APLning joriy mavsumi har qachongidan qizg'inroq, qiziqroq kechmoqda. Deylik, o'rtamiyona va kuchsiz sanalgan bir qator klublar azaliy grandlarni dam-badam dog'da qoldirishyapti. Shunga yarasha, muxlislar yangi qiyofalar bilan tanishishdi. O'zi APL an'anaviy tarzda yulduzlar ligasi hisoblanadi.
Birinchilikda kuchli klublar etarli, benazir futbolchilar ham juda ko'p. Yangi televizion shartnomaning kuchga kirishi bilan chempionatda yulduzlar safi yanada kengayishi aniq. Shunday bo'lsada, har mavsum keng doirada tanilmagan futbolchilar ham yuzaga qalqib chiqishadiki, bu APLning eng katta yutuqlaridan biridir. Ayniqsa, joriy mavsum kashfiyotlar tortiq etishda ajralib turibdi. Keling, chempionat startigacha uncha tanish bo'lmagan, ammo qisqa vaqt ichida barchani hayratga solgan yangi chehralarga e'tibor qarataylik.
10. Josh KING («Bornmut»)
Mavsum boshida «Blekbern»dan «Bornmut»ga o'tgan futbolchi. O'sha vaqt uning transferi mutlaqo e'tiborsiz qoldirilgandi. Boshqacha bo'lishi mumkin ham emasdi. Axir norvegiyalik hujumchi hattoki, chempionshipda ham doimiy o'yin amaliyotiga ega bo'lmagan va butun o'tgan mavsum bo'yi atigi 4ta gol urgandi. Boz ustiga, shu gollarining 3tasi Angliya kubogi doirasida «Stok Siti» klubiga qarshi kechgan o'yinga to'g'ri kelgandi. Qarangki, APL debyutantining ortda qolgan bahslarida aynan King eng foydali futbolchi bo'ldi. Xullas, u «Bornmut»ning jarohat tufayli safdan chiqqan eng yaxshi to'purari - Kallum Uilson yo'qligini aslo sezdirmayapti. Kingning o'ziga ishonchi shu qadar baland ko'rinyaptiki, bundan ko'pchilik hayratga tushmoqda. U yaqinda taxminan shunday ma'noda gapirdi: «Manchester Yunayted»ni qanday mag'lub etdik? Menimcha, qarshi hujum paytidagi dovul sur'atim bilan nafaqat Lui van Gal, balki maydondagi raqiblarimni ham cho'chitib yubordim».
9. Dankan UOTMOR («Sanderlend»)
Bundan bir necha oy oldin bu o'yinchini deyarli hech kim tanimasdi. Mana, Uotmor qisqa porlash natijasida barchani o'ziga qaratdi. U hozirga kelib, batamom unutilgan «Oltrinxem» klubi (6-divizion vakili)da o'ynay boshlagan. Ammo kamtarin ko'ringan istiqboli tufayli o'qib, ta'lim olishga ko'proq e'tibor qaratgan. Deylik, yaqinda iqtisodiyot va biznes-menejment yo'nalishidagi tahsilning samarasi o'laroq, magistr maqomini oldi. «Sanderlend» esa hozirgacha hech qanday karomat ko'rsatolmadi, unga alohida nazar solish uchun asos ham yo'qdek. Faqat shu Uotmor zulmat saltanatidagi yorug' nurdek klub muxlislariga umid bag'ishlayapti. Dankan hali juda yosh, shunga qaramay, jamoada eng yaxshi driblingchi bo'lib turibdi. Xullas, «qora mushuklar» fanatlari unga kelajak umidi sifatida qarashyapti.
8. Manuel LANZINI («Vest Xem»)
«Bolg'achilar» yozda o'z tarkiblarini sifatli tarzda boyitishdi. Xususan, «Marsel»dan Dimitri Paye va «Chelsi»dan Viktor Mozes sotib olindi. Bu transferlar oldida «Al-Jazira»dan o'tgan Lanzini e'tibordan mutlaqo chetda qoldi. Lekin aynan shu futbolchi jamoaga naf bera olishini tezda isbotladi. Manuel ayniqsa, oxirgi haftalarda o'zini yorqinroq namoyon etyapti. Aniqrog'i, Paye jarohat sabab, chetga chiqqach, argentinalik yigit o'yin nazoratini o'z zimmasiga olishdan cho'chimadi. Xullas, mas'uliyatni to'la anglab, jamoadoshlarini o'z ortidan ergashtirdi, gollar ura boshladi. Tabiiyki, Slaven Bilich undan g'oyat xursand.
7. Dele  ALLI («Tottenxem»)
Hayratlanarli porlash: Alli chempionatning kuchli va o'ziga xos klublaridan birining o'rta chizig'iga shu qadar mos tushdiki, uning 19 yoshda ekanligiga ishonging kelmaydi. E'tibor bering, u bir yilcha oldin 3-divizionda «DK Dons» klubi sharafini himoya etardi. Xullas, «shporlar» safiga qo'shilayotganida ham, faqat uzoqroq kelajakka umid bog'lagandir. Ammo Maurisio Pochettino yosh yigitning faolligidan ko'z yumolmasdi. Qisqasi, Dele mashg'ulotlardayoq murabbiy mehrini qozondi. Mana, Pochettino endilikda uni xotirjam holda asosiy tarkibga kirityapti va yana bir iste'dod Erik Dayer yonida to'p surishini ta'minlayapti. To'g'ri, Dele Allining nafasi butun mavsumga etish-etmasligini hali tekshirib ko'rish kerak, harqalay, masofaning deyarli yarmi hali oldinda turibdi. Lekin shunday tasavvur borki, «Tottenxem» bag'rida barqaror to'p suruvchi yigit kamol top-yapti. Mutaxassislar uning faolligini e'tiborga olib, nafaqat «shporlar», balki Angliya terma jamoasi yarim himoyasining markazida ham uzoq vaqt o'ynovchi futbolchi bosh ko'tarayotganini ta'kidlashmoqda.
6. Joel KEMPBELL («Arsenal»)
«Kanonirlar»da chiziqlar, to'g'rirog'i, pozitsiyalar bo'yicha olganda, muammolar etarli. Faqat hujumkor yarim himoyachilar va qanot futbolchilari masalasida ko'ngil to'q. Harqalay, bu pozitsiyalar kuchaytirilishga muhtoj emas. Bir qarashda, Kosta-rikalik futbolchiga etakchilarning birin-ketin jarohatga yo'liqishgani qo'l kelgandek. Harqalay, hujumchi shu sabab, etarli o'yin amaliyotiga ega bo'lib, o'z salohiyatini isbotladi. Umuman, joriy mavsum Kempbell uchun oxirgi imkoniyat. Ya'ni u nihoyat, Arsen Vengerni jamoaga kerak ekanligiga ishontira olishi zarur. Mana, 1-2ta gol urdi va asosiysi, umumjamoaviy harakatlarda chakki ko'rinmayapti. Demak, barchasi yaxshi kechishidan umid qilishi mumkin.
Davomi InterFUTBOL gazetasi blogida.
— deya xabar beradi uff.uz nashri.