Mana, evrofutboldagi etakchi birinchiliklarning birinchi davrasi yakunlanib, hal qiluvchi bosqich bahslari boshlanib ketdi. Turnir jadvaliga nazar solsangiz, ayrim jamoalarda umid ham qolmagandek ko'rinadi. Ammo unutmaslik kerakki, futbol dunyo-si qandaydir taxminlar yoki tushunchalarni uncha tan olmaydi. Bunga dalil sifatida birinchi davrani autsayderlar qatorida yakunlagan, ammo oraliq tanaffusdan so'ng misli ko'rilmagan yuksalishni qayd etgan ba'zi klublarni keltiramiz. Aniqrog'i, oxirgi 10 yil davomida «botqoq»dan birdaniga yuqoriga sakragan irodasi mustahkam klublar bilan tanishishni taklif etamiz.
10. «Lester»
Mavsum: 2014|2015
Birinchi davradan keyingi natijasi: 20-o'rin, 13 ochko
Yakuniy natijasi: 14-o'rin, 41 ochko (+28 ochko)
Ha, ha, bu ayni haqiqat. «Lester» bir yilcha oldin turnir jadvalining so'nggi pog'onasida turgandi. Ochig'ini aytish kerak, bu reytingga tushishga munosib, ya'ni yanada yorqinroq yuksalishni qayd etgan klublar bor. Biroq «Lester»ning hozirgi natijalarini nazarda tutib, uni ro'yxatdan chetda qoldirishni istamadik. Xullas, o'tgan mavsum jamoani Nayjel Pirson boshqargandi. Yaxshi startdan so'ng «tulkilar» uchun «qora davr» boshlandi. Klub chempionshipga tushib ketishni taqozo etadigan zonadan faqatgina 34-turga kelibgina chiqishga erishdi. Finishda esa 14-pog'onadan joy oldi - bunga 7ta g'alaba va 1ta durangdan iborat mag'lubiyatsiz seriya imkon berdi.
9. «Parma»
Mavsum: 2005|2006
Birinchi davradan keyingi natijasi: 17-o'rin, 15 ochko
Yakuniy natijasi: 7-o'rin, 45 ochko (+30 ochko)
Umuman, «Parma» mavsumning ikkinchi qismini yaxshiroq o'tkazishga odatlangan. Misol uchun, klub 2006|2007 yillar chempionati ikkinchi davrasida ham naq 7 pog'ona yuqorilagandi (19-o'rindan 12-o'ringa). Bundan bir yilcha oldin esa «Parma» shu qadar yuksaldiki, hattoki, UEFA kubogiga yo'llanma oldi. To'g'ri, faqat o'z xizmatlari tufayli emas. Zero, korruptsion janjalga aralashgan klublardan jami 30 ochko olib tashlangani turnir jadvalidagi holatga bevosita ta'sir qilgandi.
8. «Espanol»
Mavsum: 2008|2009
Birinchi davradan keyingi natijasi: 18-o'rin, 15 ochko
Yakuniy natijasi: 10-o'rin, 47 ochko (+32 ochko)
O'sha mavsum «Barselona» navbatdagi chempionlik sari dadil odimlayotgan vaqt Kataloniyaning boshqa qismida jiddiy muammolar bosh ko'targandi. «Kamp Nou»dagi javob uchrashuvidan oldin «to'tiqushlar» hisobida atigi 18 ochko bor edi. Boz ustiga, klub qatorasiga 14ta o'yinda g'alaba nimaligini bilmagandi. Qarangki, «Espanol» noxush seriyasiga aynan shu uchrashuvda nuqta qo'ydi. 2:1 hisobidagi g'alaba jamoaga shu qadar kuch bag'ishladiki, u oxirgi 8ta o'yinda naq 21 ochko to'pladi. Bu ochkolar «to'tiqushlar»ning nafaqat kuchlilar qatorida «jon» saqlab qolishlari, balki turnir jadvalining yuqori 10taligidan joy olishlariga ham kifoya qildi.
7. «Kristal Pelas»
Mavsum: 2014|2015
Birinchi davradan keyingi natijasi: 18-o'rin, 16 ochko
Yakuniy natijasi: 10-o'rin, 48 ochko (+32 ochko)
APL-2014|2015da qiyin holatdan munosib chiqib ketish birgina «Lester» emas, «Kristal Pelas»ga ham nasib etdi. Londonliklar chempionatning birinchi yarmida umuman sust ko'rinishdi. Faqat Alan Pardyuning klubga qaytishi bilan ishlar o'nglandi. E'tibor qarating, «burgutlar» 3 oy ichida turnir jadvalida naq 11 pog'ona yuqoriga sakrashdi. Natijada Pardyu mavsumning eng yaxshi murabbiyi bo'lishga da'vogarlik qildi. Aytgancha, «Kristal Pelas» joriy mavsum xuddi «Lester» kabi juda yaxshi ishtirok etyapti.
6. «Deportivo»
Mavsum: 2007|2008
Birinchi davradan keyingi natijasi: 19-o'rin, 17 ochko
Yakuniy natijasi: 9-o'rin, 52 ochko (+35 ochko)
Mavsum Galisiya klubi uchun o'ta dahshatli boshlandi. Vaziyat tobora qaltislashib borayotganini tushungan bosh murabbiy - Anxel Lotina o'yin sxemasini qayta ko'rib chiqishga majbur bo'ldi. Taktika bobidagi o'zgarishdan so'ng uning shogirdlari birdaniga faollashdilar va jamoa finish marrasigacha turnir jadvalining o'rta qismiga ko'tarildi. Xullas, «Deportivo» elitadan tushib ketish xavfini erta kunda bartaraf etdi.
5. «Malorka»
Mavsum: 2008|2009
Birinchi davradan keyingi natijasi: 19-o'rin, 14 ochko
Yakuniy natijasi: 9-o'rin, 51 ochko (+37 ochko)
«Malorka» mavsum-2008|2009da nafaqat og'ir moliyaviy, balki turnir jadvali nuqtai nazaridan qulash muammosiga ham uchradi. Qisqasi, bir necha oy davomida maosh olmagan futbolchilar muxlislarni yaxshi o'yinlar bilan xursand qilishga shoshilmadilar. Ikkinchi davrada nima bo'lganini aytish qiyin, zero, moliyaviy muammolar hal etilgan emasdi. Fakt shuki, klub faqat ikkinchi bosqich o'yinlarini nazarga olsak, 3-o'rinni qo'lga kiritdi (albatta, «Barselona» va «Real»dan ke-yin). Xullas, oraliq tanaffusdan keyin jamg'arilgan 37 ochko «Malorka»ni 19-o'rindan 10-pog'onaga sakrashini ta'minladi. O'sha aql bovar qilmas qutqaruvni ko'pchilik bosh murabbiy - Gregorio Mansanoga bog'lagandi. Chunonchi, o'ynash ishtiyoqini butkul yo'qotgan jamoani aynan u qayta jonlantirgan edi.
4. «Gamburg»
Mavsum: 2006|2007
Birinchi davradan keyingi natijasi: 17-o'rin, 13 ochko
Yakuniy natijasi: 7-o'rin, 45 ochko (+32 ochko)
«Gamburg»ning o'sha mavsumdagi ishtirokiga «Hayratlanarli»dan boshqa qanday ta'rif berish mumkin? Zero, start arafasida uni bundesliganing asosiy favoritlaridan biri sifatida tilga olishgandi. Harqalay, ko'plab mutaxassislar «Bavariya» emas, aynan «Gamburg»ni muvaffaqiyat qozonishini taxmin qilishgandi. Biroq «dinozavrlar» barchasini chippakka chiqarishdi. Deylik, ChL guruh bosqichida oxirgi pog'onani band etgan klub milliy birinchilikdagi ilk g'alabasini faqat 15-turga kelib nishonladi. Boz ustiga, «Gamburg» 20-turdan so'ng turnir jadvalining oxirgi pog'onasida turardi. Bunday holatda ko'pincha muammoni murabbiyni almashtirish orqali hal etishga urinishadi. Xullas, 2 fevral kuni bosh murabbiy lavozimiga Xub Stevens tayinlandi. Yakunda «Gamburg» nihoyat, asl salohiyatini ko'rsata boshladi va finishga 7-pog'onada etib keldi. Ya'ni evrokuboklarga yo'llanma olishiga bir qadam qoldi, xolos.
Davomi InterFUTBOL gazetasi blogida.
— deya xabar beradi uff.uz nashri.