Qisqa tanaffusdan so'ng UFF.uz sayti Siz aziz mushtariylar e'tiboriga “Hafta hayratlari!” ruknini yana havola etadi. So'nggi kunlarda bir-biridan qiziqarli uchrashuvlar, e'tiborga loyiq voqealar guvohiga aylandik. Ana shu hodisalarni jahon karikatura namoyondalarining ijodi mahsuli orqali ta'riflab berishga harakat qilamiz. Qani boshladik! “Barselona” 9 kishiga qarshi Ispaniya chempionati 22-turida “Barselona” jamoasi o'z maydonida “Atletiko” futbolchilarini qabul qildi. O'yin kutilganidek shiddatli bo'lmadi. Bunga “Atletiko” himoyachilari sababchi bo'lishdi. Avval Filipe Luis, keyin esa Diego Godin maydonni tark etib, bizlarni ajoyib o'yindan mahrum qilishdi. Yaxshiyamki kataloniyaliklar raqibini ayadi, bo'lmasa, Diego Simeone holiga maymunlar yig'lardi. Ha, darvoqe. Filipe Luis Messiga nisbatan atayin qo'pollik ishlatgani uchun ikki o'yinga diskvalifikatsiya qilindi. Denis Cherishev qarg'ishga uchraganmi? “Real”ni Kubok bahslaridan chiqib ketishiga sababchi bo'lgan rossiyalik yarim himoyachi transfer mavsumining so'nggi kunida “Valensiya” jamoasiga ijara asosida kelib qo'shildi. “Ko'rshapalaklar” safida debyut o'yinini aynan Ispaniya Kubogida (yana “Barselona”ga qarshi-ya) o'tkazgan Cherishev yangi jamoasiga yordam berish u yoqda tursin, qaerga kelib qolganini bilmay qoldi. Xullas, u qaerga bormasin, jamoa omadsizlikka uchramoqda. Unga da'vogar bo'lgan “Sevilya” yarim himoyachini ijaraga olmaganidan xursand bo'layotgan bo'lsa, ajab emas. Neymar  “Real”ga kelsa, Ronaldu qaerga ketadi? Bilasiz, “Real” rahbariyati “Barselona” hujumchisi Neymar borasida muzokaralar olib borayotganidan Krishtianu Ronaldu norozilik bildirgan. Kuni kecha esa “qirollik klubi” Neymar bilan deyarli kelishib olgani va undan “Barselona”dan ketishini ommaga ma'lum qilishini so'ragani haqida xabarlar tarqaldi. Florentino Peres ushbu tranfer uchun umumiy jihatda 400 million evro sarflashga tayyor.  Xo'sh, Neymar “Real”ga kelsa, Ronaldu qaerga ketadi? Endi navbat Angliya Premer-ligasiga 1 fevral kuni Pep Gvardiolaning “Manchester Siti”ga o'tishi ma'lum bo'ldi. U “shaharliklar” bilan 3 yillik shartnomaga imzo chekdi. Tinimsiz mish-mishlardan so'ng Manchester klubi ushbu xabarni rasman e'lon qilishga qaror qildi. Har kim uning Angliyaga kelishiga turlicha munosabat bildirdi. Mourino hamkasbiga yangi jamoasida omad tilagisi kelmagan bo'lsa, Gvardiolaning sobiq ustozi Lui van Gal uni “quchoq ochib” kutib olishga tayyor. Ispaniyalik murabbiy ingliz futboliga qanchalik kirishib ketishini intizorlik bilan kutamiz. “Lester” hamon etakchi, “Arsenal” odatiy pog'onasiga qaytdi “Lester Siti” jamoasi “Liverpul”ga qarshi o'yinda Jeymi Vardining dubli evaziga uch ochkoni kiritib, peshqadamlikni saqlab qoldi. Bir necha o'yindan buyon gol kirita olmayotgan va kuchsiz raqiblarga ochko ulashayotgan “Arsenal” esa odatiy 4- pog'onasiga qaytdi. “Lester” o'tgan mavsum Premer-ligada arang jon saqlab qolgan bo'lsa, bu mavsum “tulkilar” barchani hayratda qoldirmoqda. Ular dahshatli kuchga ega bo'lgandek, go'yo. “Chelsi” Patoni oldi, Falkao tarkibdan umidini uzdi “Chelsi” jamoasi braziliyalik futbolchini ijara asosida o'z safiga qo'shib oldi. Anchadan buyon maydonga tushgaman Falkao endi muxlislar oldida futbol o'ynayshni orzu qilsa kerak. U o'ziga klub topish maqsadida Ispaniyaga yo'l olgnadi, ammo, kolumbiyalikni hech kim sotib olgisi kelmadi. Ronalu – 31, Neymar – 24, Teves – 32 yoshda! Kecha “Real” jamoasi etakchisi Krishtianu Ronaldu 31 yoshini qarshi oldi. Barcha matbuotlar faqat u haqida esladi. Buni qarangki, ushbu kunda boshqa iqtidorli futbolchilar tug'ilgan ekan. Neymar muchal (24) yoshini nishonlagan bo'lsa, Teves 32 yoshni “urib” qo'ydi. Shuningdek, “Barselona”da to'p surgan Jovanni van Bronkxost (41 yosh), “MYu” bo'lajak yulduzlaridan Adnan Yakuzay (21 yosh), “Paxtakor”da to'p surib, o'z faoliyatini yakunlagan Anvarjon Soliev (38 yosh), Angliya terma jamoasiga ustozlik qilgan Sven-Yoran Eriksson (68 yosh), afsonaviy Chezari Maldini (84 yosh) 5 fevral kuni o'z tavallud ayyomlarini nishonlashdi. Endilikda, “Hafta hayratlari!” ruknini muntazam ravishda e'tiboringizga havola etishga harakat qilamiz.  P.S. 
Mazkur materialda Omad Momani va Zezo Cartoons karikaturalaridan foydalanildi.
— deya xabar beradi uff.uz nashri.