«Dinamo» uchun muvaffaqiyatsiz mavsum sifatida tarixda qolgan 2015 yilgi chempionat yakunida o'z an'anamizga binoan, «Dinamo» jamoasi va futbolchilarning natijalarini sarhisob qildik.
ENG YoMON NATIJA…
Ushbu mavsumni ikki bosh murabbiy qo'l ostida o'tkazgan klub chempionat yakunida so'nggi o'ringa tushib ketdi. Joriy yilda jamoa ko'rsatgan natija so'nggi besh yilikdagi eng yomoni sifatida qayd etildi. Jumladan, «Dinamo» 2010 yilgi mavsumda Azamat Abduraimov va Viktor Jalilov murabbiyligida 27 ochko bilan 12-o'rinni egallagan bo'lsa, 2011 yilda Viktor Jalilov va Ahmad Ubaydullaev qo'l ostida 29 ochko bilan mavsumni 10-o'rinda yakunlagan.
2012 yilda esa Ubaydullaev va Sergey Arslonov boshqaruvida 29 ochko jamg'arilgan va klub mavsumni 9-o'rinda yakunlagan. 2013 yilda esa «Dinamo» Kamo Gazarov qo'l ostida chempionatni omadsiz boshlagach, jamoaga Ravshan Haydarov taklif etildi va klub mavsumni 32 ochko bilan 8-o'rinda yakunladi.
Ravshan Haydarov O'zbekiston yoshlar terma jamoasiga bosh murabbiy etib tayinlangach, ushbu mutaxassis 2014 yil yarmida jamoani tark etdi. O'tgan yilgi mavsumning yarmida esa Tachmurod Agamurodov klubda ish boshlab, Kamo Gazarov bilan hamkorlikda ish olib bordi. 2014 yilgi mavsumda 28 ochko jamg'argan jamoa 10-o'rindan joy oldi.
2015 yilgi mavsumning birinchi davrasida Tachmurod Agamurodov qo'l ostida 15 uchrashuvda 11 ochko to'plagan «Dinamo» tanaffusga 12-o'rin bilan chiqib ketdi. Tarkibida ikkinchi davra oldidan bir qator o'zgarishlar yuz berdi. Biroq bu klubni ligada qolishiga sabab bo'lmadi – Bahrom Hakimov qo'l ostidagi jamoa ikkinchi davrada 15 uchrashuvda 14 ochko jamg'arib mavsumni so'nggi o'rinda yakunladi. Bu «Dinamo»ning eng yomon natijasi bo'ldi.
TO'PURAR – KAMOLIDDIN MURZOEV
Joriy yil birinchi davra yakunida jamoani tark etgan Aziz Ibragimov o'rniga taklif etilgan Kamoliddin Murzoev «Dinamo»ning joriy yilgi eng yaxshi to'purari bo'ldi. Dastlabki davrada «Olmaliq» safida 3 ta gol urgan Murzoev, ikkinchi davrada «Dinamo» muxlislarining eng yoqimtoy futbolchisiga aylandi va 8 marotaba raqiblar darvozasini ishg'ol etdi. Afsuski, bu gollar ham «Dinamo»ning ligada qolishiga etarli bo'lmadi. Umumiy 11 ta gol bilan hujumchi mavsum to'purarlari safidan o'rin oldi.
ENG KO'P O'YIN – OTABEK ZOKIROVDA
23 yoshli Otabek Zokirov 2015 yilda «Dinamo» safida barqaror o'yin namoyish etgan futbolchiga aylandi. Aynan ushbu yarimhimoyachi «Dinamo»ning mavsumdagi barcha – 30 uchrashuvida maydonga tushgan yagona futbolchisi bo'ldi. Yil davomida 2449 daqiqa to'p surgan Zokirov bu vaqt oralig'ida 4 ta gol, 4 ta golli pas va hakamlar tomonidan 2 marta ogohlantirildi.
Eng ko'p vaqt davomida to'p surgan futbolchi esa himoyachi Avaz Agaliev bo'ldi. 29 uchrashuvda maydonga tushgan chap qanot himoyachisi 2503 daqiqa davomida maydonda to'p surgan.
ENG KO'P OGOHLANTIRILGAN – XOLMURODOV VA FILIPOSYaN
Jamoamiz universal futbolchisi Akmal Xolmurodov butun mavsum davomida hakamlar tomonidan eng ko'p «siylangan» futbolchiga aylandi. U 23 o'yinda 6 marotaba ogohlantirilib, bir safar qizil kartochkaga ham loyiq ko'rilgan. Ikkinchi davraga safga qo'shilgan Artyom Filiposyan esa 12 o'yinda 6 marta ogohlantirilgan. Bu har ikki o'yinning bittasida deganidir.
MAVSUM KAShFIYoTI - JASUR AZIMOV
So'nggi yillarda jamoamiz safidan Komil Sharofutdinov, Abdullo Nabiev, Firdavs Abdusalimov, Islom Sharipov, Bunyod Isroilov singari yoshlar etishib chiqqan bo'lsa, bu yil Jasur Azimov asosiy tarkibdan o'rin ola boshladi. 21 yoshli yarimhimoyachi 19 o'yinda maydonga tushib 1053 daqiqa davomida to'p surdi.
MEL'NIChUK O'RNIGA XUDOYoROV
So'nggi 4 yil davomida jamoaning asosiy posboni bo'lib kelgan muxlislarning sevimli futbolchisi Andrey Melnichuk ikkinchi davraga kelib zaxirada qolib ketdi. Ukrainalik tajribali posbon o'rnini esa yosh darvozabon Muhiddin Xudoyorov egalladi. 37 yoshli Melnchuk joriy mavsumda 16 o'yinda 1365 daqiqa jamoa darvozasini qo'riqlagan bo'lsa, 25 yoshli Xudoyorov 16 o'yinda 1335 daqiq to'p surgan. «Qizilqum» va «Paxtakor» bilan bahslarda har ikki darvozabon bir taymdan o'yin o'tkazishgan.
— deya xabar beradi uff.uz nashri.