Oliy liganing oxirgi mavsumida jami 16 nafar hakam ishladi. Referilar orasida eng ko'p o'yinni Ravshan Ermatov boshqardi - 27ta. Dmitriy Pislegin esa atigi 8ta uchrshuv bilan cheklandi. Yana bir etakchi hakamimiz - Valentin Kovalenko jarohat tufayli ikkinchi davraning boshlang'ich qismini o'tkazib yubordi. Jahon chempionati saralashi doirasidagi bahslarga ham jalb etilayotgan Aziz Asimov 10-turdan o'rin olgan «So'g'diyona» - «Paxtakor» bahsida 6,0 ball olgach, 15-turga qadar  chetda qoldi.
O'rtacha ball. Qizig'i, 1-8-turlar davomida hakamlarga maksimal 10 ball berildi. 9-turdan keyin esa maksimal baho 9 ballni tashkil etdi. Shu sabab, hakamlarning umumiy balli va o'rtacha ko'rsatkichini chiqarish biroz murakkablik tug'dirdi. Biz bu borada sodda formulaga asoslandik. Ya'ni har bir hakam yiqqan umumiy ballni u boshqargan o'yinlar soniga bo'lib qo'ya qoldik.
Eng yuqori va eng past ball. Bu erda hammasi tushunarli. R.Ermatov o'ziga topshirilgan o'yinlarning uchdan ikki qismida maksimal ball olishga muvaffaq bo'ldi. 2-tur doirasidagi qoldirilgan «Qo'qon-1912» - «Bunyodkor» bahsida I.Tantashevga 4,0 ball qo'yildi. Bu mavsumning eng past bahosidir. O'sha o'yinda nazoratchi - A.Popov qolgan hakamlarga quyidagicha baho qo'ygandi: B.Qodirov (Buxoro) - 7,6; A.Qo'ldoshev (Buxoro) - 8,6; A.Rahimov (Andijon) - 8. Futbol ichida yurgan ko'pchilikning fikricha, ushbu nazoratchi qattiqqo'llik va xolislikda uncha-muncha kishiga dars berar ekan. Aytgancha, Tantashev shu past baho tufayli 4ta tur davomida dam oldi.
Penalti. O.Tolibjonov, V.Kovalenko, H.Ro'ziev va R.Bobomurodov belgilagan penaltilarning 75 foizi aniq bajarildi. Ba'zi hakamlar bu borada 2-davradagina jonlandilar. 71ta penalti 15 nafar hakam tomonidan belgilandi. Referilardan birgina Vladislav Tseytlin 11 metrli nuqtaga ishora qilmadi.
Kimda nima ko'p?
Ravshan Ermatov 27ta o'yinni bosh-qardi. Bu barcha o'yinlarning 11,25 foizini tashkil etadi.
Vladislav Tseytlin 110ta sariq kartochka ko'rsatdi. Bu barcha ogohlantirishlarning 10,55 foizini tashkil etadi.
Vadim Agishev 8ta qizil kartochka ko'rsatdi. Bu barcha chetlatishlarning 14,81 foizini tashkil etadi.
Ravshan Ermatov 9ta penalti belgiladi. Bu barcha 11 metrli jarima zarbalarining 12,68 foizini tashkil etadi.
Bosh hakam - Ravshan Ermatov
Shu joyda chempionat-2015da eng ko'p ishlagan hakamning shaxsiy statistikasiga alohida e'tibor qaratsak. U «Lokomotiv» maydonida 5ta, «Paxtakor» va «Nasaf»nikida 3tadan o'yinni boshqardi. Umuman, Ravshan Ermatov faqat «Metallurg», «Qo'qon-1912» va «Buxoro» klublari arenalaridagi o'yinlarga biriktirilmadi, xolos.
Davomi InterFUTBOL gazetasi blogida.
— deya xabar beradi uff.uz nashri.