Doha qay darajada zamonaviy shahar ekanini hamma yaxshi biladi. Pul neft va gaz quvurlaridan suvdek oqib kelayotgan bu mamlakat darhaqiqat osmono'par binolari va serhasham inshootlari bilan tanilgan. Biroq hozir biz sizga tanganing narigi tomonini ham biroz ko'rsatishga harakat qilamiz.
Bugungi ish kunini "As Sadd" stadionidagi media markazda o'tkazishga qaror qildik. Kecha O'zbekiston olimpiya terma jamoasi va Janubiy Koreya o'rtasida kechgan o'yin Qatar SKga tegishli "Suhaym bin Hamad" o'yingohida bo'lgan edi. Ammo media markaz holati biz kutgan darajada emas ekan. Shu sababli bugun "As Sadd" tomon yo'l oldik. Ko'raylikchi, u erdagi sharoitlar qanday ekan. "As-Sadd" ayni vaqtda nafaqat Osiyo, balki butun dunyo e'tiborida turgan klub hisoblanadi. Chunki kataloniyalik mashhur Xavi ushbu klub sharafini himoya qiladi.
Afsuski hozircha Xavini ko'rganimizcha yo'q. Ammo shunday niyat bor. "As Sadd" tomon yo'l olarkanmiz, e'tiborimizni boshqacha Dohaning qiyofasi tortdi. Biz o'tirgan taksi shahar markazi bilan emas, balki yo'lni qisqartirish uchun chetroqdagi ovloq ko'chalardan yurdi. Haydovchining ma'lum qilishicha, aslida bu chekka xududlar bir vaqtlar markaz bo'lgan. Ya'ni, o'zimizning "eski shahar"ga o'xshash joylar ekan.
Dohaning "eski shahri" Dohadan yurar ekansiz, zamonaviy shahar qiyofasi tezda eski mahallalar bilan almashishi yoki birdan qurilish maydoni boshlanib ketishiga ko'nikishingizga to'g'ri keladi. Hozirgi Doha ulkan qurilish maydonini eslatadi, deyarli har bir dahada nimadir bino etilayotganini albatta ko'rasiz. "As Sadd" stadionidagi media markazda yaratilgan sharoitlar darhaqiqat biz kutgandek bo'lib chiqdi. Bu erda jurnalistlar uchun lozim bo'lgan barcha narsa bor. Butun boshli futzal arenasi OAV ixtiyoriga berib qo'yilgan. Muxbirlarga xizmat ko'rsatayotgan texnik xodimlarning o'zi 30 nafardan oshiq. Bir so'z bilan aytganda, jurnalistdan ko'ra tashkilotchilar ko'proq. Har qanday muammo shu zahoti bartaraf etiladi.
Xullas shunday gaplar. Endigi reja - terma jamoamizning kechki mashg'ulotiga tashrif buyurish. Nasib qilsa Samvel Babayan shogirdlari qay tartibda mashq o'tayotgani haqidagi ma'lumot bilan kechki mahal tanishib olishingiz mumkin bo'ladi. Uff.uz'dan uzoqlashmang...
Zafar QOSIMOV, Doha
Uff.uz uchun maxsus  
— deya xabar beradi uff.uz nashri.