Oliy liga boshlanishiga hali ancha bor, bu yoqda mavsumga tayyorgarlik ishlari ham o'lda-jo'lda bo'lib yotibdi, ammo hozirdanoq klublar oldiga vazifa qo'yish boshlanib ketgan - «Qo'qon-1912» jamoasi kelasi yil O'zbekiston chempionatida 6-o'rinni olishi lozim ekan. Har holda, klub rasmiy saytida shunday xabar tarqatildi.
Bir qarashda hayron qolishga arzimaydigan holat, chunki jamoalar oldiga bunday absurd vazifa qo'yilishiga shu qadar ko'nikib ketganmizki, ortiqcha e'tibor qaratish ham shart emas. Bir istisno, ilgari «6-o'rin» emas, balki «kuchli oltilikka kirish vazifasi» haqida gapirilardi. Nima farqi bor, deysizmi? Farq-ku, katta emas, ammo bu bizning faraz. Klublar uchun esa...
Gap shundaki, bizning futbolda har bir jamoa uchun kuchlilik darajasi o'zi egallagan o'ringa qarab belgilanadi. Masalan, «kuchli ettilik», «sakkizlik», «to'qqizlik», «o'nlik» va hokazo.  «Kuchli oltilik» va «kuchli ettilik» o'rtasida juda katta farq borligini oddiy odam tushuna olmaydi. Siz bilan bizning aqlimiz nari borsa chempionlik va «sovrindor o'rinlar» tushunchasini anglashi mumkin. Juda bo'lmasa Osiyo Chempionlar Ligasiga yo'llanma beruvchi «kuchli to'rtlik»ni bilamiz. U yog'iga esa biz anglay olmaydigan mavhumlik boshlanadi. Sovrindor o'rinlardan mahrum bo'lgach, ettinchi pog'onada bo'lding nimayu, sakkizinchini olding nima, tushunish qiyin. U yog'ini so'rasangiz, bu ham oliy matematikadek gap va unga faqat «olim»larning aqli etadi. Shu bilan birga, klublarimizning ham. Siz bilan bizning esa...
Aynan shu sababga ko'ra bir taklifni o'rtaga tashlashga qaror qildik. Boya aytib o'tganimizdek, futbolimizdagi mavjud vaziyatni anglab etish oson emas. Biz esa klublar va muxlislar bir-birini tushunishlarini istaymiz. Aytaylik, Angliyada yoki Italiyada bu ishni uddalash oson - klublar yo evrokuboklarda ishtirok etish huquqini beruvchi o'rinlar uchun kurashadilar yoki oliy divizionda jon saqlab qolish uchun. Mana shu ikki kurash zamirida o'rtamiyonalar ham shakllanadi. Shu sababli ularning futbolini tushunish osonroq. Albatta, hamma ham chempionlik uchun kurasha olmaydi. Masalan, «Vest Xem» yoki «Uotford» mavsum boshidayoq sovrinli o'rinlardan chetda qolishini yaxshi biladi. Ammo Evropa Ligasi uchun kurashni ularga hech kim taqiqlab qo'ymagan. Buning ham uddasidan chiqa olmasalar, hech bo'lmasa favoritlardan ochko olishga harakat qiladilar. Chunki bunday o'yinlarda shov-shuv ko'tarsalar, yaxshiroq tanilishlari va tabiiyki, daromad ham shunga yarasha bo'lishini biladilar. Bir so'z bilan aytganda ularda chempion bo'la olmagan jamoa chempiondan ochko olishni xush ko'radi.  Bizda esa aksincha.
Shu sababli ham mayli, Evropa tomonlarni tinch qo'ya turaylik. Baribir bizning klublarga ularning ruhiyatini singdirish juda qiyin. Shuning uchun o'zimizning «kuchli falontalik»­ka kirishni maqsad qilgan klublar ishtirok etadigan chempionatimiz uchun boshqacha taklifimiz bor.
Xabaringiz bo'lsa kerak, yaqinda Ukraina chempionati yangicha formatga o'tishi haqida xabarlar paydo bo'ldi. Unga ko'ra, elitada 12ta jamoa qoladi va ikki davra o'yinlari tugagach, kuchli oltilikka kirgan jamoalar alohida bosqichda bir-biri bilan chempionlik uchun kurashadilar. Qolgan klublar esa alohida bosqichda quyi ligaga tushib ketadigan omadsiz nomini aniqlashga kirishadilar. Xuddi mana shu tizimni bizning oliy ligaga ham joriy etishni taklif qilmoqchimiz. Buning sabablari quyidagicha:
1. O'zbek futbolida oliy liga darajasidagi klub sanoqli ekani ma'lum bo'lib qolgan. Hamonki birinchi ligadan oliyga chiqishga da'vogar yo'q ekan, nima qilamiz o'zimizni qiynab? Undan ko'ra oliydagi jamoalar sonini kamaytirish orqali, birinchi ligadagi raqobatni kuchaytirgan afzal emasmi?
2. U yog'ini so'rasangiz, bu format «kuchli falontalik»ka kirishni maqsad qilgan klublar uchun ayni muddao bo'ladi. Ular o'zini qiynab «Paxtakor», «Bunyodkor», «Lokomotiv» va «Nasaf» bilan ortiqcha marta o'ynab yurmaydilar va tinchgina o'zlariga o'xshagan klublar bilan kurashib yuraveradilar. Yoki birinchi ligaga tushib, o'sha erda favorit bo'lib oladilar...
Davomi InterFUTBOL gazetasi blogida.
— deya xabar beradi uff.uz nashri.