6 dekabr kuni FIFAning ayollar futboli bo'yicha eksperti, UEFAning PRO litsenziyasini olgan murabbiy Monika Shtab xonim O'zbekistonga  keldi. Mazkur tashrifdan ko'zlangan maqsad - yurtimizda ayollar futbolini rivojlantirishga yordam berishdan iborat.
Oktyabr oyida Malayziya poytaxtida OFKning ayollar futbolidagi elit murabbiylari uchun seminar tashkil etilgandi. O'shanda hamyurtimiz Bahrom Norsafarov matbuot anjumanida Osiyoda ayollar futboliga ayrim yangiliklarni kiritish taklifini ilgari surgandi. O'sha matbuot anjumanida UEFAning texnik instruktori Beatris fon Zibental xonim ham ishtirok etgandi. Shundan so'ng Osiyoga UEFA va FIFAning vakilini jo'natishga qaror qilishgandi.
Ikki tashkilotning ham vakilasi hisoblangan Monika Shtab o'z sayohatini yurtimizdan boshlashni ma'qul ko'rdi. U O'zbekistonga oldin ham tashrif buyurgan, 2010 yili  Toshkent va Qarshi shaharlarida bo'lgandi. O'shanda ayollar o'rtasidagi plyaj futboli bo'yicha mamlakat chempionati bahslarini kuzatishdan tashqari ayollar jamoalari vakillari uchun blits-seminar ham o'tkazgandi.
Germaniya elchixonasida bo'lib o'tgan matbuot anjumanida dastlab Germaniyaning O'zbekistondagi elchisi Naytxart Xyofer-Vissing o'z fikrlarini bildirib o'tdi. Mamlakatimizdan esa vakil sifatida ayollar futboli uyushmasi rahbari Alisher Fayziev va instruktor Timur Asfandiyarov ishtirok etishdi.
Matbuot anjumanining rasmiy qismi ikki mamlakatning ayollar futbolida hamkorlikni davom ettirish masalasiga bag'ishlandi. Xyofer-Vissing yurtimizda bo'lib o'tadigan turnirlarga shaxsan tashrif buyurishga va'da berdi. Aytish joiz, joriy yilda ham u bu ishni ikki marta amalga oshirgandi.
Anjumandan so'ng muxbirimiz Shtab xonimga ikki savol bilan murojaat qildi.
Savollar:
1. O'zbekiston ayollar futbolida Germaniyada muvaffaqiyat keltirayotgan modellarning qay biridan foydalanilyapti? Yoki faqat mahalliy sharoitdan kelib chiqib ishlanyaptimi?
2. Terma jamoalarni qaysi yoshdan tashkil qilish lozim?
Javoblar:
1. Mamlakatingizda ayollar o'rtasidagi chempionat ikkita ligada o'tkaziladi - oliy va birinchi. Oliy ligada 12ta, birinchi ligada esa 6ta jamoa bor. Divizionlarda jamoalar o'rnini almashtirishda sport printsiplari birinchi o'rinda turishi kerak. Shunda barcha jamoalarda maqsad paydo bo'ladi. Kimlardir elitadan tushib ketmaslik, boshqalar esa kuchlilar safiga chiqish uchun kurashadilar. Agar bu printsiplardan foydalanilmasa, maqsad bo'lmaydi.
Davomi InterFUTBOL gazetasi blogida.
— deya xabar beradi uff.uz nashri.