Prezidentimizning 2013 yil 25 fevraldagi “O'zbekiston sportchilarini 2016 yil Rio-de-Janeyro shahri (Braziliya)da o'tkaziladigan XXXI yozgi Olimpiya va XV Paralimpiya o'yinlariga tayyorlash to'g'risida”gi qarori ushbu nufuzli musobaqaga tayyorgarlik ishlarini tizimli asosda olib borishda dasturilamal bo'layotir.
O'zbekiston Milliy olimpiya qo'mitasi raisi o'rinbosari Farhod Turdiev O'zA muxbiriga mamlakatimizda sportni, jumladan, olimpiya harakatini rivojlantirish borasida amalga oshirilayotgan ishlar, sportchilarimizning jahon maydonlarida erishayotgan yutuqlari, XXXI yozgi Olimpiya o'yinlariga tayyorgarlik xususida quyidagilarni so'zlab berdi:
– Prezidentimiz rahnamoligida jismonan va ma'nan etuk avlodni voyaga etkazishda sport eng muhim va samarali vositaga aylandi. Zero, sport orqali insonda salomatlik, barkamollik, qat'iyat, mardlik, milliy g'urur kabi fazilatlar shakllanadi. Farzandlarimizni ushbu omillar asosida kamol toptirish, ularning o'z aql-zakovati va salohiyatini to'la namoyon etishi, bugungi va ertangi hayotimizning hal qiluvchi kuchiga aylanishi yo'lida ulkan ishlar amalga oshirilmoqda.
Ommaviy sport rivojida uch bosqichli tizim – “Umid nihollari”, “Barkamol avlod” va Universiada musobaqalari muhim ahamiyat kasb etmoqda.
Bugungi zamon barcha sohalarda, jumladan, sportda ham yangi talab va vazifalarni qo'ymoqda. Bu mamlakatimizda ommaviy sport rivoji yo'lidagi ishlarni yangi bosqichga ko'tarish, terma jamoalar, murabbiy va sportchilarning professional mahoratini muttasil oshirib borishni taqozo etmoqda.
Davlatimiz rahbarining yuqoridagi qarori ijrosini ta'minlash maqsadida aniq chora-tadbirlar dasturi ishlab chiqilib, O'zbekiston Milliy olimpiya qo'mitasi, tegishli vazirlik va idoralar, sport federatsiyalari tomonidan izchil ishlar olib borilmoqda.
Milliy olimpiya qo'mitasi faoliyatini zamon talablari asosida takomillashtirish uchun qator tashkiliy ishlar amalga oshirildi. Toshkent shahri, Qoraqalpog'iston Respublikasi va viloyatlarda qo'mitaning hududiy vakillari faoliyati yo'lga qo'yildi. Joylarda sport tadbirlarini o'tkazish, iqtidorli yoshlarni kashf etish ularning asosiy vazifasi etib belgilandi.
Olimpiya o'yinlariga yo'llanmani qo'lga kiritish va nufuzli musobaqalarda sovrinli o'rinlarni egallash imkoniyati yuqori bo'lgan istiqbolli sport turlari aniqlanib, ular bo'yicha federatsiyalar faoliyati atroflicha o'rganib chiqildi. Xalqaro tajribadan kelib chiqqan holda, ayrim federatsiyalar birlashtirildi.
Qaror ijrosi doirasida O'zbekiston Respublikasi Vazirlar Mahkamasining 2013 yil 2 aprelda “O'zbekiston Milliy olimpiya qo'mitasi huzuridagi O'zbekiston olimpiadachilarini qo'llab-quvvatlash jamg'armasi faoliyatini tashkil etish to'g'risida”gi qarori qabul qilindi. Jamg'arma mablag'lari sport federatsiyalarining moddiy-texnik bazasini yanada mustahkamlashga yo'naltirilmoqda.
Poytaxtimizda barpo etilgan O'zbekiston Milliy olimpiya qo'mitasining yangi binosida mamlakatimiz sportchilarini tibbiy-biologik xizmat va sport psixologiyasi bilan ta'minlash bo'yicha ixtisoslashtirilgan markaz tashkil etildi. Bu erda eng zamonaviy tibbiy asbob-uskunalar o'rnatildi, etakchi shifokorlar faoliyat olib bormoqda.
O'zbekiston Madaniyat va sport ishlari vazirligi hamda Milliy olimpiya qo'mitasi hamkorligida sportchilarimizning xalqaro musobaqalarda qatnashishi uchun zarur sharoit yaratish, ularning natijalarini tahlil etish va monitoringini yuritish bo'yicha tizimli ishlar olib borilmoqda.
Murabbiylarning bilim va malakasini oshirish uchun xalqaro o'quv va ilmiy-amaliy seminarlar yo'lga qo'yilib, mashg'ulotlarga barcha viloyat va tumanlardan murabbiylar jalb etilmoqda. Ular xalqaro federatsiyalar va sport tashkilotlarining tajribali mutaxassislari boshchiligida nazariy va amaliy bilimlarini mustahkamlamoqda. Olimpiya sport turlari bo'yicha xalqaro federatsiyalarda mamlakatimiz mutaxassislari faoliyatini kengaytirishga ham alohida e'tibor qaratilmoqda.
Olimpiya va Paralimpiya o'yinlari dasturiga kiritilgan sport turlari bo'yicha O'zbekiston sportchi va murabbiylariga stipendiya to'lash tartibi to'g'risidagi nizom tasdiqlanib, xalqaro maydonlarda mamlakatimiz sharafini munosib himoya qilayotgan sportchilar va ularning ustozlari har oyda rag'batlantirib borilmoqda.
Prezidentimiz qarori ijrosi yuzasidan amalga oshirilgan bu sa'y-harakatlar o'z samarasini berayotir.
2015 yilda Xalqaro olimpiya qo'mitasi prezidenti Tomas Bax va Osiyo milliy olimpiya qo'mitalari assotsiatsiyasi va Osiyo olimpiya kengashi prezidenti Shayx Ahmad al-Fahad as-Saboh tinchlik-osoyishtalik, iqtisodiy-ijtimoiy taraqqiyot, ta'lim va yoshlar masalasiga e'tibor sport rivojida muhim ahamiyat kasb etishini, ana shunday muhit va sharoit tufayli O'zbekistonda sport jadal rivojlanayotganini alohida ta'kidladi.
Olimpiya o'yinlari dasturidan joy olgan qator sport turlari bo'yicha o'tkazilgan jahon va qit'a chempionatlari, xalqaro turnirlarda sportchilarimizning g'alabalari salmog'i ortib borayotir.
2015 yil yakuniga ko'ra, sportchilarimiz ana shunday musobaqalarda 311 oltin, 274 kumush, 276 bronza, jami 861 medalni qo'lga kiritdi.
Bokschilarimiz Toshkent shahri va Tailandda o'tkazilgan o'smirlar va kattalar o'rtasidagi Osiyo chempionatlarida 9 oltin, 11 kumush va 1 bronza medalga sazovor bo'ldi. O'zbekiston o'smirlar terma jamoasi a'zolarining Rossiyada boks bo'yicha jahon chempionatida 2 tadan oltin va kumush, 3 bronza medalni qo'lga kiritgani yurtimizda mohir charm qo'lqop ustalari etishib chiqayotganini yana bir karra isbotladi. Qatarda o'tkazilgan kattalar o'rtasidagi jahon chempionatida terma jamoamiz a'zolarining uchtadan kumush va bronza medal bilan taqdirlangani o'zbek boks tarixida yangi sahifa ochdi.
Erkin va yunon-rum kurashi bo'yicha O'zbekiston kattalar, yoshlar va o'smirlar terma jamoalari Qatar, Hindiston va Myanma davlatlarida o'tkazilgan Osiyo chempionatlarida yuqori natijalarga erishdi, Bosniya va Gertsegovina, Braziliya, AQShda o'tgan jahon chempionatlarida munosib ishtirok etdi.
Og'ir atletika ustalari Tailandda o'tkazilgan Osiyo chempionatida bitta oltin va to'rtta bronza, AQShda tashkil etilgan jahon chempionatida bittadan oltin va bronza medalga sazovor bo'ldi. Engil atletika, badiiy gimnastika, sport gimnastikasi, dzyudo, velosport, baydarka va kanoeda eshkak eshish kabi qator sport turlari bo'yicha erishilgan natijalar ham tahsinga loyiq.
Ayniqsa, yosh sportchilarimizning qo'lga kiritayotgan ulkan g'alabalari o'zbek sporti kelajagini butun dunyoga namoyon etmoqda. Polshaning Vrotslav shahrida og'ir atletika bo'yicha o'smirlar o'rtasidagi jahon chempionatida Adham Ergashev uchta kumush, Davron Kenjaev bitta bronza medal bilan taqdirlandi. Dzyudo bo'yicha Bosniya va Gertsegovinaning Saraevo shahri mezbonlik qilgan kadetlar o'rtasidagi jahon chempionatida Diyora Keldiyorova shohsupaning eng yuqori pog'onasiga ko'tarildi, Jasur Sodiqov va Sherxon To'raboev uchinchi o'rinni egalladi. Jamoaviy bellashuvlarda qatnashgan terma jamoamiz a'zolari bronza medalga sazovor bo'ldi.
Bu kabi misollarni yana ko'plab keltirish mumkin. Asosiysi, sportchilarimiz O'zbekistonimizning dunyo miqyosidagi obro'si yanada oshishiga munosib hissa qo'shib, kuch va iste'dod bobida hech kimdan kam emasligini namoyon etmoqda.
Bugunga qadar jami 51 nafar sportchimiz XXXI yozgi Olimpiya va XV Paralimpiya o'yinlariga yo'llanmani qo'lga kiritdi.
Joriy yilda ham sportchilarimiz Olimpiya o'yinlariga yo'llanma beruvchi qator chempionatlar va nufuzli turnirlarda ishtirok etadi.
2016 yili dunyo ahlining diqqat-e'tibori har to'rt yillikning eng yirik sport musobaqasi – Braziliyaning Rio-de-Janeyro shahri mezbonlik qiladigan XXXI yozgi Olimpiya o'yinlariga qaratiladi. Ushbu nufuzli o'yinlarda sportchilarimiz yuqori natijalarga erishib, O'zbekistonimizning jahon miqyosidagi obro'-e'tiborini yanada yuksaltirishiga ishonamiz.
Manba: UzA, olympic.uz
— deya xabar beradi uff.uz nashri.