O'zbekiston olimpiya termasining Qatardagi yurishi juda tez tugadi - bor-yo'g'i 2ta o'yin­dan so'ng futbolchilarimizning qay darajada kuchga ega ekanliklarini bilib oldik. Aniqrog'i, ega emasliklarini. Guruhdan chiqolmasligimizga ishonch hosil qilish uchun bizning «azamatlar»ga 2tagina o'yin kifoya ekan. Shu o'yinlarni bevosita stadionda tomosha qilgan inson sifatida umumiy tafsilotlarni hikoya qilamiz.
BIRINChI O'YIN OLDIDAN
Doxada birinchi o'yin Janubiy Koreya termasiga qarshi o'tkazildi. Uchrashuv haqida oldindan bildirilgan fikrlarga ko'ra, koreyaliklar favorit edilar. Ammo avstraliyalik jurnalistlar biz bilan suhbatda ko'proq O'zbekiston olimpiya termasiga ishonishlarini bildirdilar. Tarkibimizda Osiyoning eng yaxshi yosh futbolchisi - Dostonbek Hamdamov borligining o'zi ham ularning nazdida jamoamizga ishonchni oshirib yuborardi. Ammo to'g'risini ayt­sak, ko'nglimiz ancha xijil edi. Sababi oddiy - bu avlod vakillari ko'plab murabbiylar qo'l ostida o'ynab ko'rdilar. Bunday holatda hamjihatlikka putur etishi mumkin va aynan shundan cho'chib turgandik.
Yakunda biz qo'rqqan holat ro'y berdi. Avstraliyalik hamkasblarimiz faqat bir jihatdan haq bo'lib chiqdilar - darhaqiqat, Dostonbek Hamdamov havas qilsa arziydigan futbolchi. U o'z goli bilan buni isbotladi. Ammo jamoamiz...
TARKIB
Samvel Babayan Janubiy Koreya termasiga qarshi bahsda darvozabon masalasida adashmadi, hujumchi va yarim himoyachilar ham o'z joylarida. Ammo himoya borasida murabbiy qaroriga tushunish qiyin bo'ldi. Zero, Babayan markaziy himoyada Vladimir Kozak va Maksimilian Fominga ishonch bildirdi. Bu katta tavakkal edi. Osiyo chempionatini yoritish uchun biz bilan birga Doxaga kelgan hamkasbimiz Davron Fayziev tarkibni ko'rgani hamono shunday dedi: «Bu futbolchilar qachon oxirgi marta markaziy himoyada o'ynashganini eslay olmayman». «Sport» telekanali sharhlovchisi eslolmagan narsani biz ham yodga ololmadik.
O'YIN
O'zbekiston olimpiya termasi yomon o'yin namoyish qilmadi aslida. Umumiy jihatdan olib qaraganda, futbolchilarimiz raqib bilan tengma-teng kurashdilar. Ammo o'yin har qancha ishonchli tuyulmasin, hisobda aks etmas ekan, hammasi bekor...
Biz qo'rqqandek, himoya ancha pand berdi. Garchi Vladimir Kozak imkon qadar o'z saviyasini ushlab turishga intilgan bo'lsa-da, Fomin xususida bunday, deyish qiyin. Markaziy himoyachi jamoadagi eng ishonchli ijrochi bo'lishi shart. Agar to'p undan o'tsa, faqat darvozabon qoladi. Shunday ekan, u o'z harakatlarini mudom nazorat qilishi lozim. Ammo Fomin bir necha bor xatoga yo'l qo'ydi. Ayniqsa, ikkinchi bo'limda Janubiy koreyalik futbolchining oddiy aldamchi harakatlariga uchgani va oqibatda gol yuzaga kelgani alam qildi. Himoyachi raqib o'yinini o'rganib, keyin maydonga tushmaydimi?
KAMChILIKLAR
Bu o'yin jamoamizning ko'plab kamchiliklarini ochib berdi. To'g'ri, birinchi gol borasida futbolchilarimizga ko'p e'tiroz bildirolmaymiz. Bu vaziyatda Caudiya arabistonilik hakam Fahad al Mirdasiy o'zini Osiyo­ning eng yaxshi hakami sifatida tanlab, xatoga yo'l qo'yganlarini isbotlab qo'ydi. Darvoqe, o'sha goldan so'ng xorijlik jurnalistlar yonimizga kelib, hakamning xatosini surat va videolavhalar orqali ko'rsatgancha bizga tasalli berishdi. Faqat, iroqlik jurnalist penalti borligini aytib, turib oldi. Bu jurnalist o'z manfaa­tini himoya qilganini inobatga olsak, ko'p ham hayron qolish shart emas. Boz ustiga, penalti belgilangach, tortishishdan naf yo'q. Aslida bunday vaqtda tortishish emas, balki vaziyatni o'nglash haqida o'ylash kerak. Afsuski, bizning futbolchilar bu ishni uddalay olmadilar.
IKKINChI O'YIN OLDIDAN
Birinchi o'yindan so'ng asosiy vazifa Iroq termasiga qarshi kechadigan bahsga qadar kamchiliklarni bartaraf etish edi. Ammo Samvel Babayanda buning uchun etarli vaqt bo'lganiga shubha qilamiz. Boisi, bir oy oldin ishlab chiqilgan ish uslubiga ko'ra, futbolchilarga o'yinning ertasiga dam berildi. Faqat, ikki kundan so'ng jamoa ilk mashg'ulotini o'tkazdi. U iroqliklarga qarshi o'yin oldidan so'nggisi bo'lib qoldi.
Davomi InterFUTBOL gazetasi blogida.
— deya xabar beradi uff.uz nashri.