O'zbekiston olimpiya terma jamoasi hujumchisi Igor Sergeev Janubiy Koreyaga qarshi kechgan uchrashuvda etarlicha yaxshi o'ynay olmagani sabablarini aytarkan, Iroq bilan bo'ladigan bahsda albatta xatolarini to'g'rilashga bor kuchi bilan harakat qilishini ta'kidladi.
- Janubiy Koreya bilan bo'lgan o'yinda yaxshiroq natijaga erishsak ham bo'lardi. Ammo omadimiz kelmadi. Raqibga etarlicha qarshilik ko'rsatdik va qulay imkoniyatlarga ham ega bo'ldik. Agar gol ura olganimizda vaziyat boshqacha bo'lardi. Omadimiz kelmadi. Men yoki Jamshid Iskanderov gol urganimizda boshqacha o'yin ko'rardik.
- Siz milliy terma jamoa, yoshlar terma jamoasi va mana endi olimpiya terma jamoasida ham asosiy hujumchi bo'lib kelmoqdasiz. Yana "Paxtakor"da ham muntazam ravishda asosiy tarkibdasiz. Balki o'yin ko'pligi sabab avvalgi hayajon va ishtiyoq so'nib qolgandir.
- Yo'q, bunday deb o'ylamayman. Balki sizga shunday tuyulgandir. Mening ko'zlarimdagi o't so'nib qolmagan. Faqat gap shundaki, men markaziy hujumchiman va o'yinim yarim himoyachilarga juda bog'liq. To'psiz qolsam ortga qaytib, 5, 6 futbolchini aldab kela olmayman. Mening ishim boshqacha. Janubiy Koreyaga qarshi kechgan o'yinda menda bittagina imkon bo'ldi va u ham raqib himoyachilarining xatosi tufayli yuzaga keldi. O'sha vaziyatda gol urganimda hammasi boshqacha bo'lardi-ku, ammo...
- Savollar bo'lishi tabiiy, chunki mag'lubiyatga uchradingiz. Janubiy Koreya bilan bo'lgan o'yinda ikki himoyachi mudom sizni qo'riqladi va o'yin bermadi. Iroq bilan ham shunday bo'lishi turgan gap. Bu muammoni qanday hal qilmoqchi bo'lyapsiz?
- Qanday hal qilardik, Iroqqa qarshi kechadigan o'yinda nostandart o'yin ko'rsatmoqchiman, mudom harakatda bo'lib, himoyachilar kutgan tomon emas, balki teskari tomonga yuguraman, ularni chalg'itishga harakat qilaman. Baribir meni 90 daqiqa davomida qo'riqlay olmaydilar. Gol urish uchun albatta imkoniyat bo'ladi va undan foydalanishim kerak. O'shanda boyagidek savollar bo'lmaydi.
- Bunday o'yinning bitta muammoli tomoni bor -  juda kuchli jismoniy tayyorgarlik kerak bo'ladi. Siz bunga tayyormisiz?
- Albatta tayyorman. Nafaqat men, balki butun jamoamiz bunga tayyor. Zafar QOSIMOV, Doha
Uff.uz uchun maxsus
— deya xabar beradi uff.uz nashri.