«Lester» hamda Jazoir terma jamoasining iqtidorli hujumchisi Riyod Mahrez o'z faoliyati davomida epsiz o'smirlikdan yorqin yulduzlikkacha bo'lgan yo'lni bosib o'tdi. «Izlanganga tole yor» maqolining nechog'li haq ekanligiga futbolchining shiddatli parvozi yaqqol misol bo'la oladi.
«Agarda shanba oqshomida darvozamiz daxlsizligini saqlay olsak, shogirdlarimni pitstsa bilan siylayman, ehtimol, xot-dogga ham erirman»,-degandi Klaudio Raneri «Les­ter»-«Stok Siti» uchrashuvi arafasida. Uning jamoasi mavsumni o'ta ko'tarinki ruhda boshlagan, qatorasiga 5ta uchrashuvni mag'lubiyatsiz o'tkazib, 2-o'rinda borayotgandi. Ammo o'sha uchrashuvlarning 3tasida birinchi bo'lib o'z darvozalaridan to'p olib chiqishgandi. O'z uyidagi «Aston Villa» bilan bo'lgan o'yindan keyin Raneri o'z shogirdlarini yuqoridagi va'da bilan ehtiyotkorlikka da'vat etgandi.
To'g'ri, o'shanda «Lester» «Villa» darvozasiga 3ta gol urdi. Biroq o'yin tugashiga 20 daqiqa qolganida 0:2 hisobida imkoniyatni boy berayotgandi. «Stok»ka qarshi bahs ham bundanda hayajonliroq tarzda kechdi: Arnautovich keskin to'p uzatish evaziga Raneri himoyasini dog'da qoldirib, Krkichga darvozani ishg'ol qilish imkoniyatini tuhfa etdi. Keyin kutilmaganda jamoa sardori Ues Morgan to'pni Uoltersga oldirib qo'ydi. Shmeyxel bilan birma-bir vaziyatga chiqqan hujumchi ikkinchi golni urdi. O'shanda o'yinning atigi 20 daqiqasi ortda qolgandi. Biroq bu safar ham «Lester» mag'lubiyatdan qutulib qoldi: tanaffusdan so'ng Riyod o'ta nozik uzatma bilan Drinkuoterni jarima maydonchasiga olib kirdi, himoyachilar uni yiqitishdi. Mahrez esa penaltini sovuqqonlik bilan amalga oshirdi. Keyin u havodagi to'p uchun kurashda 2 nafar himoyachidan ustunlik qilib, Jeymi Vardini qulay vaziyatga chiqardi. To'purarlar etakchisi vaziyatni qo'ldan boy bermadi.
To'g'ri, «Lester» o'yinchilari o'sha oqshom pitstsa va xot-dogdek tansiq taomdan benasib qolishdi. Lekin jamoa 2-pog'onani saqlab qoldi. Uning jazoirlik afsungari esa mavsumning bosh kashfiyoti unvoni sari yana bir salmoqli qadamni tashladi.
- Parijning shimoliy qismida qad rostlagan Sersel mavzesining har qaysi ko'p qavatli uylarida Riyod Mahrezga o'xshagan iqtidor sohiblari Klaudio Raneri faoliyat yuritgan klublar sonidan ko'proq, desak mubolag'a bo'lmasdi. Yosh Riyod ham to'p bilan doimo uyda yoki ko'chada antiqa fintlarni ko'rsatar, lekin mahalliy jamoa ko'rigida o'z mahoratini namoyish etishga dangasalik qilardi. Boisi, u erga qabul qilgudek bo'lishsa, har kuni ikki martadan mashg'ulotlarga qatnashishi, agar kechikib kelsa, jarima sifatida stadion bo'ylab bir necha marta yugurishi lozim bo'lardi. Boz ustiga, bu ko'rgilikdan keyin maydonga tushish-tushmasligi ham noma'lum edi. Shu sababli Riyod ukasi Vohid hamda qo'shni tengqurlari bilan mustaqil mashq qilishni afzal ko'rardi. Mahrezning onasi marokashlik, otasi esa jazoirlik bo'lib, ular Parijda tanishishgandi. Ahmad Mahrez o'sha payt poytaxtdagi havaskor klublarda to'p surgan, nasib qilsa qachonlardir o'z farzandini «Marsel»da to'p surishini orzu qilgandi. Chunki er-xotin shu jamoaning muxlisi bo'lishgan...
Xullas, Gari Lineker rahbarligidagi konsortsium 2003 yili «Lester»­ni 30 mln.lik qarzidan xalos etib, APLga olib chiqqanida, yosh Riyod otasi Ahmad bilan Serseldagi Nelson Mandella nomidagi sport markaziga yo'l oldi. Bu mavzedan chiqqan eng mashhur futbolchi Filipp Kristanval bir yildan keyin markazga sun'iy gazon hadya etdi. Riyod ana shu maskanda tahsil olishi lozim edi. Biroq bolakayning fintlari «Sersel»ning texnik direktori Muhammad Kulibalini qoniqtirmadi. Buning ustiga, 12-16 yoshli paytida tabiy rivojlanishdan ancha ortda qolgan, tengdoshlariga nisbatan juda bemajol edi. «Men shunchalik kichik va nimjon edimki, har qaysi futbolchi to'pni osonlik bilan mendan olib qo'yardi», - deya hikoya qilgandi keyinchalik Riyod The Observer muxbiri Pol Doylga.
Shu sababli nozik jussali Mahrez faqat to'p bilan o'ynashga intilar, to'qnashuvlardan o'zini olib qochardi. Qolaversa, futbolni o'z kelajagi sifatida emas, shunchaki ermak o'rnida tushunardi. Chunki otasi professional futbolchi bo'lmasa ham, binoyidek hayot kechirayotgandi. Lekin oradan 3 yil o'tgach, hammasi o'zgarib ketdi - yurak xuruji tufayli bevaqt olamdan ko'z yumgan otasi o'limi oldidan kenjatoyining albatta, futbolchi bo'lishini va yagona orzusini ro'yobga chiqarishini vasiyat qiladi. Judolik Riyodni uyqudan uyg'otgandek buldi. Albatta, jismoniy qudrati va mahoratini oshirishga ham jiddiy e'tibor qarata boshladi. Endi futbol uning uchun oddiy ermak emasdi. «Sersel» o'yinchisi Gi Ngongolo sobiq jamoadoshi xususida shunday hikoya qiladi: «O'yin va mashg'ulotlardan keyin Riyod zalda qolib, ertalab soat 4:00gacha ter to'kib, mashq qilardi».
Shu tariqa Mahrez 17 yoshida jamoaning etakchi futbolchisiga aylandi. Lekin «Sersel»dek kamtarin jamoadagi muvaffaqiyat ota orzusini ro'yobga chiqarish uchun albatta, kamlik qilardi. Mahrezning bolalikdagi do'stlaridan biri - Sofyan Segirining guvohlik berishicha, Riyod nufuzliroq jamoaning ko'rigidan o'tish uchun dunyoning istalgan burchagiga borishga tayyor edi: «Bir kuni kechqurun Riyodga bir guruh futbolchilar ko'rikdan o'tish uchun Shotlandiyaga uchib ketayotgani haqida xabar berishdi. U hatto qaysi jamoaga taklif etishayotganini ham so'rab o'tirmadi. Samolyot 21:00da Bove aeroportidan uchishini aniqlagach, sport liboslari va butsasini olib, o'sha yoqqa uchdi». Afsuski, shunga o'xshash barcha urinishlar hech qanday natija bermadi. Darvoqe, bundan 6 yil muqaddam 4-divizionda to'p suradigan Bretanning «Kemper» havaskorlar klubidan ham taklif tushgandi - jamoaga tezkor chapaqay hujumchi kerak bo'lib qolgandi.
Biroq mutasaddilar Mahrezni Bretanga o'z hisobidan borib-kelishini, bundan tashqari, yana 25 nafar da'vogar ko'rikdan o'tishini aytib, ogohlantirishgandi. Bir yildan keyin esa 2-liga a'zosi «Gavr»ning o'rinbosarlar jamoasi safiga taklif etishdi. Bir qarashda e'tiborga arzimaydigan variant. Lekin nima bo'lganda ham «Sersel»dan martabaliroq! Qisqasi, «Gavr»dagi 4 yil mobaynida Riyod 4 nafar murabbiydan saboq oldi, jismonan ulg'aydi, aql bilan to'p surishni o'rgandi. Bundan 2,5 yil avval u shunday degandi: «Men g'ayritabiiy taraqqiyot yo'lini bosib o'tdim. Hech qachon nufuzli futbol maktablarida tahsil olmaganim bois, bu kasbga bo'lgan munosabatim o'zgacha - futbol men uchun mashaqqatli mehnat emas, lazzatlanish manbai. Har kuni yanada yuksalishga intilaman. Nihoyat qachondir Frantsiyaning eng kuchli divizionida to'p surish orzusidaman».
Bundan 20 oy muqaddam Mahrezni «Lester»ga taklif etishgach, uning yuqoridagi orzulari Yuqori Nortmandiyaning shamoli bilan qayoqqadir uchib ketdi. To'g'ri, avvalo onasi, qolaversa, akasi va yaqin do'stlari, hattoki, agenti ham shafqatsiz chempionshipdan voz kechishga chaqirishdi. Gavrda qolib, yuksak texnika ko'proq qadrlanadigan Ispaniyadan taklif kutishni maslahat berishdi. Biroq yoshlikdagi notavonlikni allaqachon engib o'tgan Riyod fikridan qaytmadi - 450 ming evro to'lagan «Lester»ga yo'l oldi. Tumanli o'lkadagi birinchi oqshomni qandaydir kursi ustida tik turgan holda inglizcha qo'shiq kuylash (jamoada shunday udum bor) bilan o'tkazdi. Ertasiga jamoa o'rinbosarlari safida «VBA» darvozasiga gol urdi, bir oy o'tgach asosiy tarkib bilan APL yo'llanmasiga ega bo'ldi. Bundan tashqari, Jazoir terma jamoasi safida Braziliya mundialida to'p surdi.
Davomi InterFUTBOL gazetasi blogida.
— deya xabar beradi uff.uz nashri.