O'zbekiston olimpiya terma jamoasi yarim himoyachisi Dostonbek Hamdamov Osiyo chempionati doirasida Iroqqa qarshi kechadigan o'yin oldidan fikrlarini bildirib o'tdi.
- Janubiy Koreyaga qarshi kechgan uchrashuvda uzoqdan chiroyli zarba yo'llab gol urgandingiz. Ammo unga qadar ikki marta noaniq zarba berdingiz. Murabbiylar o'sha vaziyatlar uchun e'tiroz bildirishmadimi?
- Yo'q, men shunchaki darvoza tomon zarba beravermayman. Agar hujumni davom ettirish uchun boshqa imkoniyat bo'lsa, albatta undan foydalanaman. Kimdir mendan qulayroq vaziyatda tursa, unga to'pni uzataman. Faqat zarba berishdan boshqa yo'li qolmasa, keyin to'pni tepaman.
- Iroq haqida nima deya olasiz? Bu o'yinda faqat g'alaba qozonish shart.
- Iroq juda kuchli . Mana shu yoshdagi jamoasi Osiyo chempionati finalida Janubiy Koreya bilan o'ynagan edi. Demak ular ancha kuchli. Ammo biz bu o'yinga etarlicha tayyorgarlik ko'rmoqdamiz va albatta g'alaba qozonamiz.
- Janubiy Koreyaga qarshi kechgan o'yinda mag'lubiyatga sabab bo'lgan qanday asosiy xatoni Iroq bilan bo'ladigan uchrashuv oldidan to'g'rilash kerak, deb o'ylaysiz?
- Himoyada tartibliroq o'ynash kerak, deb o'ylayman. Buning uchun butun jamoa bo'lib harakat qilishimiz kerak.
Zafar QOSIMOV, Doha
Uff.uz uchun maxsus
— deya xabar beradi uff.uz nashri.