Velotrek bo'yicha O'zbekiston terma jamoasi a'zolari shu yilning 20-26 yanvar kunlari Yaponiyada o'tkaziladigan Osiyo chempionatida ishtirok etish uchun kunchiqar yurtga jo'nab ketdilar.
Mazkur Osiyo chempionatida ham joriy yil Rio-de-Janeyro shahri (Braziliya)da o'tkaziladigan XXXI yozgi Olimpiada o'yinlarining yo'llanmalari uchun reyting ochkolar o'ynaladi. Qit'a chempionatida kuchli uchtalikka kirgan sportchilar joriy yilning 20 fevral kuni London shahri (Buyuk Britaniya)da boshlanadigan jahon chempionatida ishtirok etish huquqini qo'lga kiritadilar. Jahon chempionati yakunlariga ko'ra yakuniy reyting jadvali e'lon qilinadi va eng yaxshi ko'rsatkichga ega bo'lgan 18 nafar sportchi XXXI yozgi Olimpiada o'yinlariga yo'llanma oladi.
Ta'kidlash joizki, ayni paytda hamyurtlarimiz orasida Timur Gumerovda “Rio-2016” o'yinlari litsenziyasini qo'lga kiritish imkoniyati mavjud yuqori. Timur 2015 yili bo'lib o'tgan Osiyo chempionatida oltin medalga sazovor bo'lgan edi va bu yilgi qit'a chempionatida ham unga katta ishonch bildirilmoqda. Timur Gumerov yaqinda Gonkongda o'tkazilgan jahon kubogining uchinchi bosqichida ishtirok etib, navbatdagi 24 reyting ochkosini o'z hisobiga yozib qo'ydi (Osiyo chempionatida g'oliblikka erishgan sportchi 200 reyting ochkosiga ega bo'ladi).
Ma'lumot uchun. Qit'a chempionati doirasida Osiyo velosport konfederatsiyasining Kongressi o'tkaziladi. 25-26 yanvar kunlari o'tkaziladigan Kongressda O'zbekiston velosport federatsiyasi bosh kotibi Ismoiljon Karimov ham ishtirok etadi. Osiyo chempionatida Vatanimiz sharafini Timur Gumerov, Ruslan Fedorov, Andrey Izmaylov, Roman Shukurov va Timur Yambulatov himoya qiladilar. Jamoaviy bahslarda terma jamoa murabbiyi Vladimir To'ychiev sportchi sifatida ham ishtirok etadi. Shavkat Jalilov O'zbekiston Milliy Olimpiya qo'mitasi
matbuot xizmati
— deya xabar beradi uff.uz nashri.