Ho'sh, o'zbek taomlarining gultoji bo'lgan palovni tayyorlash uchun qanday masalliqlar zarur? Andijonni “devzira” yoki Xorazmning “Alanga” guruchi, qora qo'chqorning go'shti va dumba yog'i, Oltiariqning sersuv sabzisi, Kosonsoyda etishtirilgan sara piyoz, ezilgan zira bo'lsa barcha masalliq tayyor deganida! Ta'bga qarab behi, no'hat solish mumkin, oshdan keyinga Farg'onaning turpidan bo'lsa yana yaxshi.
Endi, “quling o'rgilsin” palovxonto'rani pishirish uchun qo'li shirin oshpaz bo'lishi kerak. Ha, osh damlash hammaga emas, ayniqsa chet eldagi tanlovda bo'lsa...  
Ko'pchilik shinavandalar Dohadagi tanlovga yuborilgan masalliqlardan “tovoqda guruchi o'rmalab ketadigan palov” damlash mumkin edi, deb o'ylashyapti. Ba'zilari  – “guruchning olasi ko'p, toshi yaxshi terilmagandi!” desa, yana birlari   “ko'p kaltak emagan guruchga zig'ir yog'i yaxshi edi” deb boshni qotiradi. Qaranga, -Inileev bir vaqtlar oqshoqdan ham zo'r osh damlagan emish...   
Umuman olganda, barcha oshga zarur sabzavotlarni butun O'zbekistondan saralab yiqqan bo'lsak ham palov o'hshamadi.  
Anjanni “Cho'ntak” choyxonasida o'tirib, bir piyola ko'k choy ichganingizdan so'ng - avval “jizza” keladi. Dohada esa, birinchi urinishda kart dumba  kuyib ketib, “jizza” o'rniga ikkita tarelkada koreyscha lapsha qo'shilgan “kuksu”(izoh: koreys milliy taomi) eyishga majbur bo'ldik, qarang... Dostonbek degani uzoqdan Kim Dong Jin deganiga bir tishlam nimadir edirib qoldi, xolos. To'g'risi, koreys oshxonasi rang-barang ekan. Turli salatlar bilan biznikilarni rosa “edirishdi”.  Qisqasi o'sha kuni “osh o'hshamadi”      
Biz esa umid bilan ikkinchi urinishni kutdik. Boshida piyoz kuydirmasdan qovurilib, sabzining ham bug'i ko'tarilib qolgandi, chog'i... Iroq oshxonasining alohida xususiyatlari bor ekan. Ularda barcha ovqatlarga achchiq qalampir, piyoz, sarimsoqpiyoz ko'p miqdorda solinishini bilmabmiz... Palov o'rniga iroqcha achchiq “baba ganush”(izoh: iroq milliy taomi) eb, uch kundan beri suv ichib yuribmiz. Yurakni o'rtab yubordi, mana shu taom. HALI HAM O'ZIMIZGA KELGANIMIZ YO'Q. Oshpaz “palovni damlay olmadi”. Osh o'rniga pishgan “shavla” yana bilmadim, balki o'rischa “kasha”dir, hali ham tomoqdan o'tmayapti.         
- Oshpazimiz so'ngi paytlarda katta-katta doshqozonlarda BESh bora binoyidek osh damlab yurgan odam ediku, deysizmi?..
Palov degani har doim ham o'hshayvermaydi. Katta-kichik davralarda mahalla va chet ellarda tajribasi oshgan kuchli oshpazlardan o'rganib kelgan mutaxassis kerakmi, deymanda bizga?
Axir, taom pishirish uchun ko'p yillik tajriba kerak bu axir qimor emaski, tavakkaliga “Yo, Jamshid” degani, ko'pchilikning risqi. Lekin, yangi chiqqan “Abbos”, “Rustam”, “Diyor” ziravorlari ham yomon emasdi. Mana shularni qo'shish kerakmidi...      
Rioda futbol palovini pishirish endi sarobga aylangani, rost. 2018 yili Rusiyada eng katta “Palov sayli” bo'ladi. Bor umid shundan...
Ha aytganday, ertaga “tagi olib ketgan”i aniq palovni yamanliklarga tortamiz.
Yoqimli ishtaha!  Elmurod ERMATOV

— deya xabar beradi uff.uz nashri.