir sizga kelib “Men “Lokomotiv”ning fidoyi bo'lmagan muxlisiman” deb aytganmi?
Faqat bir narsaga qo'shilish mumkin, bu ham bo'lsa “Bunyodkor”ning “Lokomotiv”ga nisbatan marketing borasida ilgarilab ketgani. “Lokomotiv” professional klub darajasiga harakat qilmoqda va kamchilik, xatolarimiz bo'lsa buni aytishdan uyalmaymiz. Lekin shuni unutmangki, “Lokomotiv”da ham OAV va muxlislar bilan iliq munosabatlar yo'lga qo'yilgan. “Lokomotiv” shu paytgacha hech bir jurnalist yoki muxlisni sen o'yinga kirmaysan deb stadiondan chiqarib yuborgan emas.
Jurnalist o'z maqolasida davom etar ekan, “Lokomotiv”ni avvalgi “Bunyodkor”ning ojizroq nusxasi degan. Va mana shu gap ham tushunarsiz. Futbolda har bir klubning o'z tanlagan yo'li bor. Ma'lumki, “Lokomotiv” – “O'zbekiston temir yo'llari” aktsionerlik jamiyatiga qarashli klub hisoblanadi. “O'zbekiston temir yo'llari” kompaniyasiga sportga, xususan futbolga nihoyatda qiziquvchi rahbarlar kelishi natijasida “Lokomotiv”ga bo'lgan e'tibor kuchaydi. Axir oliy ligada klublar moliyaviy jihatdan qancha baquvvat bo'lsa, shuncha yaxshi emasmi?
Hozirgi rahbariyat faqat jamoaning asosiy tarkibi bilan kifoyalanib qolayotgani yo'q, o'rinbosarlar jamoasi, bolalar va o'smirlar maktabi, futzal klubi, qizlar jamoasiga ham birdek e'tibor bermoqda. Eng muhimi, klub to'g'ri yo'ldan ketmoqda. Lekin infratuzilmani birdaniga ko'tarib bo'lmaydi, buning uchun yillar kerak bo'ladi. Evropada ham klublar va futbol birdaniga kuchayib qolgan emas. Eng muhimi, “Lokomotiv” rahbariyatida klubni rivojlantirish borasida reja va maqsadlar bor va buning uchun kerakli ishlar amalga oshirilmoqda.
Bundan tashqari, hurmatli muallif to'rt muxlisning ikkita nog'orani chalib turgani bilan ish bitarmikan deb muxlislar ustidan kulmoqchimiz, klub ustidanmi yo futbolimiz ustidanmi? Madomiki siz jurnalist bo'la turib o'yinlarga kelmayotgan ekansiz, vaqt ajratib stadionga kelayotgan o'sha kam sonli muxlislarda nima ayb?
Muallif shuningdek, “Lokomotiv” futbolchilarida pul ko'p, ularni oldinga undaydigan motivatsiya qolmadi deya o'z fikrini bildirgan. Hurmatli Zafar Qosimov, agar siz “Loko” futbolchilarida ishtiyoq yo'qolib qoldi deb o'ylayotgan bo'lsangiz, unda mashg'ulotlarga kelib futbolchilarning qanday ishlayotganini avval o'z ko'zingiz bilan ko'ring, keyin fikr bildiring. Ayrim o'yinlarni hisobga olmaganda, “Lokomotiv” butun mavsumni yuqori tempda o'tkazdi. Hech ikkilanmay aytishimiz mumkin, “Lokomotiv” oliy ligada eng chiroyli va hujumkor futbol namoyish etadigan jamoa hisoblanadi. Agar bunga shubhangiz bo'lsa, muxlislardan so'rang. Bundan tashqari, “Lokomotiv” doim halol o'ynaydi. Nahotki, shu ham kamlik qilsa?
Menejment qanday ish yuritishini esa klub rahbariyati belgilab beradi. Bu borada shuni aytishimiz mumkin, “Lokomotiv”da klub boshqaruv tizimi bir maromda ishlayapti. Aytib o'tganimizdek, rahbariyat tomonidan asosiy jamoaga qanday e'tibor bo'lsa, yoshlar, bolalar, futzalchilar, qizlarga ham shunday e'tibor berilmoqda. “Lokomotiv” futzal klubi Osiyo chempionatiga borib kelgani, futbol maktabimiz tarbiyalanuvchilarining Moskva va Antaliyadagi musobaqalarda muntazam ishtirok etayotgani fikrimizga dalil bo'la oladi.
«Bunyodkor» futbolchilari nimanidir isbotlash uchun ham o'ynaganlar deydi muallif. Ya'ni, “Lokomotiv” futbolchilarida isbotlash uchun hech nima yo'q, ular shunchaki maydonga tushib to'p tepyapti demoqchimisiz? Agar shunday bo'lsa, unda “Lokomotiv” nima uchun turnir jadvalining yuqorisida yuribdi? Agar futbolchilar hafsalasiz futbol o'ynaganida bu g'alabalar qaerdan kelardi? Har holda osmondan tushib qolmasdi, to'g'rimi? Qolaversa, sizning «Lokomotiv» shuncha yillik mehnati bilan erdan ko'tarilishni ham uddalay olmadi deganingiz umuman bo'lmagan gap. Chunki “Lokomotiv” oxirgi uch yil ichida o'z tarixidagi eng yuqori natijalarni qayd etdi.
Ma'lumki, “Lokomotiv” uy uchrashuvlarini ikkita stadionda o'tkazadi: TTYMI stadioni va “Lokomotiv” stadionida. Ehtimol, bu muxlislarga noqulaylik tug'dirayotgan bo'lishi mumkin, bunga qarshiligimiz yo'q. Ammo ikkita joyda o'ynashning ham o'ziga yarasha sabablari bor va sabablari haqida bilishni istasangiz, marahamat, klubga murojaat qiling. Savolingiz ochiq qolmaydi. Yana shuni aytishimiz mumkin, jamoa qaysi stadionda to'p tepishini hal qilish faqat klub rahbariyatiga bog'liq masala emas.
Jurnalist Zafar Qosimov o'z maqolasini shunday tugatgan: “Hozirgi «Lokomotiv» aro yo'lda sarson qolgan yo'lovchini eslatadi. Manzil sari olib boradigan yo'lda davom etishga madori etmaydi, sillasi qurigan, charchagan. Ortga qaytay, desa, shuncha yo'l bosgan, ayni damgacha sarflagan vaqti, barcha sa'y-harakatlari uvol. Endi nima bo'ladi? Bu savolga shiddat bilan o'tib borayotgan vaqt javob topib beradi…”
Bu borada shuni aytishimiz mumkin, hozirgi “Lokomotiv” aro yo'lda qolgan yo'lovchi emas, bil'aks yangi va ulkan maqsadlar sari ko'tarilayotgan klub bo'lishga harakat qilmoqda. Shuningdek, “Lokomotiv”ning sillasiyam qurimagan, charchamagan ham. Qolaversa, klub rivoji uchun amalga oshirilgan ishlar va barcha sa'y-harakatlar umuman uvol bo'lgani yo'q. Buni klubga aloqasi bor istalgan odamdan so'rashingiz mumkin. Endi nima bo'ladi degan savolga esa quyidagicha javob beramiz: “Lokomotiv” futbol klubi rivojlanish, o'zbek futbolida o'z o'rniga ega bo'lish hamda o'zbek futboli rivoji uchun kuchayishda davom etaveradi. “Lokomotiv” PFK matbuot xizmati
— deya xabar beradi uff.uz nashri.