Futzal bo'yicha havaskorlar o'rtasida o'tkazilgan Toshkent shahar birinchiligida bu yil shifokorlar jamoasi g'oliblikni qo'lga kiritdi. Akademik V.Vohidov nomidagi Respublika ixtisoslashtirilgan jarrohlik markazi shifokorlaridan iborat jamoa bunga qadar uch marta «Nobel Cup» sovrinini ham qo'lga kiritgan edi. E'tiborli jihati, shifokorlardan iborat futbol bo'yicha O'zbekiston terma jamoasi ayni vaqtda shifokorlar o'rtasidagi jahon chempionatiga tayyorgarlik olib bormoqdalar. Mundial yozda, Kataloniyaning Barselona shahrida bo'lib o'tishi ko'zda tutilgan. Ayni vaqtda hujjatlar bo'yicha rasmiyatchiliklar o'talmoqda.
Terma jamoa hujumchisi va ayni vaqtda Respublika ixtisoslashtirilgan jarrohlik markazi shifokori Temur Kabulovning ta'kidlashicha, ushbu musobaqaga tayyorgarlik jiddiy olib borilmoqda. Shifokor-futbolchilar haftasiga ikki martadan mashg'ulot o'tamoqdalar. Umuman olganda, xalqaro musobaqalar hamyurtlarimiz uchun yangilik emas. Ular  yilda Rossiyada o'tkazilgan xalqaro musobaqada Rossiya, Belarus va Ukraina terma jamoalarini mag'lubiyatga uchratib, g'oliblikni qo'lga kiritgan edilar. 2015 yilda xuddi shunday musobaqa Toshkentda tashkil etilgan va unda O'zbekiston, Chexiya, Rossiya va Buxoro viloyati shifokorlaridan iborat jamoa ishtirok etgan edi. Ushbu musobaqa ham O'zbekiston shifokorlar terma jamoasi g'alabasi bilan yakuniga etgan.
Qiziq jihat, o'sha musobaqada hamyurtlarimiz tomonidan 4:1 hisobida mag'lubiyatga uchratilgan Chexiya shifokorlar terma jamoasi oradan bir yil o'tgach, AQShda tashkil etilgan jahon chempionatida barcha raqiblaridan ustun kelib, g'oliblikni qo'lga kiritgan edi. Xuddi shunday musobaqa yozda Ispaniyada tashkil etilishi ko'zda tutilgan va O'zbekiston shifokorlar terma jamoasi bu safargi mundialda ishtirok etishga hozirlanmoqda.
Temur KABULOV. HUJUMChI
AKADEMIK V. VOHIDOV NOMIDAGI RESPUBLIKA IXTISOSLAShGAN JARROHLIK MARKAZI XIRURGI -    Jahon chempionatiga taklif V. Vohidov nomidagi Respublika ixtisoslashtirilgan xirurgiya markazi direktori Nazirov Feruz G'ofurovich nomiga kelgan edi. Klinikamiz rahbariyati sportga juda qiziqadi. Masalan, bosh shifokor Xoshimov Shuxrat Xurshidovich ham futbol jamoamiz a'zosi. Ular darhol bu taklifni qo'lladilar va Sog'likni saqlash vazirligi ko'magida jahon chempionatiga tayyorgarlikni boshlab yubordik. Ayni vaqtda hujjatlar bilan bog'liq rasmiyatchiliklar o'talmoqda. Jamoamiz haftasiga ikki marta mashg'ulot olib boryapti.
-    Jahon chempionatida jamoa oldiga biror vazifa qo'yilganmi?
-    Albatta. Biz kamida kuchli uchlikka kirishimiz shart. Bu – minimal vazifa. Eng asosiy maqsad esa albatta jahon chempioni bo'lish. Abdulaziz YO'LDOShEV, DARVOZABON
RESPUBLIKA ShOShILINCh TIBBIY YoRDAM ILMIY MARKAZI, SAMARQAND FILIALI. TRAVMOTOLOG Abdulaziz Yo'ldoshev futbolga shu qadar qiziqadiki, har hafta mashg'ulotga etib kelish uchun Samarqanddan Toshkentga qadar 300 kilometr yo'l bosish – unga cho't emas. Bunday fidoyilik bilan hatto professional futbolchi ham maqtana olmagan bo'lardi.
-    Jahon chempionatida imkon qadar muvaffaqiyatli ishtirok etishni maqsad qilganmiz. Jamoamiz oldiga aniq vazifa qo'yilgan, medalli o'rinlar uchun kurashamiz. Buning uchun mashg'ulotlar olib borilmoqda. Shaxsan o'zim Samarqanddan har hafta oxirida  300 kilometr yo'l bosib kelmoqdaman.
Aziz RAHMATOV. HIMOYaChI
NOGIRONLARNI REABILITATsIYa QILISh VA PROTEZLASh MILLIY MARKAZI. TRAVMOTOLOG-ORTOPED -    Havaskorlar o'rtasidagi Toshkent shahri birinchiligida «Eng yaxshi himoyachi» sovriniga munosib ko'rildim. Bu e'tirofdan xursandman. Nasib qilsa yozda bo'ladigan jahon chempionatida bu nomni yana bir bor oqlashga intilaman. Jamoamiz mashg'ulotlarini professional murabbiylar olib bormoqda. Nasib qilsa Ispaniyadan yaxshi natija bilan qaytamiz.

— deya xabar beradi uff.uz nashri.