"Barselona" jamoasi Madridning "Atletiko" klubi bilan Ispaniya chempionati 22-turida bahs olib bordi. "Kamp Nou" stadionida o'tkazilgan ushbu o'yinda kataloniyaliklar 2:1 hisobida zafar quchdi. Birinchi bo'limning 10 daqiqasida Koke hisobni ochgan bo'lsa, 30 daqiqada Lionel Messi muvozanatni tikladi. Ko'p o'tmay, Luis Suares jamoasini oldinga olib chiqdi. Uning goli 38 daqiqada qayd etildi. Bo'lim yakunida esa Filipe Luis ochiqchasiga Messi oyog'iga zarba bergani uchun to'g'ridan-to'g'ri qizil kartochka oldi. Ikkinchi bo'lim kataloniyaliklarning to'liq ustunligida o'tdi. Ketma-ket hujumlar va to'p nazorati "Atletiko" futbolchilarini asabiylashishga majbur qildi va Diego Godin 65 daqiqada ikkinchi marotaba sariq kartochka ishlab oldi va maydondan chetlatildi. E'tiborlisi, uchrashuv taqdiri chetlatishlardan avval ham bo'lib ulgurgandi. Mazkur g'alabadan so'ng "Barselona" ochkolar sonini 51 taga etkazib, peshqadamlikni mustahkamlab oldi. Kataloniyaliklarda bitta zahira o'yini ham bor. "Atletiko" 48 ochko bilan ikkinchi o'rinda qoldi. Ispaniya chempionati, 22-tur
"Barselona" - "Atletiko" - 2:1
Gollar: Messi (30), Suares (38) - Koke (10)
"Barselona" – Bravo, Pike, Alba, Dani Alves (Serji, 82), Buskets, Rakitich (Turon, 67), Maskerano, Inesta, Neymar, Messi, Suares.
"Atletiko" – Oblak, Ximenes, Filipe Luis, Xuanfran, Godin, Gabi (Xesus Games, 46), Koke, Ferreyra Karrasko, Fernandes (Tomas, 76), Grizmann (Savich, 67), Saul.
Ogohlantirishlar: Godin (24), Gabi (25), Xuanfran (42)
Chetlatishlar: Filipe Luis (44), Godin (65)
— deya xabar beradi uff.uz nashri.