Har bir klubning o'ziga xos raqam egalari bo'ladi. Biz so'nggi 20 yil davomida «Real Madrid» klubi safida «10» raqamda to'p surgan futbolchilar haqida to'xtalib o'tamiz.
1994-1996
Mikael Laudrup
Daniyalik yarim himoyachi 1994-1996 yillarda «Blankos» sharafini himoya qilib 76 uchrashuvda 15 ta gol kiritishga muvaffaq bo'ldi. Klub rahbariyati «Barselona»dan kelgan futbolchiga «10» raqamini berishga qaror qilishdi. Laudrup debyut mavsumidayoq «Real»ning la Ligada chempion bo'lishiga katta hissa qo'shdi. Biroq bu uning Madridliklar tarkibidagi birinchi va oxirgi sovrini edi. Mikael «Barsa» safidagi 5 mavsumi davomida 9 ta sovringa ega chiqqanligini ham ta'kidlab o'tish joiz.
1996-1999
Klarens Zeedorf
Laudrup ketganidan so'ng «10» raqami «Sampdoriya»dan xarid qilingan gollandiyalik Zeedorfga nasib etdi. Yarim himoyachi «Qirollik klubi» tarkibida 4 mavsum davomida 159 ta uchrashuvda 20 ta gol urishga muvaffaq bo'ldi. Klarens «Real» tlibosida Ispaniya la Ligasi va superkubogi, Chempionlar ligasi hamda Qit'alararo kubogida muvaffaqiyat qozondi. Zeedorf dastlabki 3 mavsumda jamoaning asosiy futbolchisi edi. Biroq 1998/99 yilgi mavsumda u ko'proq zaxirada qolib ketdi va shundan so'ng Milanning «Inter» jamoasiga yo'l oldi.
2000-2005
Luish Figu
Zeedorfdan qolgan raqam 1 mavsum davomida bo'sh qoldi va keyingisida uni «Barselona»dan xarid qilingan Figuga berishdi. Luish «10» raqam egalarining muvaffaqiyatlarini davom ettira oldi. U «Galaktikos» tarkibida 5 yil to'p surib 239 ta o'yinda 57 ta gol kiritdi va o'zi uchun sarflangan pullarni to'la oqladi. Portugaliyalik «Real» bilan 2 martadan Ispaniya La Ligasi va superkubogida, bir martadan esa Evropa Chempionlar ligasi, Evropa superkubogi hamda Qit'alararo kuboklarida muvaffaqiyat qozondi. Eng qizig'i Figu ham Zeedorf singari «Real»dan keyin «Inter» jamoasi sharafini himoya qildi.
2005-2008
Robino
2005 yilda «Real» «Santos»dan «ikkinchi Pele» deya e'tirof etilayotgan Robino xarid qildi va unga Figudan qolgan raqamni berdi. Robino «blankos» sharafini 4 mavsum himoya qildi va bu davr ichida 135 o'yinda 35 gol urdi. Albatta bu yuqori ko'rsatkich emas. Biroq Robino hech qachon yaqqol hujumchi vazifasini bajarmaganligini ham unutmaslik lozim. Braziliyalik 2007 va 2008 yillarda «Qirollik klubi»ning chempionlikni qo'lga kiritishiga munosib hissa qo'sha oldi. U shuningdek bir marta Ispaniya superkubogida ham zafar quchdi. 2008 yilda u Madridni Manchesterga almashtirishga qaror qildi.
2008-2009
Uesli Sneyder
2007 yilda «Real» «Ayaks» yarim himoyachisi Uesli Sneyderni o'z safiga qo'shib oldi. Gollandiyalik futbolchi dastlabki mavsumda «23» raqamida to'p surdi. Robino ketgach esa u «10» raqamini o'ziniki qildi. Afsuski bu raqam yarim himoyachiga omad olib kelmadi. Sneyder debyut mavsumida 9 ta gol urib jamoasi bilan chempionatda g'olib chiqqan edi. Ammo ikkinchisida u jamoa bilan hech vaqoga erisha olmadi. «Real» boshqaruv ruliga yana Florentino Peres qaytgach, Uesli o'ziga yangi jamoa topishga majbur bo'ldi va u ham Zeedorf va Figu singari Italiyaning «Inter» klubiga yo'l oldi.
2009-2011
Lassana Diarra
2008 yilda «Real» Angliyaning o'rtamiyona jamoasi hisoblangan «Portsmut» klubida ikki mavsum davomida Premer ligada atigi 24 ta uchrashuv o'tkazgan Diarrani sotib oldi va unga hech ikkilanmasdan «10» raqamini berdi. Bu ko'pchilik uchun biroz kutilmagan qaror edi. Lassana Madridda 5 mavsum davomida to'p surib 111 ta uchrashuvda 1 ta gol kiritdi. U klub bilan bir martadan chempionat, kubok va superkubokda zafar quchdi. Frantsiyalik yarim himoyachi 2013-yilda Rossiyaning «Lokomotiv» jamoasiga o'tib ketdi.
2011-2013
Mesut O'zil
«Real» 2010 yilgi jahon chempionatidan so'ng germaniyalik yarim himoyachi O'zilni sotib oldi. Mesut debyut mavsumida «23» raqamda harakat qilgan bo'lsa, keyingi yili jamoadoshi Diarraning «10» raqamini «tortib» oldi. Mesutga bu raqam omad keltirdi va ana shu yili «Galaktikos» la Ligada chempionlikni nishonladi. Bunda O'zilning ham hissasi baland edi. Yarim himoyachi Madrid superklubida 3 mavsum davomida 159 o'yinda maydonga tushib 27 ta golga mualliflik qildi va jamoa bilan 3 ta yutuqqa erishdi. 2013 yilda Peres kutilmaganda jamoaning etakchilaridan birini «Arsenal»ga sotib yubordi.
Davomi Furqat Yusupov blogida.
— deya xabar beradi uff.uz nashri.