Birlashgan Arab amirliklaridagi yig'in doirasida ikkinchi bahsni Xitoy superligasi vakili “Xenan Tszyane” jamoasi bilan o'tkazgan futbolchilarimiz jangovar duranga imzo chekishdi.

Dubaydagi “Jebel Ali” mehmonxonasiga qarashli futbol maydonida o'tkazilgan bahsning birinchi bo'limida hisob ochilmadi. Ikkinchi bo'limning 64-daqiqasiga kelib vakillarimiz hisobni ochishdi. Jamoamiz tarkibida ko'rikdan o'tayotgan chernogoriyalik himoyachi Deyan Bolevich o'ng qanotdan Shuhrat Muhammadiev uzati bergan to'pni chap oyoqda kuchli zarbasi bilan darvozaning uzoq pastki burchagiga aniq yo'lladi – 1:0. Oradan ikki daqiqa o'tib o'yinda hisob tenglashdi. Xitoylik futbolchilar o'ng qanotdan tashkil etgan hujumni samarali yakunlashdi. O'yin oxiriga qadar vakillarimiz bir necha bor raqib darvozasi oldida xavfli hujumlarni tashkil etishdi. Ammo hal qiluvchi zarbalar mo'ljalga aniq etib bormadi. Ushbu uchrashuvni jamoamiz quyidagi tarkibda o'tkazdi: Sanjar Quvvatov, Shuhrat Muhammadiev, Maqsud Karimov, Sherzod A'zamov, Deyan Bolevich (Sharof Muhiddinov, 80), Erkin Boydullaev (s), Dilshod Rahmatullaev, Aziz G'aniev (Islom Rashidxonov, 80), Bahrom Abdurahimov, Ilhom Shomurodov, Bobur Abduholiqov (Doniyor Narzullaev, 70).

“Nasaf” futbolchilari yig'in doirasida uchinchi nazorat bahsini 5 fevral sanasida Rossiyaning “Krilya Sovetov” jamoasiga qarshi o'tkazadi.
— deya xabar beradi uff.uz nashri.