O'tgan yili Farg'ona viloyatining yana bir jamoasi “Qo'qon-1912”da o'ynagan Sardor Eminov Oliy liga-2016da “Neftchi” jamoasi sharafini himoya qiladi. O'tgan yili yarim himoyachi qo'qonliklar safida yorqin o'yin namoyish etganini aytib o'timishiz joizdir. Oliy liga-2015da Eminov Qo'qon jamoasining muhim gollarining kiritilishida katta hissa qo'shdi. 28 yoshli yarim himoyachi maydonda hujumkorligi bilan ham ajralib turadi. Umid qilamizki, Sardor yangi mavsumda “Neftchi” jamoasiga hali ko'p naf keltiradi va ishqibozlarning sevimli futbolchisiga aylanadi. Biz esa “Neftchi” mashg'ulotlaridan so'ng futbolchini suhbatga tortdik.
- Sardor, Andrey Vitalevich qo'l ostida shug'ullanishni boshlaganingizga ancha bo'lib qoldi. Dastlavval "Neftchi" jamoasiga kelish jarayoni haqida ma'lumot bersangiz?
- Ochig'i, mavsum yakuniga etganidan so'ng ko'plab jamoalar takliflar bo'ldi deb ayta olmayman. Shundan so'ng Andrey Vitalevich menga aloqaga chiqdi va "Neftchi"  jamoasiga taklif qildi. Nasib qilsa, yangi mavsumda "Neftchi" jamoasi sharafini himoya qilishni boshlayman. Yaxshi niyatlar bilan, klubda faoliyat boshladim. Jamoada meni yaxshi munosabatda qarshi olishdi. Fyodorov murabbiyligida qizg'in mashg'ulotlar kechmoqda. Shuningdek, jamoa qarorgohida futbolchilarga yaratib berilgan sharoitlar ham menga manzur bo'ldi.
- Yangi mavsumdan nimalar kutyapsiz ?
- Birinchi o'rinda jamoa rahbariyati bizning oldimizga qo'ygan vazifani bajarishga va xar bir uchrashuvlarda g'alaba qozonishga harakat qilamiz.
- Yaxshi bilasiz, "Neftchi" muxlislari juda talabchan...
 - To'g'ri, "Neftchi" muxlislari o'z jamoalariga juda sodiq va shu bilan birga talabchandir. Umid qilamanki, ular bizni yangi mavsumda hamisha qo'llab-quvvatlab turishadi. Bu biz futbolchilar uchun muhimdir.
 
Futbolchi haqida ma'lumot.
Ismi-sharifi: Sardor Arabovich Eminov.
Tug'ilgan sanasi va joyi: 1987-yilning 28 yanvar kuni Surxondaryo viloyatining Uzun tumanida tug'ilgan.
Ampulasi: Yarim himoyachi
Birinchi murabbiyi: Abdujalil Voxidov
O'ynagan jamoalari: "To'palang", "Sho'rchi-Lochin", "Regartatos" (Tojikiston), "So'g'diyona" va "Qo'qon-1912".
Muxlislik qiladigan jamoasi: "Manchester Yunayted"
"Neftchi" PFK matbuot xizmati.
— deya xabar beradi uff.uz nashri.