Jamoalarimizga hozir aynan shu xususiyat etishmayapti...Muhtaram muxlis, jahon maydonlaridagi eng so'nggi muhim voqealar ko'zgusida yana mamlakatimiz futboliga, undagi taraqqiyot va depsinishga nazar tashlaymiz. Bir vaqtlar Pele, Garrincha, Bobbi Charlton, Frants Bekkenbauer, Yoxan Kroyff kabi buyuk iqtidor sohiblari jahon futbolining o'zgacha fe'l-atvorini belgilab berishgandi. Ayni chog'da Birodar Abduraimov, Gennadiy Krasnitskiy, Hamid Rahmatullaev, Vladimir Fyodorov, Mixail An kabi iste'dodli vakillarimiz o'sha buyuklarga havas qilish barobarida ulardan ortda qolmaslikka intilishgandi.
Faqat sho''ro tuzumi asoratlari sabab, ularning bor imkoniyatlari to'laqonli yuzaga chiqmadi. Jahon futbolidagi o'zgacha fe'l-atvor esa hamon yuksaklikka bo'y rostlamoqda. Lionel Messi, Krishtianu Ronaldu, Zlatan Ibragimovich, Neymar, Pol Pogba timsolida bu o'zgachalik muxlislarga olam-olam quvonch ulashmoqda. Umaman olganda, jahon futbolining o'zgacha fe'l-atvori hamisha o'zining tabiati, an'analariga sodiq, ya'ni unda depsinish kuzatilmaydi. Demoqchimizki, futbolning tarixiga aylangan har bir davr o'zining daholari  bilan muxlislar qalbida yashayveradi. Bu tabiiy-ijtimoiy ritm o'zgarmas va o'z yo'lida sobitdir. Muxlislarning baxtiga shu jarayon mudom yangilanishga ehtiyoj sezaveradi va ulug' qonuniyat asosida taraqqiyot sari odimlayveradi.
Xo'sh, ayni shu nuqtai nazardan qarasak, mamlakatimiz futboli o'zining tarixiy an'analariga sodiqmi? Kimdir o'smirlar va yoshlar terma jamoalarining Osiyo va jahon chempionatlaridagi ishtiroklarini nazarda tutib, balki bu savolning noo'rin, ortiqcha, deb hisoblar. Biz ham futbolimiz taraqqiyotidagi bir hovuch yorug' shu'lani hech qachon inkor qilmaymiz, Aksincha, uni faxr bilan e'tirof etamiz. Ammo unutmaylikki, natijaning o'zi har doim ham muxlisni qoniqtiravermaydi. U o'zi tarafkashlik qiladigan jamoada, futbolchida o'zgacha fe'l-atvor bo'lishini istaydi. Masalan, futbolning chinakam muxlisi - taniqli shoir, rahmatli Yoqubjon aka Ahmadjonovga Mario Balotelli faoliyati o'zgacha zavq bag'ishlardi. U kishi bilan qachon, qanday vaziyatda uchrashmaylik, albatta, Mario mavzusi tilga olinardi.
Nega? Negaki, Balotellining o'yin uslubida, iste'dodining tabiatida o'zgachalik mujassam. Uning fe'l-atvoridagi kamchiliklar esa o'zgachalik sifatiga noloyiq. Muxlis uchun namoyish etilayotgan futbolning o'zgacha fe'l-atvori muhimdir. Shuning uchun muxlis bugun Qatardan quruq qo'l bilan qaytgan olimpiyachilarimiz, ularning ustozlari ishidan norozi. Inchunin, u hozircha Chempionlar Ligasi sarhadlaridan uzoqda o'ralashib yurgan «Liverpul»ga, klubning hayajonu ehtiroslar quvlab yuradigan murabbiyi Yurgen Kloppga tarafkashlik qilaveradi. O'z o'rnida, autsayderlar safiga qo'shilmaslik uchun tirishayotgan «Norvich»ning matonatidan minnatdor bo'laveradi.
Ha, «Norvich»-«Liverpul» uchrashuvi yana bir bor isbotladiki, o'zgachalikning oxirgi chegarasi yo'q. Tom ma'nodagi izlanish - uning yangi marrasi. Zabt etilmagan yangi marrani ko'rolmagan jamoa, murabbiy yoki futbolchi mavhumlikka mahkum. Faqat, keling, «Norvich»ni o'sha mag'lublikka mahkumlar safiga qo'shmaylik. Safarda «Stok Siti» va «Bornmut»dan engilgan bu jamoa o'z maydonida «Liverpul»ning alamzada nigohlariga tik boqdi. Kuch va imkoniyatlar teng bo'lmagan vaziyatda «Norvich» kuchli raqibning dastlabki goliga 3 marta javob qaytardi. Jamoaning shiddati hattoki, Yurgen Kloppni hayratlantirdi, tahlikaga soldi. Shu bois, u qo'shimcha 5 daqiqa uchun hakamga norozilik bildirdi. Mersisaydliklar ustozi uchun aslida bunday harakat yarashmaydi.
Lekin nemis mutaxassisi vaziyatni chuqur his qiladigan murabbiy. O'zi, jamoasi mahorat bobida raqibidan ustun bo'la turib, xavotirga tushdimi, demak, vaziyat haqiqatan ham, tahlikali. Uchrashuvning 90Q3-daqiqasi Yurgen Klopp haq ekanligini tasdiqladi. «Norvich» hisobni tenglashtirdi va nemis mutaxassisi boshidan go'yoki, sovuq suv quyib yubordi. Malakali, ehtirosli murabbiy o'rindiqqa mixlandi. U o'sha lahzada g'alabadan umidini uzdi. O'yladiki, jamoasi so'ng­gi kuchini ham sarflab bo'ldi. Futbol o'zgacha fe'l-atvor bilan  uni sinovdan o'tkazayotganini o'sha dramatik lahzalarda sezmadi. Qarangki, shunday ajoyib, izlanuvchan, oxirigacha kurashadigan mutaxassis ham durang qarshisida qo'l ko'tardi. Hol-buki, futbolda o'zgacha fe'l-atvor mavjud va u bu g'alati mavjudlikni Yurgen Klopp kabi isde'dodli murabbiylarga vaqti-vaqti bilan eslatib turadi. Boshqacha aytganda, eslatadi va shu o'zgachaligi bilan esankiratadi. Yo'q, bu esankirash olimpiyachilarimizning mag'lubiyat qarshisidagi dovdirashlariga o'xshamaydi.
Bu esankirash o'zgachalikka, go'zallikka, favquloddalikka tantanavor taslim bo'lishdir. So'nggi lahzalarda Adam Lallana ustozi ishonchini oqladi. U otib yuborgan futbolka timsolida «Liverul»ning alamlar libosi echildi, go'yo. Bu bahsda 9ta gol urildi va ular 10:2, 8:0, 6:1, 5:2 hisoblarini shakllantirgan to'plardan qadrliroqdir. Negaki, 4:5 hisobida o'zgachalik ruhi ustuvor. Bu hisob ko'r-ko'rona ochiq futbol yoki himoyadagi jo'n xatolar natijasi emas. Bu hisob yorqin hujum, shiddat va shijoat timsolidir. Ta'bir joiz bo'lsa, «Norvich» klubi «Bornmut», «Liverpul» esa «MYu» darvozasiga urmagan gollari hissasini ham shu uchrashuvda chiqardi.
Davomi InterFUTBOL gazetasi blogida.
— deya xabar beradi uff.uz nashri.