Qatar poytaxti Doha shahrida boks bo'yicha kattalar o'rtasida o'tkazilayotgan jahon chempionatida mamlakatimiz charm qo'lqop ustalari zafarli odimlashda davom etishmoqda.
Hozirgina eng og'ir vazndagi bokschimiz Bahodir Jalolov (+91 kg) ham o'zining birinchi jangini g'alaba bilan yakunladi. Jazoir vakili Muhammad Grimesga qarshi bahs yuritgan hamyurtimiz raqibidan ancha ustun ekanligini namoyish etdi va 3:0 hisobida g'alaba qozondi. Bahodir Jalolov 9 oktyabr kuni o'tkaziladigan nimchorak finalda kubalik Liner Peroga qarshi ringga ko'tariladi.
Shu tariqa, bugun ringga ko'tarilgan uch nafar charm qo'lqop ustalarimiz Elnur Abduraimov (-60 kg), Elshod Rasulov (-81 kg) va Bahodir Jalolov (+91 kg) dastlabki g'alabalarni qo'lga kiritib, sovrinli o'rinlar uchun kurashni davom ettiradigan bo'ldilar.
Eslatib o'tamiz, birinchi kun bo'lib o'tgan musobaqalarda Murodjon Ahmadaliev (-56 kg) va Bektemir Meliqo'ziev (-75 kg) raqiblari ustidan ionchli g'alabalarni qo'lga kiritishgan edi.
Ikkinchi kungi musobaqalar yakuniga ko'ra jahon chempionatiga yo'l olgan jami 9 nafar charm qo'lqop ustalarimizdan 5 nafari dastlabki bosqichdan muvaffaqiyatli o'tdilar. Qolgan to'rt nafar bokschimiz endi bahslarga kirishadilar. Shavkat Jalilov
Manzil: O'zbekiston Milliy Olimpiya qo'mitasi matbuot xizmati
— deya xabar beradi uff.uz nashri.