Ortda qolib ketgan hafta futbol ishqibozlariga bir-biridan qiziqarli o'yinlar, ajoyib voqea va hodisalarni taqdim qildi. UFF.uz sayti an'anaga sodiq qolgan holda, bo'lib o'tgan muhim hodisalarga jahon karikatura namoyondalarining ijodlari orqali ta'rif berib o'tadi. Qani boshladik. Gvardiola: Men ayol kishiga o'xshayman
"Bavariya" bosh murabbiyi Xosep Gvardiola “Bavariya”da ishlay turib, "Manchester Siti" haqida o'ylayotganiga qo'yidagicha izoh berdi.
"Qanday qilib men «Manchester Siti» haqida o'ylab, «Bavariya»da ishlamoqdaman? Men ayol kishi singari bir necha ishni baravar qila olaman”.
Ispaniyalik murabbiyning ushbu gaplari Omar Momani nazaridan chetda qolmadi va navbatdagi ijodi mahsulini taqdim qildi. “Lester” peshqadam, Marez berar hammaga dam
Angliya Premer-ligasining 24-25-turlarida “Lester” jamoasi avval o'z maydonida “Liverpul”ni (2:0), keyin esa “Manchester Siti”ni (3:1) mag'lubiyatga uchratdi. Ko'pchilik ushbu o'yinlarda “qizillar” va “shahariklar”ni favorit deya e'tirof etishdi. Ammo, “serhgar” Raneri har ikkala o'yinda ishonchli g'alabaga erishdi.
Jamoa ochkolar sonini 53 taga etkazib, turnir jadvalida peshqadamlikni saqlab qoldi. “Etixad” stadionida Jeymi Vardi katta sahnaga chiqmagan bo'lsa-da, Riyad Marez va Robert Xut “tulkilar” g'alabasiga o'z hissasini qo'shishdi.
Shu o'rinda, Marezning individual mahoratini alohida ta'kidlab o'tish joiz. Jazoirlik yarim himoyachi o'zining chiroyli xatti-harakatlari bilan muxlislar e'tiborini qozonmoqda. Mashhur karikaturachi Omar Momani ham bu narsani e'tiborsiz qoldirmadi.

“Kech porlagan yulduz” – Jeymi Vardi “Lester”da qoladi!
Kuni kecha, “Lester” hujumchisi Jeymi Vardi klub bilan yangi shartnoma imzoladi. 29 yoshli hujumchi 2019 yilning yoziga qadar “tulkilar” tarkibida qoladigan bo'ldi. Ushbu xabar klub muxlislarini xursand qilib, top-klublarni ranjitgan bo'lsa, ajab emas.
“Real”ga g'alaba keltirgan Modrich
Ispaniya chempionati 23-turida “Real” safarda “Granada”ni 2:1 hisobida mag'lub qildi. Uchrashuvning asosiy vaqti yakunlanishiga 5 daqiqa qolganida Luka Modrich uzoq masofadan zarba yo'llab, jamoasiga 3 ochko keltirgan gol muallifi bo'ldi.
O'yindan keyin Zidan unga ko'proq uzoqdan zarbalar yo'llashni maslahat berdi. Zero, xorvatiyalik futbolchi o'zining kuchli va aniq zarbalari bilan nom taratgan.
Dunyoni Xitoy futboli egallaydi, shekilli
Xitoy Superligasi bir qator yirik transferlarni amalga oshirib, barchani hayratda qoldirmoqda. Ramires, Jervino, Jekson Martines, Aleks Teysheyra kabi mahoratli futbolchilar o'z faoliyatini Xitoyda davom ettiradigan bo'lishdi. Ammo, xitoyliklar bunda to'xtab qolgisi yo'q. Hozirda qit'adoshlarimiz Esekel Lavessi, Zlatan Ibragimovich, Arda Turon singari futbolchilarga, shuningdek, tajribali murabbiy Devid Moyesga qiziqish bildirmoqda.
Kim biladi deysiz, balki, ular ham tez orada Xitoyga o'tib ketar. Zero, Osiyoda transfer bozori fevral oxirida yopiladi.
So'nggi kunlarda e'tiborimizni jalb qilgan voqea va hodisalar shulardan iborat. Yaqin kunlarda Sizlar bilan yana ko'rishamiz.
P.S.
Sahifada Omar Monani va Zezo Cartoons karikaturalaridan foydalanildi.
— deya xabar beradi uff.uz nashri.