Shu kunlarda oliy liganing moliyaviy jihatdan baquvvatroq klublari xorijda o'quv-mashg'ulot yig'inini o'tkazayotgan bo'lsalar, boshqa jamoalar mavsumga Toshkentda taraddud ko'rishmoqda. Ular orasida «Obod» ham bor. O'tgan yili quyi divizionda qatnashib, elita yo'llanmasiga ega bo'lgan poytaxtliklar mashg'ulotlarga zo'r berishgan.
Tarkibga yangi futbolchilar jalb etilyapti, ko'rikdan o'tayotganlar orasida oliy liga havosini olgan o'yinchilar ham bor. Bir muddat avval «Obod»ning oliy liga talablariga javob bermasligi, shu bois uning o'rniga elitada «Dinamo»ning qatnashishi mumkinligi haqida xabarlar tarqalgandi. Xu-susan, PFL mutasaddilari yangi mav-sumga qur'a tashlash marosimida mazkur masalaga to'xtalishgandi. Lekin «Obod» klubi direktori Farhod Safarov o'z intervyusida jamoa joriy yilgi chempionatni oliy divizionda o'tkazishini tasdiqladi. Hattoki, PFLga birinchilardan bo'lib yillik ishtirok uchun badal pullari ham to'langan. Uy uchrashuvlarini o'tkazish uchun «Jar» stadioni ijaraga olingan. Xullas, «Obod» yangi mavsumda kuchlilar safida o'z debyutini nishonlaydi.
- Farhod aka, suhbatimiz avvalida jamoaning yangi mavsumga tayyorgarligi to'g'risida ma'lumot bersangiz. Ishlar reja asosida ketyaptimi?
- Taraddudni 20 dekabrdan boshlaganmiz. Birinchi yig'inimiz Yangi yil bayramiga qadar davom etdi. 5 yanvardan hisob bo'yicha ikkinchi yig'inga kirishdik. Mashg'ulotlar reja asosida kechmoqda, bir nechta o'rtoqlik uchrashuvlari o'tkazdik. Oliy liga ishtirokchilari - «Mash'al» va «Neftchi»ga qarshi bahslarda yigitlar yomon ko'rinishmadi. Murabbiylar bu o'yinlar orqali ko'rikdan o'tayotgan yangi futbolchilarni sinash-yapti. Yoshlar esa katta o'yin amaliyotiga ega bo'lib borishyapti.
- Tarkibda o'zgarishlar bormi?
- Asosiy e'tibor oliy ligaga mos jamoa shakllantirishga qaratilyapti. Birinchi divizionda o'ynaganlarning aksariyati, ya'ni o'tgan yilgi tarkibning 60 foizi klubni tark etishdi. Ularning o'rnini tajribali, mahoratli futbolchilar evaziga to'ldirish harakatidamiz. Deyarli har kuni safimizga yangi o'yinchilar kelib qo'shilishmoqda. Selektsiya ishlari bir zum ham to'xtamayapti.
- O'tgan mavsum yakunlari haqida qanday fikrdasiz?
- Eng avvalo, klub rahbariyati tomonidan oliy ligaga chiqish vazifasi qo'yilgandi. Yakunda vazifa bajarildi, maqsadimizga erishdik. Lekin buni osonlikcha uddaladik, deyolmayman. Elita yo'llanmasi uchun kurash so'nggi turgacha davom etdi. Shundan kelib chiqib aytish mumkinki, 1-ligada jonlanish ko'zga tashlanyapti, raqobat ham shunga yarasha keskinlik kasb etmoqda. Adashmasam, oliy ligaga chiqadigan jamoaning so'nggi turda aniqlanishi avval kuzatilmagan, chempionat tugashiga bir nechta tur qolganida omadlilar kimligini barcha bilib olardi. Qolaversa, to'g'ridan-to'g'ri beriladigan yo'llanmalar soni bitta bo'lganligi ham bahslarning shiddatli kurashlar ostida o'tishini ta'minladi. E'tiborlisi, mavsum yakunlanishiga olti tur qolgan bir pallada asosiy raqibimiz - «Oq-tepa» bizdan 6 ochkoga ilgarilab ketgandi. Ko'pchilik aynan shu jamoaning oliy ligaga chiqishiga ishonayotgandi ham, ularni muddatidan avval tabriklaganlar ham uchradi. Lekin futbolchilarimiz kurash oxirigacha davom etishini isbotlashdi, taslim bo'lishmadi.
- Lekin «Oq-tepa»ga har ikki o'yinda ham mag'lub bo'ldinglar. Shunga qaramay, yakunda asosiy raqib ortda qoldirildi. Buni qanday uddaladinglar?
- Albatta, «Oq-tepa» - kuchli, elitada ishtirok etishga munosib klub. Bundan avvalgi mavsumda ham oliy liga yo'llanmalari uchun aynan shu jamoa bilan kurashgandik. Garchi har ikki o'yinda asosiy raqibimizga imkoniyatni boy bergan bo'lsakda, taslim bo'lmadik. Futbol shunisi bilan ham qiziq. «Oq-tepa» qolgan bahslarda mag'lubiyatga uchradi yoki durang o'ynab, ko'p ochko yo'qotdi. Biz ham agar bitta o'yinda qoqilganimizda, hozir siz bilan bu mavzuda suhbatlashmayotgan bo'larmidik. So'nggi turda qozonilgan g'alaba bizni kuchlilar safiga olib chiqdi.
- Birinchi liganing saviyasini qanday baholaysiz?
- Ikki yil quyi divizionda o'ynadik. Shu muddatni inobatga olsak, liga saviyasi sezilarli tarzda oshgan. Ayniqsa, 2015 yilgi mavsumda bu yaqqol ko'zga tashlandi. To'g'ri, hali echimini kutib turgan muammolar ko'p. Ayrim jamoalar safar o'yinlariga borish uchun mablag' topa olishmayapti. Maydonlarning holati ham yaxshi emas. Lekin sekin-asta ijobiy o'zgarishlar ro'y bermoqda.
- Elita mutlaqo boshqa dunyo, talablari umuman boshqacha. Xo'sh, «Obod» shunday ligada ishtirok etishga tayyormi? Sinovlarga dosh bera olasizlarmi?
- Bundan xabarimiz bor. Barcha talablarga javob berish uchun zarur chora-tadbirlarni qo'llayapmiz, klub tuzilmasida ulkan hajmdagi islohotlar amalga oshirilyapti. Kerakli kadrlar bilan shartnoma imzolanmoqda, oliy liga havosini olgan tajribali futbolchilarni safimizga qo'shishga intilyapmiz. Nasib qilsa, elitada ham yo'qolib qolmaymiz. Autsayderlar qatorida bo'lmaslikka astoydil harakat qilamiz. Darvoqe, birinchilar qatorida oliy ligada ishtirok etish uchun badal pulini to'laganimizni ham mamnuniyat bilan ta'kidlashim mumkinki.
- Masalan, hozirgacha qaysi futbolchilar jalb etildi?
- Doniyor Hasanov, Sanjar To'raqulov, Sherzod Jalilov kabilardan murabbiylarning umidi katta. Bilasizmi, tarkibdagi aksariyat futbolchilar jamoa bilan katta yo'lni bosib o'tishdi. Ikkinchi ligada ishtirokimizni boshlagan paytda safimizni to'ldirgan o'yinchilar elitada qatnashishni maqsad qilishgandi. Mana, dastlab 1-liga, endi esa oliy liga yo'llanmasi qo'lga kiritildi. Buning bariga futbolchilar o'z mehnatlari bilan erishishdi. Quvonarlisi, bu yoshlarning milliy termamizda ham o'ynash niyatlari bor.
- «Obod» yangi mavsumda uy uchrashuvlarini qaysi stadionda o'tkazadi? O'rinbosarlar jamoasi-chi?
- Bu masala ijobiy hal etildi: ko'rkam, ixcham, sifatli maydonga ega «Jar» stadionini ijaraga oldik. Bu erda muxlislar uchun barcha qulayliklar yaratilgan. Ushbu arenada «Bunyodkor»ning OChLdagi o'yinlari, milliy termamiz ishtirokidagi uchrashuvlar ham bo'lib o'tgan. Xullas, bu biz uchun eng maqbul variant edi. «Jar»ning bizga omad keltirishiga umid qilamiz. O'rinbosarlarimiz esa o'zimizning stadionda o'ynashadi. Bu erda hozir ta'mirlash ishlari olib borilyapti, mavsum boshlanguniga qadar talab darajasiga keltiramiz.
- Murabbiylar shtabi tasdiqlandimi?
- Ha, yosh, iste'dodli mutaxassislardan biri Shavkat Abduxo'jaev jamoa bosh murabbiyi bo'ladi. Unga Xayrulla Abdiev, Bobur Zuhriddinov hamda Ja'far Irismetovlar yordam berishadi. Fursatdan foydalanib, taklifimizga rad javobini bermagan bu murabbiylarga klub rahbariyati nomidan minnatdorchiligimni bildiraman. Ular bizdan hech narsa talab qilishmadi, birgalikda oldimizga qo'yilgan vazifani bajarishga intilamiz, deb ishga kirishishdi. Bunday fidoyilikni hammada ham uchratavermaysiz.
- Odatda elita debyutantlari o'z oldilariga kuchlilar safidagi joyni saqlab qolish vazifasini qo'yishadi. «Obod»da ham holat shundaymi?
- Oldimizdagi to'siqlardan bos-qichma-bosqich o'tib kelyapmiz. Maqsad-vazifalarimiz yildan-yilga kattalashib bormoqda. Yashirmayman, birinchi galda oliy ligadagi o'rnimizni saqlab qolishga urinamiz. Chunki elitada raqobat juda kuchli. Raqiblar biz uchun avvalgidek engil bo'lmaydi, o'z maydonimizda o'tadigan bahslarda ham ochko olish oson kechmaydi. Shunga qaramay, kamsonli muxlislarimizni xushnud etishga intilamiz. Chiroyli, mazmunli o'yinlarimiz orqali tomoshabinlar sonini oshirishni maqsad qilganmiz.
- Yoshlar ligasida qatnashish masalasi ko'rib chiqildimi?
- Albatta, ushbu musobaqada ishtirok etadigan jamoamiz ham shakllantirilmoqda. Unga murabbiylik qiladigan Xayrulla Abdiev yoshlar bilan alohida mashg'ulot olib bor-yapti. Yig'inlarda «Bunyodkor» va oliy liganing boshqa klublari tarbiyalanuvchilari ko'rikdan o'tkazilmoqda.
Davomi InterFUTBOL gazetasi blogida.
— deya xabar beradi uff.uz nashri.