Yangicha dunyoqarash va zamon bilan hamnafas yashash hozirgi rivojlangan davrning shavqatsiz qonunidir. Zamondan bir kun ortda qoldingmi, tamom. Muammolaring yana bittaga ko'payadi. Zamondan ortda qolayotgan chempionatimizning ham muammolari ko'paymoqda.
Tanqid doimo achchiq bo'lib kelgan. Shunday bo'lsada bugun ichimdagi dardimni to'kib solishga majburman. O'ylaymanki, men ko'tarmoqchi bo'lgan mavzu har bir vijdonli o'zbek muhlisini ham qiynayotgan bo'lsa ajab emas.
Esimni taniganimdan buyon futbolga mehr berganim uchun, jahon futboli, hususan, xorij chempionatlarini uzluksiz kuzatib boraman. U erdagi haqqoniyliklarni ko'rib, o'qib, eshitib, hayratga tushaman. Bizni xorij futbolidan o'rganishimiz lozim bo'lgan jihatlar haqida ko'p o'ylayman. Ular esa juda ko'p. Bularni birma bir sanasak barmoqlarimiz etmay qolishi aniq. Shunday ekan bugun faqat bitta mavzu haqida fikr yuritmoqchiman.
Xorij birinchiliklarini kuzatib boruvchi muhlislarimiz yaxshi biladiki u erda kichik jinoyat ham katta muammolarni keltirib chiqaradi. Xoh u “Real” bo'lsin, xoh u “Barsa” qilgan jinoyatlari uchun jazo muqarrar. Bunga 2006 yilda jahon futbolini larzaga keltirgan Italiya “A” seriyasidagi shov-shuvli voqealar yaqqol misol bo'la oladi.
O'shanda kelishilgan o'yinlarga nisbatan Italiya futbol mutasaddilari tomonidan qabul qilingan keskin qaror barchani hayratga solgandi. “Yuventus”, “Milan”, “Latsio”, “Fiorentina” kabi jamoalar 2004-2005 yilgi mavsumida kelishilgan o'yinlarda ishtirok etganliklari sabab tergov qilindilar. Yakunda yuqoridagi klublarning 3tasi “B” seriyaga badarg'a qilindi. Xatto “A” seriyaning eng sovrindor jamoasi “Yuventus” ham. Bundan tashqari, kelishilgan o'yinlarga aloqador bir nechta amaldorlar bir umrga futboldan chetlatildilar.
Balkim bizda ham mana shunday keskin choralar ko'rish payti kelgandur. Axir qachongacha kelishilgan o'yinlar botqog'iga botib yashaymiz. Bugun bo'lmasa ertaga albatta bu botqoq hammamizni tortib ketishi aniq.
Avallari kelishilgan o'yin degan so'z bizning qulog'imizga deyarli chalinmasdi. Afsuski, bu so'z so'nggi paytlarda kundalik lug'atimizdan mustahkam o'rin egalladi. Bunga sabab chempionatimizda bunday o'yinlar “tomir otib” ketganidir. Eng achinarlisi, bunday o'yinlarda biz ishongan, sevgan, hurmat qilgan murabbiylar, futbolchilar, hakamlar, jamoalar ham ishtirok etishmoqda. Birgina “Paxtakor”ning ko'rsatgan “karomati” chempionatimizning asl yuzini ochib berdi.
Tasavvur qiling, siz Angliya pre'mer ligasini tomosha qilyapsiz, maydonda chempionat peshqadami hamda autsayderi. Hisob autsayder foydasiga 0:2. O'yin tugashiga 10 daqiqa qolganida peshqadam jamoa ketma-ket hujum uyushtirib, raqib darvozasiga 3ta gol kiritib, haqqoniy g'alaba qozonib, muxlislar olqishiga sazavor bo'ldi. O'ylaymanki bu xolat sizni aslo taajublantirmaydi.
Ana endi xuddi shu xolat bizning chempionatda sodir bo'lsachi? Shu yilning 25 sentyabr kuni ana shu xolat sodir bo'ldi. “Metallurg” jamoasi safarda “Paxtakor”ni 0:2 xisobida mag'lubiyatga uchratayotgandi. O'yin tugashiga 10 daqiqa qolganida biz maydonda sport printsiplariga mutlaqo to'g'ri kelmaydigan voqealarga guvoh bo'ldik. Natija esa barchaga ma'lum.
Mana shunday “g'alaba”lar evaziga chempion bo'lish nahotki klub rahbarlariga kerak bo'lsa? Axir bunday chempionlik na klubning shonli tarixiga va na obro'-e'tiboriga to'g'ri kelmaydi-ku.
Poytaxtdagi o'yinlarga nega muhlislar tashrifi yo'qligiga asl sabab ham mana shunday “g'alaba”lardir. Ular ishqibozlarni faqat g'alabaga o'rgatib qo'yishgan. G'alaba esa qanday qo'lga kiritiladi bu ularning ishi.
“Paxtakor” xalq jamoasi. Shunday ekan u barchaga o'rnak bo'lishi lozim. Lekin, ming afsuski....
Bunday salbiy xolatlar futbolimiz oyog'iga bolta urayotgani bor gap. Shuning uchun ham g'arb futbolidan o'rnak olib, ulardek keskin choralar ko'llash vaqti keldi. Bu yilgi chempionatda ishtirok etgan barcha 16 ta jamoalarni so'roq qilib, ular orasidan kelishilgan o'yinlarda ishtirok etgan murabbiy, futbolchi va jamoa rahbarlarni jazolash, kerak bo'lsa bunday o'yinlarda ishtirok etgan klublarni quyi ligaga ravona qilish kerak.
Masalan “Paxtakor” va “Metallurg”ni. Bu jamoalarga beriladigan jazo qolganlardan ko'ra ajralib turishi kerak. Chunki, bu jamoalar, ochiqchasiga O'zbek futboli yuziga oyoq qo'yishdi. Birgina o'sha uchrashuv tasdiqlab turibdiki, bu klublar na chempionlik uchun va na Oliy liga uchun munosib emaslar.
Bugun futbolimizda mana shunday keskin qarorlar qabul qilinmas ekan, yuqoridagi botqoqqa botib qolishimiz hech gap emas. Shu o'rinda kelishilgan o'yinlarga aloqalor futbolchilar, murabbiylar, hakamlar qo'yingi barcha barchaga yagona savolim bor: Bo'm-bo'sh stadionlarda o'yin o'tkazish joningizga tegmadimi?
Baxtiyor TOShTEMIROV blogidan olindi.
— deya xabar beradi uff.uz nashri.