Seshanba kuni «Paxtakor» markaziy stadioni anjumanlar zalida birinchi liganing yangi mavsumiga qur'a tashlash marosimi bo'lib o'tdi. Aslida, ushbu marosim odatdagidek, O'FF anjumanlar zalida o'tishi kerak edi. Lekin texnik sabablarga ko'ra, tadbir qo'shni binoga ko'chirildi. Marosim avvalida PFL bosh direktori Farhod Magometov o'tgan mavsum yakunlari, yangi yil rejalari xususida axborot berarkan,  1-ligada faqat bitta o'zgarish bo'lishini aytdi. Ya'ni, qarovsiz qolgan divizionda 18ta jamoa ikki davrali tizimda bahslarga kirishadi. Mazkur musobaqa o'tgan yildagidek kabi ikki mintaqa va bosqichda tashkil etilmaydi. Ligada yangi mavsum 3 aprel kuni start oladi.
F.Magometov: - Sizlar bilan yangi - 2016 yilda ilk bor ko'rishib turibmiz. Bugun O'zbekiston kubogi va 1-liganing yangi mavsumiga qur'a tashlash marosimini o'tkazamiz. Lekin undan oldin bir-ikki og'iz quyi divizionning  bugungi saviyasi haqida gapirmoqchiman. Dastavval menga aytinglar, o'zi 1-ligada nima uchun ishtirok etyapsizlar? Maqsadinglar bormi? Reglamentni o'qiysizlarmi, uning bandlari, shart va majburiyatlari bilan tanishmisizlar? Qaysi jamoa oliy liga va terma jamoalarimizga iste'dodli futbolchilarni etkazib berdi? Shunchaki, hokimlik tomonidan ajratilgan pullarni ko'kka sovurib yuribsizlar. Bundan boshqa hech narsa ko'rmayapman. Hokimlik va homiylarga qaram bo'lib qolgansizlar.
Klub rahbarlari, o'zlaring ham mablag' topishga harakat qilinglar. Hech bo'lmasa, muxlislar uchun chiroyli futbol namoyish etinglar. Shuni ham eplay olmayapsiz. Faqat sariq va qizil kartochkalar, hakamlarni haqorat qilish bo'yicha peshqadamsizlar. Har doim hakamlar aybdor. Futbolchilarga to'p tepishni o'rgatishdan avval ta'lim-tarbiya, maydonda o'zini tutishni o'rgatsang-lar yaxshi bo'lardi. Birinchi navbatda, klub rahbarlari va murabbiylar, o'zingiz o'rnak bo'ling. Bu narsa oliy liga jamoalariga ham taalluqli. Futbol tilda emas, oyoq va boshda o'ynaladi. Shunday payt bo'ldiki, 1-liga klublariga yordam bo'lsin deb, o'zimiz pul ajratdik. Har bir jamoaga 10 mln. so'mdan yordam puli berildi. Lekin buning umuman foydasi bo'lgani yo'q.
Ijobiy tomonga hech qanday o'zgarish ko'rmadim. Deyarli barcha jamoalarning futbolchilar, murabbiylar va ishchilardan qarzi bor. 10 fevral so'nggi muhlat. Agar shu sanagacha qarzdorlik yopilmasa, o'sha klub ligadan chetlatiladi. Mana, «Paxtakor» jamoasiga muxlat va talab qo'ygandik, ertasi kuniyoq futbolchilari bilan hisob-kitob ishlarini to'liq amalga oshirishdi. Shunday qilmasak, futbolimizda o'zgarish ro'y bermaydi. Bu mavsumda o'tgan yil bilan taqqoslaganda, bitta o'zgarish bo'ladi. Ya'ni, jamoalar soni qisqartirildi. Endi 1-ligada 18ta jamoa ishtirok etadi. Xuddi oliy ligada bo'lgani kabi 1-ligada ham klassik tizim, ikki davrali chempionat o'tkaziladi. Asosiy e'tiborni songa emas, sifatga qaratamiz. Aks holda, yildan-yilga sifat tushib ketyapti. 2017 yili 1-liga jamoalari soni xuddi oliy ligada bo'lgani kabi 16taga tushiriladi. Bundan tashqari, murabbiylarga bo'lgan talabni ham oshiramiz.
2017 yilgi futbol mavsumidan 1-ligada kamida «A» litsenziyasiga ega murabbiy ishlashi mumkin. «V» yoki boshqa litsenziyasi bor murabbiylar ishlashiga ruxsat berilmaydi. Yana bir masala, klub tuzilmasida soha mutaxassislari ishlamayapti. Qarindosh-urug'chilik, tanish-bilishchilik kabi illatlar saqlanib qolyapti. Bu narsalarga chek qo'yamiz. Afsuski, 1-ligada Sirdaryo, Navoiy, Surxondaryo va Toshkent viloyatidan jamoa yo'q. Bu achinarli holat. Shaxsan men Surxondaryo viloyati futbol federatsiyasiga viloyatda raqobatbardosh jamoa tashkil etilsa, o'sha klubni hech qanday pulka, ya'ni o'tish o'yinlarisiz 1-ligadagi ishtirokini ta'minlayman, deb va'da ham berdim. Lekin ulardan hech qanday sado chiqmadi.
Yana bir masalani aytishim kerak, yillik rejalaringizni imkon qadar tezroq bizga taqdim etishingiz shart. Texnik guruh ularni ko'rib chiqib, tasdiqlab beradi. Bu sizlarga yordam tariqasida qilinayotgan ijobiy ishlar bo'ladi. To'g'ri tushuninglar, sizlardan xato yoki kamchilik izlash emas, shunchaki ko'maklashish, ishingizni engillashtirishni maqsad qilganmiz. So'nggi paytlarda hakam ustidan shikoyat yozayotgan klub vakillari turli gap-so'zlarni tarqatishyapti. Matbuotda e'lon qilishyapti. Ularning fikricha, shikoyat xati yozishdan PFL pul ishlab olar ekan. Butun dunyoda bu qoida bor. Agar shikoyatingiz o'rinli bo'lsa, pulingizni qaytarib beramiz. Bu mavzuda gap-so'z bo'lishining o'zi uyat.
Shundan so'ng, savol-javoblarga o'tildi. Jurnalistlar o'zlarini qiziqtirgan savollarga javob olishdi.
Davomi InterFUTBOL gazetasi blogida.
— deya xabar beradi uff.uz nashri.