Futbolchilardan FIFAdagi mojarolar xususida tayinli fikr chiqishi dargumondek. Ayniqsa, hamkasblarining zamonaviy futboldagi bugungi muammolarga befarq qarashlari sobiq jahon chempioni Jilberto Silvani jiddiy tashvishga solgan ko'rinadi. Uning fikricha, eng yaxshi futbolchilar bu borada etakchiga aylanishlari darkor.
- Menimcha, millionlar o'yini vakillari - hozirda to'p surayotgan va sobiq futbolchilar, murabbiylar o'z fikrlarini bildirishlari kerak, - deydi Silva. - Hamma kelishib olganday jimlik saqlayotganiga toqat qilib bo'lmaydi. Bu juda g'alati. Jilla qursa, «Nima bo'lyapti?», deb so'rashga jur'at topolmayaptilar. Bu sukunat jonni hal­qumga keltiradi. Qandaydir o'zgarishlar kiritish vaqti keldi, zero aybdorlar jazo olishlari shart. Hayotimda yo'l qo'ygan har bir xatoim uchun javob beraman. Ularni ham shunga majbur qilish maqsadga muvofiq.
Luish Figu prezidentlikka nomzodini qo'ydi, biroq yozda bu yumushdan voz kechdi. Eng qizig'i, qamoqqa olishlar arafasida, korruptsiyaga ayblovlar e'lon qilinishi oldidan shunday qarorga keldi. Jilbertoning fikricha, futbolning oliy darajada boshqarilishini ta'minlash jarayonida ko'psonli futbolchilar ishtirok etishlari zarur. Silva shunday vazifani o'z zimmasiga olishga tayyor. «Albatta, biz bunga qodirmiz, - deydi u. - Ammo yaxshi tayyorgarlik ko'rishimiz, bu sohadagi mexanizmlarning qanday ishlashi bilan tanishishimiz va aynan qaerda yordamimiz tegishini bilib olishimiz zarur. Muammolar bisyor, biz ularni maydonda hal qilishga o'rganganmiz. Biroq uning maydondan tashqarida qanday echilishi, hayotdan nima kutish kerakligini bilmaymiz. Zero, do'stni dushmandan ajratish juda qiyin».
Silva allaqachon 39 yoshni qarshilab ulgurgan, lekin jarohatlardan qutulgach, yana bir oz o'ynash niyatida. Aynan shu muammo tufayli butun mavsumni maydondan chetda o'tkazdi.
Jilberto yoshligidan hamma ishni to'g'ri bajarishga intilardi. 11 yoshidan oilasini boqish uchun ishlay boshladi. Qahva plantatsiyasida bir hafta ter to'kib topgan dastlabki maoshini nimaga sarflaganini eslarkan, beixtiyor jilmayadi: «Ota-onamga tovuq sotib oldim. Uni uyga avtobusda olib borishimga to'g'ri keldi. Yo'l bo'yi qisinib-qimtinib ketdim, parranda pitirlashdan to'xtamasdi. Otam quvonchdan o'zini qo'yarga joy topolmay qoldi. Yakshanba kungi tushlikka go'sht iste'mol qilish barchamiz uchun mo''jiza edi. Chunki har kuni ham tovuq go'shti eya olmasdik-da».
O'shanda Jilbertoning onasi xastalikka chalinib, buyragini almashtirishga ehtiyoj sezardi. Otasi zavodda arzimagan pulga ishlar, uyda yana 3 nafar qizaloq bor edi. Shu bois Jilberto hali esini tanib ulgurmasidan pul topishga majbur bo'lgandi. Qahva plantatsiyasidan tashqari boshqa joylarda ham ishladi. «12 yoshimda mebel yasovchi duradgorlarga, 13ga to'lganimda esa quruvchilarga ko'maklashdim. Ko'p narsani ko'rganim sababli pul qadrini yaxshi bilaman. Oilani boqish uchun otamga yordam berishga majbur bo'lganim bois maktabni tashladim, onamni ham davolatish kerak edi-da, axir».
Volidasi shifo topdi va Jilbertoning futbolchilik faoliyati davomida bu oila tasavvur ham qila olmaydigan darajada yaxshi yashay boshladi. U 26 yoshida jahon chempioniga aylandi, o'yinlari orqali Arsen Vengerning diqqatini o'ziga tortdi. Xususan, Braziliya JCh-2002 finalida Germaniyani mag'lub etgach, Jilberto «Arsenal» tarkibidan o'rin egalladi. Shu tariqa «to'pchilar» safida o'zining eng yorqin yillarini o'tkazdi. Yaqinda u ko'makka muhtoj bolalarni qo'llab-quvvatlashga ixtisoslashgan Street Child United xayriya loyihasida qatnashish maqsadida yana Londonga tashrif buyurdi. Albatta, «Arsenal» mashg'ulotlar bazasini ham chetlab o'tolmadi, axir qadrdon do'stlarining diydoriga to'yishi ham kerak edi-ku. U Vengerdan butsalarini so'rab, shu tariqa Fransis Kokelenga o'rinbosar axtarish shartmasligini aytdi. «Arsenga hamisha o'ynashga tayyorligimni bildirdim, - deydi «Ko'rinmas devor» laqabiga loyiq ko'rilgan braziliyalik futbolchi jilmaygan ko'yi. - Adashmasam, klubdan ketganimdan beri o'rnimga mos futbolchini hanuz topa olishmadi. Ularda Mikel Arteta, Mate Flamini bor, oldinroq Sesk Fabregas o'ynadi. Ammo ular boshqa turdagi futbolchilar. Kokelen tez kunda kuchga to'ladi va joriy mavsum «Arsenal»ga yordam beradi, degan umiddaman. U jamoaga hali ko'p jabhalarda qo'l kelishi aniq».
Jilbertoning fikricha, jamoaning sog'lom o'yinchilariga hozir olg'a qadam tashlashning ayni payti. «Bugun klub uchun og'ir davr. Etakchilar jarohat olganida jamoani tiklash murabbiyga ham qiyin. Arsenning muammolari ko'p, futbolchilari esa oz. Ular buni hisobga olishlari kerak. Butun mavsum taqdiri hal bo'ladigan lahzalar yaqinlashmoqda. Agar ular hozirning o'zida bor salohiyatilarini namoyish etishsa, chempionlik uchun yaxshi imkoniyatga ega bo'lishadi. «Arsenal»ga yana ligani yutish davri keldi. Bu Arsenning 20 yillik mehnat faoliyatiga munosib sovg'a bo'lardi».
Davomi InterFUTBOL gazetasi blogida.
— deya xabar beradi uff.uz nashri.