Ayni kunlarda “Qo'qon-1912” jamoasi Toshkentdagi yig'ini davom etmoqda. Murod Ismoilov boshchiligidagi murabbiylar shtabi mashg'ulotlarni qiziqarli tarzda olib borishmoqda. Mashg'ulotlar kuniga ikki mahal o'tkazilmoqda. Darvozabonlar bilan Xislat Chilmatov ishlamoqda. Qolgan futbolchilar ham o'zlarini ko'rsatish uchun mashg'ulotlarda ter tukishmoqda. Tohir Shamsiddinov bilan tuzilgan shartnoma ma'lum sabablarga ko'ra, bekor qilingani haqida kecha ma'lumot berdik. Hozircha tarkibda boshqa o'zgarishlar bo'lgani yo'q. Rejaga ko'ra, vakillarimiz “Bekobodning “Metallurg” jamoasiga qarshi navbatdagi nazorat uchrashuvini o'tkazishadi. O'yin ertaga bo'lib o'tadi. “Metallurg” jamoasi bilan shu kunga qadar Oliy liga doirasida o'zaro 12 marta to'qnash kelganmiz. O'yinlarning oltitasida “Qo'qon-1912” g'alaba qozongan. Ikkita uchrashuvda durang natija qayd etilgan. To'rtta bahsda bekobodliklarning qo'li baland kelgan. To'plar nisbati-21-17 “Qo'qon-1912” foydasiga. O'zaro o'yinlarda “Qo'qon-1912” 20 ochko jamg'argan. “Metallurg”ning bu boradagi qo'rsatkichi 14 ga teng. Bu jamoalarning so'nggi uchrashuvi 2015 yilning 25 oktyabr sanasida Qo'qonda bo'lib o'tgan edi. O'sha uchrashuvda qo'qonliklar 2:1 hisobida g'alaba qozonishgan.
— deya xabar beradi uff.uz nashri.