"Match TV" sharhlovchisi Genaddiy Orlov yarim himoyachi Roman Shirokov haqida fikr bildirarkan, rossiyalik futbolchilarga Evropada qiziqish qolmaganini aytib o'tdi.
"Shirokov erkin agent maqomida yuribdi, ammo u biror joyda o'ynashi oson emas. Chunki uning tabiati ancha murakkab va har bir murabbiy uni taklif etish oldidan buni o'ylab ko'radi. Boz ustiga qaysi klub u talab qilganchalik katta pul berishi mumkin?
"Zenit" haqida gap bo'lishi mumkin emas, Shirokov bu klub uchun ishdan chiqqan qism. TsSKA? Ular Roman talab qilgan pulni berarmikan?
Rossiya terma jamoasi manfaatidan kelib chiqsak, Shirokov tezroq biror klub topishi kerak. Ammo unga kim taklif bilan chiqarkin? Xorij klublarimi? Kim u bilan qiziqadi? Kokorin "Arsenal"ga o'tishi haqida bir oy to'xtamay gapirishdi, ammo londonliklar pinagini ham buzgani yo'q.
Hozir vaziyat shundayki, rossiyalik futbolchilarga Evropadan mutlaqo qiziqish yo'q. Hatto "Latsio" qiziqish bildirayotgan Vitaliy Denisov ham rossiyalik emas, balki O'zbekiston terma jamoasi futbolchisi", - deydi Orlov.
Eslatib o'tamiz, Vitaliy Denisov borasida "Latsio" "Lokomotiv" bilan muzokara boshlagani xabar qilingan edi.
— deya xabar beradi uff.uz nashri.