Kievning "Dinamo" klubi sobiq hujumchisi Maksim Shatskix O'zbekiston terma jamoasidagi faoliyatini yakunlashi va Ukraina fuqaroligini olishi haqidagi savollarga javob berib o'tdi.
- Sizda hozir ikki davlat fuqaroligi bormi?
- Yo'q. Ikki davlat fuqaroligiga ega bo'lish Ukrainada ham, O'zbekistonda ham ta'qiqlangan.
- Demak hozirda sizda faqat Ukraina pasporti bor.
- Ha.
- Pasport qachon berilganini ayta olasizmi?
- Yo'q, buning uchun pasportga qarashim kerak. Menimcha buning ahamiyati ham u qadar katta bo'lmasa kerak.
- Balki sananing ahamiyati bo'lmasligi mumkin, ammo O'zbekiston milliy terma jamoasida shuncha yil o'ynaganingiz va u erda eng yaxshi futbolchi sifatida tan olinganingizdan so'ng fuqarolikni o'zgartirganingiz... Nima uchun bunday qildingiz?
- Kievga ilk bora kelganimizdan so'ng oilam bu erda yashab qolishga qaror qilgan edi. Xotinim va farzandlarim Kievni jondan ortiq yaxshi ko'radilar. Ammo men shunda ham O'zbekiston terma jamoasida o'ynashda davom etaverdim. Faqat terma jamoaning asosiy tarkibiga kirish qiyin bo'lishini anglab etganimdan so'ng biror muammo bo'lmasligi uchun fuqaroligimni o'zgartirishga qaror qildim. Terma jamoada shunchaki sayyoh bo'lib yurishni esa istamadim.
Agarda ikki davlat fuqaroligini olish mumkin bo'lganida, bu juda va juda ajoyib ish bo'lar edi. O'zbekiston, Toshkent - bu mening Vatanim. Aynan shu tuproq menga katta hayotga yo'llanma bergan va ayni vaqtdagi darajamga chiqishimda debocha bo'lgan. O'zbekistonda hozir ham ota-onam va bir nechta do'stlarim yashaydilar. Futboldagi do'stlarim esa juda ko'p.
- Ota-onangiz yoniga tez-tez borib turasizmi?
- Ular ko'p kelib turadilar.
- Oxirgi marta O'zbekistonda qachon bo'lgan edingiz? U erda sizni qanday kutib olishadi? Non-tuz bilanmi?
- Yo'q, odatdagidek, xotirjam. Oxirgi marta u erga O'zbekiston terma jamoasidagi hayrlashuv uchrashuvimda ishtirok etish uchun borgan edim. O'shanda uch kishi terma bilan hayrlashganmiz va o'rtoqlik o'yinida maydonga tushganmiz. Bu tahminan 2009, 2010 yoki 2011 yilda bo'lgan. (Maksim Shatskix, Viktor Karpenko va Ulug'bek Baqoevlarning hayrlashuv uchrashuvi Ummonga qarshi 2014 yilning 29 may sanasida bo'lib o'tgan va 0:1 hisobida O'zbekiston terma jamoasi mag'lubiyatga uchragan edi - Uff.uz izohi).
- Shuncha vaqt uyda bo'lmadingmizmi?
- Birinchidan, vaqtim yo'q edi. Chunki men har doim bandman. Ikkinchidan, ota-onam shundoq ham goh menikida, goh esa akamnikida bo'lgach, qaerga ham borardim? Boz ustiga hozir samolyotda to'g'ridan-to'g'ri reyslarni olib tashlashdi va aylanma yo'llar bilan uchib borish kerak. O'zbekistonga borish biroz noqulay bo'lib qoldi. Menimcha baribir shunga qaramay yaqin vaqtlar ichida uyga borib kelsam kerak.
— deya xabar beradi uff.uz nashri.