Kecha O'zbekiston olimpiya terma jamoasi Osiyo chempionatidagi ishtirokini boshladi. Afsuski bu “boshlov” biz uchun omadli kechmadi. Olimpiyachilarimiz Janubiy Koreyadan 1:2 hisobida mag'lubiyatga uchradilar, biz esa mana shu mag'lubiyatni tomosha qilish uchun ming chaqirimdan oshiq yo'l bosib Dohaga keldik...
Mayli, safar boshidan alamli gaplarni ko'p eslamaylik. Undan ko'ra Qatarda kechayotgan Osiyo chempionati va uning atrofida bo'layotgan voqeliklarga ko'proq urg'u beraylik. Odatda arab mamlakatlari haqida gap ketganda har doim jazirama issiq haqida gapiriladi. To'g'risini aytsak, bunday gap-so'zlarni hadeb eshitavergandan Qatar va “jazirama” so'zi sinonimga aylanib ketgan ekan. Ammo Doha bizni ancha salqin va yoqimli ob-havo bilan kutib oldi. Shu qadar salqinki, hatto biz – O'rta Osiyoning ancha qishli-qirovli kunlariga o'rgangan odamlar ham o'yinni tugatib, mehmonxonaga qaytishda sovqotib qoldik. Gap o'rnida kelganda aytish lozim, agar shaxsan o'zim FIFA rahbariyatida ishlaganimda, 2022 yilgi jahon chempionatini qishda o'tkazishga ovoz bergan bo'lardim. Ammo baxtga qarshimikan, yoki baxtimga bunday lavozimda faoliyat yuritmayman. FIFAda ro'y berayotgan so'nggi voqealarni inobatga olsak, bu ko'proq baxtdan bo'lsa kerak.
O'zbekiston olimpiya terma jamoasi Janubiy Koreyaga qarshi kechgan uchrashuvni xuddi shunday sharoitda o'tkazdi. O'tgan yili Tailandda bo'lib o'tgan o'smirlar o'rtasidagi JChni bevosita stadiondan kuzatgan odam sifatida aytar bo'lsam, olimpiyachilarimiz to'p surgan sharoit o'smirlarniki oldida “to'yga boradi”! Aleksandr Mochinov shogirdlari qoq tushda, kun qaynagan vaqtda to'p surgan edilar. O'shanda hatto biz – shunchaki o'yinni tomosha qilgan odamlar ham soyaga qochgan edik. Futbolchilar esa qizib turgan qozon misol stadionda to'p surganlar. Shunday ekan, olimpiyachilarimiz sharoitdan mutlaqo nolimasliklari va g'alaba ketidan g'alaba qozonishlari lozim.
Afsuski kecha bu ishni uddalay olmadilar, Janubiy Koreya bizning o'yinimizni “o'qib” olgan ekan, hech qanday imkoniyat qoldirmadi. Mayli, bo'lar ish bo'ldi. Endi keyingi o'yinlarga umid qilamiz. Nasib qilsa bugun kunni “As Sadd” stadionidagi media markazda o'tkazamiz. Osiyo chempionati tashkilotchiligi markazi aynan shu o'yingohda joylashgan. Biz mana shu stadionda o'tkazilayotgan tadbirlar bilan yaqindan tanishishni va sizni ham tanishtirishni maqsad qilganmiz. Shuningdek terma jamoa ishtirokidagi mashg'ulotni ham nazardan qochirmaslikka harakat qilamiz.
Olimpiyachilarimizga aytar gapimiz esa quyidagicha -  kecha tongda Toshkentdan Doha sari yo'lga chiqar ekanmiz, bizni hatto aeroport xodimlari ham yaxshi kayfiyatda kuzatishgan edi. Ular bizdan terma jamoa haqida ko'p so'radilar va futbolchilarni yaxshilab qo'llab-quvvatlashni iltimos qildilar. Eng qiziq gapni esa pasport nazorati bo'limida o'tirgan bir aka aytdi:  “Yigitlarga aytib qo'yinglar, faqat g'alaba bilan qaytishsin. Aks holda uyga kiritmaymiz...”
Albatta o'shanda bu gap hazil tariqasida yangragandi. Ammo kechagi mag'lubiyatdan kelib chiqib mushohada qilsak, balki rostan ham shunday qilish kerakmikan. Zora shunda Iroq va Yamanga qarshi kechadigan o'yinlar butkul boshqacha manzara kasb etsa...
Albatta bu ham bir hazil. Aslida futbolchilarimiz ham kechagi mag'lubiyatdan siz va bizdan kam emas, kerak bo'lsa ko'proq aziyat chekmoqdalar. Umid qilamizki, kelgusi g'alabalar bu ko'ngilsizlikni unuttirib yuboradi...
Zafar Qosimov, Doha
— deya xabar beradi uff.uz nashri.