Avval xabar berib o'tganimizdek, Toshkentdagi so'nggi yig'inda “Qo'qon-1912” jamoasi to'rtta nazorat uchrashuvi o'tkazishni rejalashtirgandi. O'yinlar o'tkaziladigan sanalar va raqiblar nomi ma'lum bo'ldi. Bu haqida klub matbuot xizmati xabar bermoqda. 12 fevral kuni birinchi nazorat uchrashuvi Jizzaxning “So'g'diyona” klubiga qarshi bo'lib o'tadi. Davron Fayziev jamoasi bilan yanvar oyida o'tkazilgan yig'inda ham o'rtoqlik uchrashuvi o'tkazilgan edi. Unda jizzaxliklar 2:1 hisobida g'alaba qozonishgandi. Ikkinchi nazorat bahsi 15 fevral kuni bo'lib o'tadi. Shu kuni vakillarimizga Farg'onaning “Neftchi” jamoasi raqiblik qiladi. 18 fevral kuni esa Navoiyning “Qizilqum” jamoasiga qarshi maydonga tushish rejalashtirilgan. Nihoyat yig'inning so'nggi kuni – 21 ferval sanasida “Olmaliq” klubi bilan nazorat sinov o'yinini o'tkazamiz.
— deya xabar beradi uff.uz nashri.