Uchrashuvga – “Imkoniyatlardan to'la foydalanilmagan o'yin” deya baho berdik. Balki, “Hakam bo'lsang – o'yin seniki” deb atash ham mumkindir... To'g'ri, kecha Babayan shogirdlari biz kutgan natijani qayd eta olmadilar.  Lekin, ilk o'yindagi mag'lubiyatdan so'ng o'z termamizni bor kuchimiz bilan tanqid qilishimiz ham yaxshi emasdek...   
O'yin nihoyasiga etishi bilan elektron pochtamizga yurtimizning turli hududlarida yashovchi ishqibozlarning tahlillari etib keldi. O'zi, aslida bahoni mutaxassis bergani ma'qul. Lekin, futbolda oddiy ishqiboz ham millionlar o'yinini   chin dildan sevgani uchun o'z fikrlarini bildirgisi keladi. Demak, tanishing: Janubiy Koreya – O'zbekiston o'yinidan so'ng terma jamoamiz futbolchilariga muxlislar qo'ygan baholar(8 balli tizimda).   
A. Abdujalilov – 4,0
Abdumavlon biz uchun “ochilmagan qo'riq”, chunki, bu golkiper saviyasi haqida deyarli tushunchaga ega emasmiz.  O'yin boshidan uning yuzidagi “bosim”ni ko'rib xijolat bo'la boshladik. Penaltini qaytarish esa qiyin masala edi. Joy tanlash, to'pga chiqish borasida hali ko'p ishlashi kerak ekan. Bahosini juda qiynalib, ming o'y bilan qo'ydik.
A. Komilov – 5,5
Maydonda mana shu yigitning harakatlari ajralib turgani aniq. Biz bilan bog'langan barcha muxlislari Akrom haqida yomon fikr bildirmadi. Sababi aniq: tarkibda bor kuchini berib o'ynagan uch o'yinchining biri mana shu futbolchimiz.   
M. Fomin – ?
Koreyslar ziyrak ekan! Ilk daqiqalardan qaysi o'yinchining bo'shligini topib olishdi. O'ng qanot eng ojiz nuqtamiz  ekanligini muxlislar ham besh daqiqadan so'ng bilib bo'lishgan edi. “Maks”da tezlik va maydonni ko'rish jamoadoshlarini his qilish singari sifatlarni umuman ko'rmadik, hisob. Unga muxlislar tomonidan  qo'yilgan bahoni e'lon qilmagan ma'qul. Chunki, uning o'yinidan ma'no topib, oddiy ishqibozlarni “mot” qiladigan mutaxassislar topilib qoladimi, deymanda.  
V. Kozak – 4,0
Bo'ydor, gavdasi joyida, qisqasi himoyachi uchun kerakli barcha jihatlar bor shu bolada. Faqat shijoat yo'q. Markazni ushlay olmagani uchun uni ayblash qiyin. Yordamchilari ham unga ko'mak berishmadi. Chunki raqib – dog'uli va kuchli ekan.
J. Boltaboev – 3,5
O'yin boshida raqiblardan to'pni olib qo'yishni yaxshi eplayotgan edi. Asta-sekin jismoniy tayyorgarlikni yaxshi emasligi bilinib qolib, eta olmayotgan joyida qo'pollik qildi. Oqibat – “qizil kartochka”. Jamoaning ikki barobar kuch bilan ishlashga majbur qildi shu yigit.
O. Shukurov – 5,0
Yakkakurashlarda harqalay jonbozlik ko'rsata olgan futbolchi. Bu futbolchida potentsial bor. Lekin, uzoqdan turib yoki jarima maydoniga kirmasdan  zarba beradigan futbolchilar kerak bizga. Urin uka, harakat qil.  
J. Sohibov – 5,0
Maydonda ishonchli harakat qilgan o'yinchilardan biri.  Asli barcha yoshdagi terma jamoalarimizda o'rta chiziqda yaxshi futbolchilar etarli, faqat...  Etakchi yo'q. Shuning uchun bu o'yinchi haqida ko'p yozmadik.
J. Iskanderov – ?
Nimagadir barcha ishqibozlar o'yin avvali Jamshidni tarkibda ko'rib quvonib ketishdi. Tezkor koreyslarga qarshi chiroyli o'yin emas, kuchli reaktsiya zarurligi aniq-ku? Jamshid zargarona paslarga bo'lgan urinishini ikkita gol bilan oldinga chiqib olgach amalga oshirish kerak. Sust mana shu bola - juda sust. Tezlikdan asar yo'q. Ikkinchi golda mana shu bolaning aybi bor.  Jamshidga ham o'yiniga yarasha baho qo'ygani uyaldik, rosti...
D. Hamdamov  - 5,0
Makkor va sifatsiz hakam o'yin boshqarsa, o'yinchilar  ochilmas ekan. Doston o'z saviyasida o'ynamagan bo'lsada, ajoyib gol kiritdi
E. Shomurodov – 4,0
Mana shu bolaga ishongan edik. Yo uni raqib himoyachilari yopib tashladi yoki Eldor ochilishni bilmadi. Tuzuk-quruq to'p bilan muomala qilganini ham ko'rmadik.  
I.  Sergeev – 4,0
Sergeev sardor edi. O'yinini ko'rib, uni tanimay qolganimiz rost. To'g'ri u hujumchi, bilamizki agar oldingi chiziq egasini yarim himoyachilar to'p bilan ta'minlamasa, hech narsa qila olmaydi. Balki uni ham koreys himoyachilari “yopib” tashlagandir... Raqib unga sovg'a bergan edi? Sovg'ani olib, chaqqonlik bilan harakat qila olmay... Uyog'ini ko'rdingiz... Navbatdagi o'yinda balki “ochilar”, yana bilmadik.
S. Rahmonov, J. Masharipov va H. G'ofurov   
Sardor o'yinni ilk daqiqalaridan asosiy tarkibda harakat qilishga haqli ekanini ko'rsata oldi. Masharipov to'p bilan maydonda dadil yura olar ekan. Husniddin qo'shilganida esa ko'p narsa hal bo'lgan edi...
Meni tahlilim yurtimizning turli burchaklarida istiqomat qiladigan muxlislar fikriga tayangan holda yozildi.
Kimgadir baho berish asli mutaxassislarning kasbi bo'lsada, yuqoridagi ballarni – “nomutaxassis jonkuyar muxlislar bahosi” deb qabul qilishingizni istardim. Ha, aytganday, muxlislar navbatdagi o'yinda Ikrom Aliboev va Temur Hakimovni kutishyapti... Elmurod ERMATOV ([email protected])
— deya xabar beradi uff.uz nashri.