Shu kungacha «Paxtakor» klubi va O'zbekiston termasi darvozasini qo'riqlab kelgan Aleksandr Lobanovning Osiyoda o'z o'rniga ega «Persepolis» jamoasiga transfer qilinishi darhol futbol ishqibozlari e'tiborini tortdi. Chindan ham, bu kutilmagan xushxabar bo'ldi. Shu bois, Sports.uz sayti ijodkorlari masofa tushunchalari engib o'tib, «Telegram» ijtimoiy tarmog'i orqali bog'lanib, Lobanovning ilk taassurotlari bilan qiziqishdi.
- Salom, Sasha! Bizda bir qator savollar bor. Ularga javob berish uchun vaqt topiladimi?
- Salom! Albatta, topiladi.
- Unda boshladik: xo'sh, Eron varianti qanday yuzaga keldi?
- Umuman kutilmagan tarzda. Ya'ni «Paxtakor» bilan yig'inda ishtirok etayotgan vaqtim birdan shunday de­yishdi: «Eron safariga tayyorlan! Senga qiziqish bildirishmoqda». Buni aslo kutmagandim. Qiziqish Eronning eng kuchli klubidan bo'lgani uchun ortiqcha o'ylanmadim. Jamoa qarorgohiga etib borib, darhol klub prezidenti bilan uchrashdim. Muloqot samimiy o'tdi, biz turli mavzular bo'yicha fikr almashdik. Ertasiga tibbiy ko'rik boshlandi. Shukrki, u o'zim kutgandek, ijobiy natija berdi.
Shu tariqa 1,5 yilga mo'ljallangan shartnoma ostiga imzo chekdik. Aytgancha, bu - to'laqonli transfer shartnomasi, ijara emas. Muhimi, forslar kaminani samimiy qarshi olishdi. Mening jamoa safiga qo'shilishim haqida hattoki, muxlislar ham bir kun avval bilishgan ekan! Tabiiyki, bunday iliq munosabat o'zimga juda ma'qul keldi. Eronda «Persepolis»­ni juda yaxshi ko'rishadi. Chunki u xalq jamoasi sanaladi. Shu tomondan klubning «Paxtakor» bilan o'xshashlik joyi bor. Xullas, qisqa vaqt ichida meni jamoaga tanishtirishdi. Murabbiylar shtabi butunlay xorijlik mutaxassislardan iborat. Tanishtirish marosimida o'z oldiga doimo katta maqsadlarni qo'yadigan klubda faoliyat yuritishimni alohida ta'kidlab o'tishdi. Keyin «Persepolis»dagi ilk mashg'ulotda qatnashdim. Jamoadagi birdamlik darhol ko'zga tashlandi: hamma bir-biriga yordam berayotgan, qo'llab-quvvatlayotgan... Bu ham o'zimizning «Paxtakor»dagidek!
- Boshlanishi chakki emas. Ke­yinchi? Joylashish masalasi nima bo'ldi?
- Hozircha jamoa bilan mehmonxonada istiqomat qilyapmiz. Tez orada menga alohida uy va avtomobil ajratishni rejalashtirib qo'yishgan. Shundan keyin rafiqam va o'g'ilcham ham yonimga etib kelishadi. Shart­nomada ko'rsatilgan bandlardan biri shu. Bizga - futbolchilarga yaratilgan sharoitlar juda ajoyib. Har holda, «Persepolis» - Osiyodagi eng nomdor klublardan biri-da! Albatta, tilga bog'liq muammolar yuzaga kelishini kutgandim. Ammo boya aytganimdek, murabbiylar shtabi xorijliklardan tashkil topgani uchun jamoa­da asosan ingliz tilidan foydalanilmoqda. Yaxshiyamki, inglizchani binoyidek tushunaman. Forscha savollarga esa menga biriktirilgan mahalliy haydovchi yordamida javob qaytaryapman. Xullas, shunaqa gaplar...
Davomi InterFUTBOL gazetasi blogida.
— deya xabar beradi uff.uz nashri.