Vadim Abramov haqida so'nggi vaqtlarda turli gaplar yuribdi. Umuman, bu murabbiy haqida har doim gap-so'zlar etarli bo'lgan. Bunga ko'pincha uning so'zamolligi va dangal gapirish odati sababdir. Ammo so'nggi vaqtlarda Abramov mavzusi biroz keskin ko'rinish oldi. O'FF prezidenti Mirabror Usmonov ham uni tanqid qilib chiqqach, murabbiyning boshi uzra bulut ancha quyuqlashgandek.
Hammasi oliy liga doirasida «Paxtakor» va «Lokomotiv» o'rtasida kechgan uchrashuvdan so'ng boshlandi. Yaxshi bilasiz, bu o'yinda «temiryo'lchilar» 0:2 hisobida mag'lub bo'ldilar va o'yindan so'ng bo'lib o'tgan matbuot anjumanida Vadim Karlenovich O'zbekiston milliy terma jamoasi sha'niga ancha tanqidiy fikr bildirgandi. Murabbiyning nazdida terma jamoa yig'ini tufayli «Lokomotiv» futbolchilari etarlicha tayyorgarlik ko'ra olmagan va aynan shu holat jamoa o'yiniga salbiy ta'sir o'tkazgan. O'z navbatida «Paxtakor» futbolchilari ham terma jamoa yig'inida band bo'lgani haqidagi savolga esa, murabbiy quyidagicha javob berdi: «Bizning futbolchilardan farqli o'laroq «paxtakorchilar» terma tarkibida o'ynadilar. «Lokomotiv» o'yinchilari esa sayyoh sifatida Filippinga borib keldilar. Natijada o'z formalarini ancha yo'qotib qo'ydilar...»
Hozir murabbiyning bu fikri qay darajada to'g'ri yoki noto'g'riligini muhokama qilmoqchi emasmiz. Zero bu haqida ko'p gapirildi. Hatto Vadim Karlenovichning o'zi milliy terma jamoani boshqargan vaqtlar ham yodga olindi. O'shanda «Lokomotiv» murabbiyi uzoq muddatli yig'inlar tashkil etgani va buning uchun hech kim uni ayblamagani haqida aytildi. Albatta bu gaplarda jon bor. O'z vaqtida Abramov ham uzoq muddatli yig'inlar o'tkazgan va futbolchilarni klubidan yiroqda ushlab turgan. Eh-he, uning davrida terma jamoa qaerlarga borib kelmadi - Avstriya deysizmi yoki Marokash, hamma joyni ko'rib keldilar. BAA va Qatar-ku, bir qadam bo'lib qolgan edi. Shunday ekan, Karlenovichning boshiga ham shu holat tushganda, boshqalarni ayblashi to'g'rimi?
Agar shu savolga to'g'ri, deb javob bersak, hayron qolmaysizmi? Zero bunday deyish uchun etarlicha asos topa oldik. Agar Vadim Abramov «Lokomotiv»ning omadsizligida terma jamoani ayblasa, uni bu ishi uchun uni istagancha tanqid qilish mumkin, ammo baribir murabbiy o'z nazdida haq bo'lib qolaveradi. Chunki u klub bosh murabbiyi sifatida qo'l ostidagilarni himoya qilmoqda va bunga to'la haqqi bor. Terma jamoada ishlaganda esa, terma jamoa manfaatlaridan kelib chiqib ish tutar edi. Nima, murabbiy «Paxtakor»dan uchralgan mag'lubiyatdan so'ng futbolchilarini yomonlab, matbuot orqali tanqid qilishini istaganmidingiz? Yoki o'zining uquvsizligidan nolisinmi? Shunday qilgan taqdirda, «Lokomotiv» yaxlit bir kuch sifatida qolishi mumkinmidi? Faqat uquvsiz murabbiygina shunday yo'l tutishi mumkin. Abramov esa bundaylar sirasiga kirmaydi.
Agar u o'sha vaziyatda aybni o'z futbolchilaridan yoki o'zidan emas, chetdan, klubga mutlaqo aloqasi bo'lmagan jihatdan topmaganda, jamoasi sochilib ketgan bo'lar edi. Vadim Karlenovich esa hech qanaqasiga bunga yo'l qo'ya olmas edi. Chunki u shuning uchun ham bosh murabbiy bo'lib turibdi. Bunday vaqtda futbolchilarni ayblash orqali ulardagi ishtiyoqni so'ndirib qo'yish mumkin emas. Yoki bor aybni o'ziga olgan taqdirda ham qo'l ostidagilarning unga bo'lgan ishonchi susayishi va bu holat jamoaga salbiy ta'sir o'tkazishi mumkin bo'lardi. Shu sababli ham murabbiy hammasida terma jamoani aybladi va ustalik bilan tanqid tig'ini klubdan va futbolchilardan burib yubordi. Hozir hamma «Lokomotiv»ning muvaffaqiyatsizligini emas, balki Abramovning o'sha gaplarini muhokama qilmoqda. Bu orada esa klub oliy liga doirasida «Nasaf»ga qarshi kechgan muhim uchrashuvda g'alaba qozonishga muvaffaq bo'ldi. Farqni ko'ryapsizmi?
Ha-ya, aslida o'sha kuni Vadim Abramov aytgan gaplar faqat shu bilan cheklanmagandi. Yodingizda bo'lsa, murabbiy «Paxtakor»ni chempionlik bilan tabriklashga ham ulgurdi. E'tibor bering, bu tabrik musobaqa yakunlanishiga hali 9 tur qolganda aytilmoqda. Oradagi farq esa besh ochkodan iborat. Axir bu farq 9 ta o'yin davomida yo'qqa chiqishi mumkin emasmi? Mumkin albatta, ammo Abramov hozirdanoq raqibga bosim yuklashga urinmoqda. Va shu bilan birga, o'z futbolchilaridan o'sha bosimni olib tashladi. Ya'ni, «Lokomotiv» futbolchilari endi ilgarigidek chempionlik emas, balki vitse-chempionlik uchun kurashadilar. Bu esa ancha engilroq yuk, degani.
Ikkinchidan esa, «Paxtakor» futbolchilari tabrik qabul qilib olgach, istashadimi yoki yo'q, baribir biroz bo'shashib qolishlari turgan gap. Ularning raqiblari esa aksincha, Abramovning istehzosidan so'ng ular ikki barobar kuch bilan o'ynaydilar. Axir bunday gap kimning ham g'ashiga tegmaydi, deysiz. Fikrimizga isbot sifatida «Navbahor» - «Paxtakor» o'yiniga bir qur nazar tashlaylik. Shu kuni ancha kuchsiz hisoblanadigan namanganliklar «bo'lg'usi chempion»ga qarshi bemisl ishtiyoq bilan o'ynadilar. Oqibatda «Paxtakor» Adnan Oraxovatsning 77-daqiqada urgan yagona goli hisobiga bir amallab uch ochkoga ega chiqdi. Endi o'ylab ko'ring, mavsum oxiriga qadar qolgan 8 o'yinning barchasi shunday kechadigan bo'lsa, «Paxtakor»ga oson bo'ladimi? Mabodo qoqilsa-chi? Ha yashang, «Lokomotiv» etib oladi! Abramovning maqsadi ham aslida shu.
 Mabodo chempionlik sovrini baribir «Paxtakor»da ketgan taqdirda ham Vadim Abramovni hech kim ayblay olmaydi. Murabbiy bunday vaziyatda: «ayt­movdimmi?» degan bir og'iz gap bilan qutilib ketishi turgan gap. Shunday ekan, Vadim Abramov to'g'ri ish qilyaptimi yoki noto'g'ri, qat'iy nazar, har doim o'z jamoasi manfaatini ko'zlab ish tutmoqda. Zero uning ishi ham aslida shu - terma jamoada ishlaganda termani himoya qilgan, klubda ishlaganda esa, klubini... Umar BEK Manba: "InterSPORT" gazetasi
— deya xabar beradi uff.uz nashri.